171Get one guy Elijah from Tishbe town, Gilead side. He tell King Ahab, “I stay shua dat Yahweh, da God fo da Israel peopo, stay alive, an he da God I stay work fo. An I shua bout dis: From now, no goin get rain fo long time. No even goin get watta on top da groun morning time. Da ony rain goin come, goin be wen I say come!”
Den, Yahweh tell Elijah lata:
“No stay hea! Go da east side an go hide up dea inside da Kerit Gulch, mauka da Jordan Riva.
Da Kerit Stream goin be wea you get watta fo drink. I wen tell da scavenja birds awready, fo go bring food fo feed you ova dea.”
Elijah go an do wat Yahweh wen tell um fo do. He go da Kerit Gulch, mauka da Jordan Riva, an stay dea.
Ery day morning time, an ery day befo nite time, da scavenja birds bring him food an meat, an he drink watta outa da Kerit Stream.
Den eryting wen change. Da stream all come dry, cuz no mo rain all ova da land.
Den Yahweh tell Elijah dis:
“Go Zarefat town now, nea Sidon town. Stay dea. I awready wen tell one widow wahine ova dea fo give you food.”
So Elijah go Zarefat side. Wen he come by da gate fo da town, one widow wahine ova dea stay pick up sticks fo make fire. He call her, “Hui! Can bring me litto bit watta inside one cup, fo me drink?”
Wen she go fo get um, he call her again, an tell, “Can bring litto bit bread too?”
She tell, “Jalike you stay shua yoa God Yahweh stay alive, I shua dat I no mo even one pancake. I ony get one handful flour inside one box, an litto bit olive oil inside one jar -- dass it! An me, I ova hea fo pick up two-three stick. Den I go home cook da flour an da oil fo me an my boy. Us goin eat um, den wen us pau, us mahke!”
Elijah tell her, “Eh, no scared! Go home. Make da bread jalike you wen tell you goin do. But da firs ting I like you fo do, go make one small roun bread from wat you get fo me. Bring um out hea. Den, make da res fo you an yoa boy.
Cuz dis wat Yahweh, da God fo da Israel peopo, tell: Dat box flour no goin come empty, an erytime goin get olive oil inside da jar, till da time wen Yahweh send rain on top da groun.”
Da wahine go do jalike Elijah tell. An Elijah, an da wahine, an her boy get food fo ery day fo long time.
Da box flour neva come empty, an da jar erytime get olive oil inside. Dis happen jalike wat Yahweh tell Elijah fo tell da wahine.
Afta all dat wen happen, da wahine dat own da house, her boy come sick. He come mo an mo sick, till da boy no can breave an stop breaving.
She tell Elijah, “You one guy dat know God! How come you go agains me, aah?! Fo shua, you wen come hea fo make me tink bout all da bad kine stuff I wen do, an make my boy mahke!”
Elijah tell her, “Give me yoa boy.” He take da boy from her arm an take him upstairs, to da room on top da flat roof wea he stay. He lay da boy on top his pune`e.
Den Elijah call to Yahweh fo help him. He tell um, “Yahweh, you da God fo me fo shua! I stay dis widow wahine's house now. How come you wen make dis bad ting happen to her now, making her boy mahke?!”
Den three times, Elijah go lay down on top da boy. He call out to Yahweh, “Eh Yahweh! You da God fo me fo shua! Bring back dis boy's life to his body!”
Den Yahweh hear Elijah. Da life come back to da boy body, an he come alive.
Den Elijah pick up da boy an carry him back down from da room wea he stay an bring him inside da house. He give da boy to his mudda an tell, “Look! Yoa boy, stay alive!”
Da wahine tell Elijah, “Now, I know fo shua, dat you one guy dat know God fo real kine! Wen Yahweh tell you fo say someting, az true wat you tell!”