Elijah Run Away Mount Sinai Side
(Rome 11:3, 4)
191Ahab tell Jezebel eryting Elijah wen do, an how Elijah wen tell da peopo fo kill all da talka guys fo da Ba`al god wit dea swords. 2So Jezebel wen send one messenja guy by Elijah fo tell him, “Befo dis time tomorrow, I goin make you jalike you make da guys you wen kill! An if I no do dat, I like my gods do da same kine ting to me, an even mo worsa!”
3Elijah come scared. He no wase time, an he run away quick from dea, so he no mahke. Wen he reach Beersheba, Judah side, he tell da guy dat work fo him fo stay dea. 4But Elijah take one mo day fo go mo inside da boonies. He come by one broom tree an sit down undaneat, an he aks God fo let um mahke. He tell Yahweh, “I no can handle no moa! Let me mahke awready! No way I one betta man den my ancesta guys!”
5Den he lay down unda da tree an go sleep. Den one angel messenja guy come touch him an tell him, “Get up! Eat someting!” 6Elijah look aroun, an right dea by his head, get one roun flat bread, da kine dey bake on top da hot rocks, an one bottle watta. He eat da bread an drink da watta, den he lay down again.
7Da messenja guy from Yahweh come back again. He touch Elijah, an tell um, “Get up. Eat some moa. Cuz fo go wea you gotta go, goin be mo den you can handle.”
8So Elijah get up, eat and drink. Dat food make him strong again, an he go forty day, day time an nite time, till he reach Mount Sinai, da mountain wea God stay.
9Wen Elijah reach Mount Sinai, he go inside da cave dat get dea, an stay all nite.
Yahweh Talk Wit Elijah
Den Yahweh give him one spesho message. He tell, “Elijah! How come you stay hea?!”
10Elijah tell, “I wen go all out fo you, Yahweh, Da God Ova All Da Armies! Cuz da Israel peopo, dey no like da deal you wen make wit dem. Dey wen broke down all da altar places fo make sacrifice fo you. Dey wen kill da guys dat talk fo you wit dea swords. An now, I da ony talka fo you dat still stay, an dey stay look fo me fo kill me too!”
11Yahweh tell, “Go outside da cave. Stand on top dis mountain, in front me, Yahweh.” Befo Yahweh pass by dea, get one strong wind dat make da stone come down from da mountain an broke da cliffs. But Yahweh, he no come wit da wind. Afta da wind, get eartquake, but Yahweh, he no come wit da eartquake. 12Afta da eartquake, get fire, but Yahweh, he no come wit da fire. An afta da fire, get one small noise dat almos no can hear, jalike somebody whispa. 13Wen Elijah hear dat, he pull his blanket ova his face. He go litto bit outside da cave.
Den one small voice tell him, “Elijah! How come you stay ova hea?!”
14Elijah tell, “I wen go all out fo you, Yahweh, Da God Ova All Da Armies! Cuz da Israel peopo, dey no like da deal you wen make wit dem. Dey wen broke down all da altar places fo make sacrifice fo you. Dey wen kill da guys dat talk fo you wit dea swords. An now, I da ony talka fo you dat still stay, an dey stay look fo me fo kill me too!”
15Yahweh tell Elijah, “Go back, da same way you wen come. From dea, go inside da boonies nea Damascus town. Wen you reach dea, put olive oil on top Haza`el head, fo show I stay pick him fo come king fo da Aram peopo. 16An put olive oil on top Jehu, Nimshi boy, fo show I wen pick him fo come king fo da North Israel peopo. An same ting fo Elisha, Shafat boy from Abel-Meholah town. Put olive oil on top his head fo show I wen pick him fo come one talka guy fo me, fo take ova yoa work. 17Haza`el goin kill plenny peopo wit his sword, an da ones he no kill, Jehu goin kill dem. An da ones Jehu no kill wit his sword, Elisha goin kill dem. 18But I still get 7,000 Israel guys dat neva go down on top dea knee in front da Ba`al god an neva kiss da Ba`al statue!”
Elijah Tell Elisha Fo Come His Helpa Guy
19Den Elijah leave Mount Sinai. He go find Elisha Shafat boy firs. Elisha stay inside one big field wit eleven odda guys. Dey all plowing, ery guy wit two cow fo pull da plow. Elisha too stay plow, he da las guy. Elijah go inside da field by Elisha an put his blanket aroun Elisha. 20Den Elisha leave da cows wit da plow an run fo catch up Elijah. He tell Elijah, “Let me go kiss my fadda an mudda an tell um goodbye. Den I come wit you.”
Elijah tell um, “Kay den, go. I no goin give you presha wat you like do.”
21Den Elisha leave Elijah an go home. He take da two cow an kill um fo make sacrifice. Da wood pieces from da plow, he burn um fo cook da sacrifice meat. He give da meat to da peopo, an dey eat um. Den Elisha leave home for go wit Elijah an be his helpa guy.