Nabot An Da Grape Farm
211Lata, one mo ting happen wit Ahab, da king fo da Samaria peopo. Had one guy Nabot from Jezreel. He get one grape farm dea. Da grape farm stay nea one palace wea da king get ova dea. 2One time Ahab tell Nabot, “Eh, give me yoa grape farm so can make one vegetable garden ova dea, cuz stay nea my palace. I can give you one mo betta grape farm. O if you like, I can pay you plenny fo da land.”
3Nabot tell Ahab, “Yahweh no goin let me sell um to you! Cuz dat land stay wit my ohana from my ancesta time till now!”
4Den Ahab go home. He look real mad, cuz Nabot da Jezreel guy tell um, “I no goin sell um to you! Dat land, stay wit my ohana from my ancesta time till now.” So Ahab go lay down on top his pune`e. His face look at da wall, an he no eat notting cuz he all piss off.
5Ahab wife Jezebel come inside by him. She aks, “Wassa matta you, aah?! You get mad face, an you no eat notting!”
6He tell her wat happen: “I wen tell Nabot da Jezreel guy, ‘Sell me yoa grape farm, o if you like, I give you anodda one.’ But he tell me, ‘No! I no goin sell you my grape farm!’-”
7Jezebel his wife tell um, “Ho! How come you no ack like da king fo da Israel peopo?! Get up an eat! No worry, brah, I take care dat fo you. I goin get da grape farm from Nabot da Jezreel guy!”
8So Jezebel write some lettas, an she use Ahab name. Den she use Ahab seal fo ery letta so erybody know dey come from da king. She send um to da older leada guys an da town council guys dat live in Nabot town wit him. 9Dis wat she write:
“Tell yoa peopo, make one day fo no eat so can pray. Den wen da peopo come togedda, give Nabot da bestes place in front all da peopo. 10Den put two no good guys right in front Nabot. Tell dem fo poin finga at him lidis: ‘Eh! Us guys wen hear you tell, dat you like bad tings happen to God, an to da king!’ Den take Nabot outside, an erybody throw stone fo kill him.”
11So da older leada guys an da town council guys dat live Nabot town, dey do jalike wat Jezebel tell um fo do inside da lettas she wen write to dem. 12Dey make one day fo no eat so can pray, an dey give Nabot da bestes place in front all da peopo. 13Den da two no good guys come dea. Dey sit down right in front Nabot. Dey poin finga at Nabot in front all da peopo. Dey tell, “Dis Nabot, he tell he like bad tings happen to God, an to da king!” Den dey all take Nabot outside da town. Dey all throw stone at him, an he mahke.
14Den da leada guys send somebody by Jezebel fo tell, “Da peopo throw stone at Nabot, an he mahke awready.”
15Wen Jezebel hear dat dey wen all throw stone an kill Nabot, she tell Ahab, “Get up. Go take ova da grape farm, da one Nabot da Jezreel guy no like sell um to you. Cuz Nabot, he no stay no moa. He mahke awready.” 16Wen Ahab find out dat Nabot mahke, he go down take ova Nabot grape farm.
17Den Yahweh give dis message fo Elijah da Tishbe guy: 18“Go down fo meet Ahab, da king fo da Israel peopo. He live Samaria side, but right now, he stay inside da grape farm dat Nabot wen own Jezreel side. Ahab wen go down dea fo take ova da grape farm. 19Tell dis to Ahab: ‘Dis, wat Yahweh tell: Fo shua, you wen kill one guy, an den you take ova his farm!’
Den tell um dis too: ‘Dis, wat Yahweh tell: Da same place wea da dogs wen suck up Nabot blood, dey goin suck up yoa blood too!’-”
20Elijah go dea, an Ahab tell, “You da guy dat stay agains me, an now, you find me!”
Elijah tell, “Fo shua I find you, cuz you wen go sell out fo do real bad kine stuff dat Yahweh say, no go do! 21An now, Yahweh tell, ‘Dis me, da one dat goin make real bad kine stuff happen to you! I goin cut off all da peopo dat goin come from you. I goin wipe out ery guy from da Israel peopo dat get yoa blood, no matta dey slave o dey not slave. 22I goin make da same ting happen fo yoa ohana, dat I wen make happen fo da ohana dat come from Jeroboam Nebat boy, an same ting I wen make happen fo da ohana dat come from Ba`asha Ahijah boy. Az cuz you wen piss me off, an you wen make da Israel peopo do real bad kine stuff.’
23“An az fo Jezebel, Yahweh tell dis: ‘Da dogs goin eat up Jezebel by da Jezreel town wall.’ 24Da dogs goin eat da Ahab peopo dat mahke inside da town. Da ones dat mahke da country side, da scavenja birds goin eat dem.”
25(Neva have anodda guy like Ahab. He go sell out fo do real bad kine stuff dat Yahweh say fo no do. His wife Jezebel, she push him fo make lidat. 26Ahab wen go do real pilau kine stuff, cuz he go all out fo da idol kine gods, jalike da Amor peopo wen do. Az why Yahweh wen throw dem outa da land wen da Israel peopo come dea.)
27But wen Ahab hear dis message from God, he go broke off his clotheses an put on burm bag cloth nex to his skin fo show erybody he stay feel sore inside, an he no eat so he can pray. He even wear burm bag kine cloth wen he lay down sleep. Den he make real quiet wen he go aroun.
28Den dis message come from Yahweh fo Elijah da Tishbe guy: 29“You see how Ahab make himself come notting in front me? Cuz he do dat, I no goin make all da real bad kine stuff happen till afta Ahab mahke. But eryting I tell goin happen to da Ahab ohana afta his boy come da king.”