Jehoshafat an Ahab
(Mark 6:34)
221Had three year, da Aram peopo an da Israel peopo neva make war. 2Den, afta three year no mo war, King Jehoshafat from Judah side go fo see King Ahab, Israel side. 3Wen Jehoshafat stay Israel side, Ahab an his helpa guys talk. He tell, “You guys know, da town Ramot Gilead, dass oua land. But da king fo da Aram peopo, he wen take um away from us befo time. An us guys no do notting fo get um back from him!” 4Den he aks Jehoshafat, “You go wit me fo make war Ramot Gilead side?”
Jehoshafat tell da Israel king, “Shua, I go! Me an you, stay real tight. My peopo an my horses, dey stay yoas.”
5But Jehoshafat tell Ahab dis: “Firs ting, us guys gotta aks Yahweh if az good fo go make war, o not.” 6So King Ahab tell all da guys dat talk fo his god Ba`al fo come togedda. Get bout 400 dem. He aks dem, “I can go make war agains Ramot Gilead town, o not?”
Dey tell um, “Go make war, King Ahab. Oua main god we pray to, goin give you da town.”
7But Jehoshafat tell, “Ova hea, no mo one talka fo Yahweh, fo us find out wat Yahweh tink?”
8King Ahab tell, “Still get one guy I can aks um wat Yahweh tink. But I hate da bugga! Weneva he talk fo Yahweh, he no tell me notting good! He erytime tell bad tings goin happen to me! His name, Mikaiah, Imlah boy.”
King Jehoshafat tell, “Eh, brah, no good you talk lidat!” 9So da Israel king, Ahab, tell one a his palace guys fo come. Ahab tell um, “Quick! Go tell Mikaiah, Imlah boy, fo come right now.”
Mikaiah Tell Dat Ahab Goin Mahke
10Da two king guys, Ahab da king fo da Israel peopo an Jehoshafat da king fo da Judah peopo, wear dea king kine robes. Dey sit on top two throne, wea you go inside da Samaria town gate. Get one wide open place dea wea da peopo come fo take da junks outa da wheat, afta dey cut da wheat down. Dis time, inside dis wide place, all da guys dat talk for dea gods stay in front da two kings, an tell wat dea gods say.
11Had one a da talkas fo dea gods name Zedekiah, Kena`anah boy, wen make tings dat look like cow horn outa iron. He tell, “Dis wat Yahweh tell. You use dis horns fo bus up da Aram army guys, till you wipe um out!”
12All da odda talkas fo dea gods, dey stay tell same ting too. Dey tell, “Go attack Ramot Gilead an win da war! Cuz Yahweh goin give da town to oua king!”
13Da messenja guy dat go fo tell Mikaiah fo come by da king, he tell Mikaiah, “You see how all da guys dat talk fo da odda gods tell da same ting, dat da king goin win da war?! So, good you tell da same ting jalike dem!”
14But Mikaiah tell, “Jalike I stay shua dat Yahweh stay alive, I stay shua too bout da only ting I goin tell him, is wat Yahweh tell me!”
15Den Mikaiah come by King Ahab. Da king aks him, “Mikaiah! We goin go attack Ramot Gilead town? O we no do notting?”
Mikaiah tell him, “Go attack um an win da war! Cuz Yahweh goin give da town to oua king!”
16Da king tell um, “How many times I gotta make you promise fo tell me ony da trut, wen you talk fo Yahweh?!”
17Den Mikaiah tell,
“I see, jalike was one dream,
All da Israel guys running all ova da hills,
Jalike sheeps dat no mo sheep farma fo take care dem.
Yahweh tell me,
‘All dis guys, no mo boss fo dem.
Let um all go home,
An let eryting go good fo dem.’-”
18Da Israel king tell King Jehoshafat, “Jalike I wen tell you, dis Mikaiah guy, weneva he talk fo Yahweh, he no tell me someting good goin happen to me. Ony bad kine stuff!”
19Den Mikaiah tell some moa: “Az why you betta lissen dis ting wat Yahweh tell!
I wen see Yahweh.
He stay sit on top his throne.
All da armies inside da sky,
Dey stay stand aroun him, on da right side an on da lef side.
20“Yahweh aks, ‘Who can go bulai King Ahab, so he go attack Ramot Gilead town, an mahke dea?’ Somebody tell one ting, an oddas tell odda tings.
21“Den one spirit come an stand in front Yahweh, an tell, ‘Me, I goin bulai him.’
Yahweh aks him, ‘How you goin do dat?’
22“Da spirit tell, ‘I goin go ova dea, be one spirit dat make all da talka guys fo his gods bulai him wen dey talk.’
“Yahweh tell, ‘Good idea! You goin bulai all dem! Go, do jalike you tell!’
23“An dass wat you see stay happen right now. Yahweh wen send one spirit fo make all dese guys dat talk fo yoa gods, bulai wen dey open dea mout. Az cuz Yahweh tell, someting real bad goin happen to you!”
24Den Zedekiah, Kana`anah's boy, go ova dea an slap Mikaiah's head. He tell, “So! How da spirit from Yahweh can leave me, fo go ova dea talk to you, aah?!”
25Mikaiah tell Zedekiah, “Fo you, you goin know I tell da trut fo real kine, wen you goin run inside one room inside one house fo hide!”
26Den da king fo da Israel peopo tell his guys, “Take Mikaiah back by Amon, da Samaria mayor guy, an by my boy Joash. 27Tell um, ‘Dis wat da king tell: Put dis guy in jail. Give um ony jail kine bread an watta, till I come back da winna.”
28But Mikaiah tell da king, “Fo shua, if bumbye you come back an you okay, dat mean, Yahweh neva give me notting fo tell!” An Mikaiah tell da peopo, “Eh, all you peopo! No foget wat you wen hear!”
King Ahab Mahke
29So, Ahab da king fo da Israel peopo an Jehoshafat da king fo da Judah peopo go togedda fo attack Ramot Gilead. 30Ahab tell Jehoshafat, “Befo I go fight, I goin dress so nobody know who me. But you, wear yoa regula kine king robe.” So da Israel king dress so nobody know who him, an go fight.
31Befo dey start fight, da king fo da Aram peopo tell da 32 officer guys dat in charge a his war wagons, wat dey gotta do. He tell um, “No need fight da regula army guys o da officer guys. Jus make shua you kill da one guy, Ahab da Israel king!”
32So wen da officer guys in charge a da war wagons see Jehoshafat get da king kine robe, dey tink, “Az him! Da Israel king!” So dey turn da war wagons fo go attack him. But den Jehoshafat yell who him, 33an da officer guys in charge a da war wagons see he not da Israel king, so dey turn away an stop chasing him. 34But one a da Aram army guys wen shoot one mo arrow, ony fo shoot. Da arrow wen hit Ahab da Israel king in da puka wea da front part a da body armor come togedda wit da side part. Da king tell da army guy dat drive his war wagon, “Turn aroun quick! Get me away from da fighting! I hit!” 35All day, da two armies stay fight. Da king helpa guys put King Ahab inside his war wagon so he can sit dea an see da Aram army. But Ahab stay bleed plenny, so get blood all ova da bottom a da war wagon. Late aftanoon, Ahab mahke. 36Wen da sun almos go down, da Israel army guys all start fo yell, “Erybody go back yoa town! Erybody go back yoa land!”
37Dass how King Ahab mahke. Da army guys bring his body back Samaria town, an dey bury him dea. 38Da king's guys take da king's war wagon by one watta place Samaria side, wea da wahines dat fool aroun fo money go fo bafe. Da guys wash down da war wagon dea, an da dogs suck up da king's blood, jalike da message from Yahweh wen tell befo time.
39Had odda stuff happen wen Ahab stay king. All da tings he wen do -- da palace he wen build wit ivory kine decoration, da towns he wen put strong wall aroun -- all dat stay write inside da Record Book Fo Da Kings Fo Israel. 40Dey bury Ahab by his ancesta guys. Ahab boy Ahaziah come da nex king.
Jehoshafat Stay King Judah Side
41Now, dis, da story fo Jehoshafat, Asa boy. He come king fo da Judah peopo, da numba four year dat Ahab stay king fo da Israel peopo. 42Jehoshafat was 35 year ol wen he come king, an he stay king Jerusalem side 25 year. His mudda name Azubah, an her fadda Shilhi. 43Eryting Jehoshafat do, he do um jalike his fadda Asa. He neva go da wrong way, he ony do da kine stuff Yahweh say stay right. Still yet, all da sacrifice place on da top a da hills still stay dea. Da peopo still stay make sacrifice fo da odda gods an burn incense dea. 44Jehoshafat an Ahab da Israel king, dey neva fight each odda.
45Had odda stuff happen wen Jehoshafat stay king too. All da tings he wen do -- how him an his army guys fight da odda kings -- all dat stay write inside da Record Book Fo Da Kings Fo Judah. 46Had guys dat fool aroun wahines fo get money fo da temples fo da odda gods, an dey still stay do dat even afta Asa was da king. Jehoshafat throw out all dem guys outa his land. 47Dat time, da Edom peopo no mo king. Ony had one territorial govna from Jehoshafat stay in charge ova dea.
48Jehoshafat wen do anodda ting, he tell his guys fo build plenny big boat, fo carry plenny stuffs far away. He like dem go Yemen side fo Ofir kine gold dat come from ova dea. But da boats neva go dea, dey all sink Ezion-Geber side. 49Befo da boats go out, King Ahaziah, Ahab boy, tell Jehoshafat, “Let my saila guys go wit yoa saila guys inside da big boats.” But Jehoshafat neva like, so dey no go. 50Den Jehoshafat mahke, an dey bury him by his ancesta guys inside David Town, az Jerusalem, cuz he come from King David. Jehoshafat boy Jehoram come da nex king.
Ahaziah Stay King Israel Side
51Da numba 17 year Jehoshafat was king Judah side, Ahaziah, Ahab boy, come da king fo da Israel peopo Samaria side. He da king fo da Israel peopo two year. 52He do stuff Yahweh say az bad, cuz he do jalike his fadda an his mudda. He ack jalike Jeroboam, Nebat boy, ack befo time, da guy dat wen make da Israel peopo do bad kine stuff. 53Ahaziah get da Ba`al god fo his boss. He go down in front Ba`al an pray to him. He make Yahweh, da God fo da Israel peopo, real mad, cuz Ahaziah ack jalike his fadda Ahab.