31King Solomon wen let da Pharaoh guy, da King fo Egypt, make one deal wit him. Fo set up da deal, Solomon wen take da Pharaoh guy daughta an marry her. He bring her David Town, az Jerusalem. She stay inside Jerusalem long time, till King Solomon pau build his own palace, an da Temple Fo Yahweh, an da wall aroun da town.
2Ony one ting -- dat time, all da peopo still stay making sacrifice on top da hills, cuz dey still yet no build one temple fo Yahweh, fo show erybody wat kine God him.
3King Solomon, he get love an aloha fo Yahweh, an he stay keep all da rules dat his fadda David wen make. Ony one ting not right -- even Solomon stay make sacrifice an burn incense on top da hills. 4Plenny time, King Solomon wen go Gibeon side fo make sacrifice ova dea, cuz dass da mos important sacrifice place, on top one hill ova dea. King Solomon guys wen kill tousan cows, fo make burn up kine sacrifice on top dat altar. 5Wen King Solomon stay Gibeon side, Yahweh let Solomon see him inside his dream, one nite wen Solomon stay sleep. God tell um, “Wateva you like me give you, you aks me.”
6Solomon tell, “You wen do plenny for my fadda King David, dat wen work fo you. You wen stay real tight wit David, cuz you know da way he live, an you know you can trus um, how he stay do da right ting erytime. David get one clean an good heart, jus how you like. An you wen stick wit him, cuz you wen give King David one boy fo sit on top his throne, an dass me. 7So Yahweh, you da God I pray to, an I work fo you. You wen make me come da King afta my fadda David mahke. But me, I jalike one small boy -- I donno how fo lead da peopo. 8I yoa worka guy, an I stay hea wit all yoa Israel peopo, da peopo you wen choose. Get choke peopo, so plenny, no can count all dem. 9You know, I yoa worka guy. So make my heart fo lissen an undastan wass happening, so I can be da right kine judge fo yoa peopo. Help me fo undastan wass good an wass bad. Cuz no mo nobody hea, fo be da judge fo yoa awesome peopo!
10Da Boss feel good, dat Solomon aks him fo do. 11God tell King Solomon, “Cuz you aks me fo help you know wat fo do. You neva aks me fo make you live long time, o fo make you come plenny rich, o fo kill all da peopo dat stay agains you. But you ony aks me fo help you lissen an undastan, so you can know wass right an wass wrong. 12Cuz you aks me fo do dat, I goin do jalike you say. I goin help you, give you da kine heart, fo know wat fo do erytime, an fo know wass good an wass bad. No mo nobody befo you, dat know wat fo do erytime jalike you, an no goin get nobody afta you too, dat can make jalike you. 13An one mo ting, I goin give you da tings dat you neva aks me fo give you. I goin make you come rich, an I goin make peopo get respeck fo you. No goin get no odda king guy dat stay jalike you, till you mahke. 14If you do eryting jalike I tell you fo do, an do how my rules say, an do da tings I tell you dat you gotta do jalike yoa fadda King David wen do, den I goin make you live long time too.”
15Den King Solomon wake up, an he know God wen talk to him inside da dream. He go back Jerusalem side, an go stand in front da Box Fo Rememba Da Deal Wit Da Boss. He make sacrifice dat you burn up, an da kine sacrifice fo tell God dat eryting stay okay. He make one party fo all da peopo dat work fo him.