Solomon Palace An Odda Places
71Solomon build odda buildings too. Take him 13 year fo finish eryting.
2Solomon build da house dey call Da Lebanon Fores House too. Was 150 feet long, 75 feet wide, an 45 feet high. Get big poses dey put from cedar kine wood. Dey make four row pos, an put cut cedar beams on top ery pos row fo hold up da raftas. 3Da roof, cedar wood too. Get 45 raftas fo hold up da roof, an 15 pos in ery row, an da raftas go from da top a one pos to da top a da nex pos dat match in da nex row. 4Had one side stay open fo put three row window, an da odda side da same ting, an dey stay face each odda. 5All da door get square frame. Get three row window on one side, an three on da odda side, an dey face each odda.
6Da Hall Wit Poses, Solomon make dat too, 75 feet long an 45 feet wide. In front da hall, get lanai wit big poses in front. Da roof fo da lanai stick out in front da poses.
7Den Solomon make da Hall Fo Da Throne. Dis da Hall Fo Judge Da Peopo. From da floor to da roof, eryting stay cova wit cedar wood.
8Solomon build his own house fo live inside, not da main yard, but litto bit back from da Hall Fo Da Throne. Solomon house, same kine building jalike da Hall Fo Da Throne. He make one nodda house, jalike his own house, fo Pharaoh daughta dat he wen marry.
9Eryting Solomon build, he make um wit stone block dat cos plenny. Dey measure da block, den cut um wit da saw jus how dey wen measure um, fo da inside an da outside a da house, from da foundation to da top a da wall, an from outside all da way to da big yard inside. 10Da foundation stone blocks get real big stones, 12 to 15 feet, an cos real plenny. 11On top da big foundation stone, get stone blocks, da kine dey measure an den saw um fo fit, an beams from cedar wood, dat cos real plenny too. 12All aroun da main yard, da wall get three course high cut stone block, den one course cedar wood beam, till stay high nuff. Dey make um jalike dey wen make da yard aroun da Temple Fo Yahweh, an da lanai in front da Temple.
Huram Da Guy Dat Make Stuff Outa Bronze
13King Solomon wen call one guy, Huram from Tyre, fo come by him. An da guy come. 14Huram mudda, one widow from da Naftali ohana. His mahke fadda was one Tyre guy dat know how fo make all kine real good stuff from bronze metal. Huram know eryting how fo do um, an know wat fo make wit metal. He know all da kine work he do wit da bronze metal. So Huram come by King Solomon, an he do all da kine work dat Solomon give um.
15Huram melt bronze metal fo make two big pos. Dey 27 feet high, an need one 18 feet rope fo go aroun da middo. 16Den he melt bronze metal fo make two fancy kine piece fo go on top da two pos. Dey 7 feet 6 inch high. 17He make da top piece fo look like get square net all ova, an chains aroun da net, seven chains fo one top piece, an seven fo da odda. 18Fo da part dat no mo chains on top, he make two row pomegram dat go aroun da top pieces. 19Da top six feet a da top pieces a da poses fo da lanai, ova da chains an da pomegram, he make um look like watta lily flowa. 20Da two top piece unda da lily flowa, stay roun an stick out litto bit wit da nets an chains right dea, den get two row dat look like pomegram fruits wit hundred pomegram ery row all aroun da piece, an da two top piece same same. 21Huram wen put up da two poses on top da lanai wea da pries guys go inside da Temple. He give da name “He Make You Solid,” az “Yakin” in da Hebrew language, wen he put up da sout side pos. An wen he put up da nort side pos, he give da name “Wit Him, You Strong,” az “Bo`az” in da Hebrew language. 22Wen dey put da stuff dat look like da lily on da top da poses, da work fo da poses, pau.
23Den Huram melt da bronze metal fo make da big roun watta tub. Was 15 feet from one side to da odda side, 7 feet 6 inch high, an aroun da outside, if you put one rope, goin be bout 45 feet long. 24Jus unda da top part, all da way aroun da tub, he make two row picha dat look like roun gourds, an da gourds, ery one a dem bout two inch wide. Dey pour da hot bronze metal fo make da tub, so da tub an da gourds all come out da same piece. 25Da tub stay on top 12 bronze bull cow statues. Three a dem look nort side, three look wes side, three look sout side, an three look eas side. Da tub stay sit on top dem, an dea okole all stay inside da middo. 26Da rim, 3 inch thick. Da rim jalike da rim on one cup, an look jalike one lily flowa. Da ting hold 11,500 gallon watta.
27Huram wen make ten watta cart from bronze metal. Dey 6 feet long an 6 feet wide, an 4 feet 6 inch high. 28Dey make ery watta cart so get panels aroun da outside so no can look inside. All da panels go from one corna pos to da odda corna pos. 29Dey cut da panels dat stay in da middo a da poses, fo make picha a lions, an cows, an awesome angel watcha guys, an same ting fo da poses. Dey cut da panels so da top look jalike get one lei aroun um dat stick out litto bit. Da lei stay mo high den da lions an cows, an same ting fo da bottom side, stay unda da lions an cows. 30All da watta carts get four wheels an axles dey make from bronze metal. On top da four cornas, dey melt bronze metal fo make tings dat stick up from da two sides fo hold one big watta tub. Dey make lei kine picha all ova. 31Da top side, get one roun hole dat go down 27 inch. Aroun da hole, get one round rim stick up 18 inch ova da top a da cart, jalike one stand fo hold one big watta tub. Get pichas cut all aroun da outside too.
Da side panels dat go aroun da cart, dey square, not roun. 32Da axles fo da four wheels stick out from unda da panels. Dey melt da bronze fo make da cart an da frame an da axles, one piece. Ery wheel 27 inch high. 33Dey make da wheels jalike da wheel fo one war wagon. Dey melt bronze metal fo make da axle part, an da outside part, an da spokes, an da wheel hub. 34Same ting wit da four tings dat stick up from da cornas fo hold da watta tub, dey make one piece wit da watta cart frame. 35All aroun da top a da watta cart, get one roun rim nine inch high. Da poses an da panels, dey make dem one piece wit da frame too. 36Huram cut pichas all ova da poses an da rims. Da pichas look jalike awesome angel watcha guys, an lions, an palm trees, ery place dat stay big nuff fo put one picha. He cut odda pichas too dat look like get lei all ova. 37Dass how Huram wen make da ten watta cart. He melt da bronze metal, da same size an da same shape fo make all a dem.
38Den Huram make ten watta tub from bronze metal fo go on top da ten watta cart. Ery tub 6 feet from one side to da odda side, an hold 230 gallon watta. 39He put five watta carts on da sout side a da Temple, an five on da nort side. Den he put da big watta tub in front da souteas corna a da temple. 40He make da small tubs an shovels an bowls too.
Dass how Huram finish all da work he do fo King Solomon, fo make da Temple Fo Yahweh. Dis wat he make:
41Da two big poses,
Da two roun tings dat stay sit on top da poses,
Da tings dat look like nets dat stay all ova da roun tings,
42Da 400 tings like pomegram fruits dat go on top da square net on top da roun part, two row pomegram fo da top a one pos an two row fo da top a da odda pos,
43Da 10 carts fo da watta tubs,
Da 10 watta tubs dat go on top da carts,
44Da one main watta tub,
Da twelve bull cows dat hold da watta tub,
45Da pots an shovels an bowls.
Huram wen make all dis tings fo King Solomon, fo da Temple Fo Yahweh. He make um all wit bronze metal dat dey polish plenny.
46Da king wen tell his guys fo melt da bronze metal an pour um ova dea nea da Jordan Riva, wit Sukkot on one side an Zartan on da odda side, cuz get da spesho kine dirt ova dea dat make good form fo pour metal inside. 47Get real plenny diffren kine piece. Solomon neva bodda fo weigh da stuff, so dey neva find out how much bronze metal dey use.
48Solomon tell his guys fo make all da odda tings dat go inside da Temple Fo Yahweh too:
Da gold altar,
Da gold table fo da bread dey put in front Yahweh,
49Da pure gold stand fo da lamps, dey put inside da room in front da room wea da Box stay, five fo da sout side an five fo da nort side,
Da gold flowas, an lamps, an tongs,
50Da pure gold cups, an knifes fo cut da wicks, an bowls, an dishes fo da incense, an pans fo carry da fire,
Da gold plate pivot fo da doors dat go inside da mos inside room, da Place Dat Stay Real, Real Spesho Fo God,
Da gold plate pivot fo da big doors fo go inside da main Temple room.
51An dass how eryting come out good fo da work dat King Solomon wen do fo build da Temple Fo Yahweh. Den Solomon go bring all da stuff dat his fadda King David wen make spesho fo God befo time -- silva, an gold, an tings fo use inside da Temple. An he put um all inside da store rooms inside da Temple Fo Yahweh.