(2 Records 22:10-23.21)
Wen Ataliah, Ahaziah mudda, see dat her boy Ahaziah mahke, she start fo wipe out all da Judah king ohana.
But Jehosheba, King Jehoram girl an Ahaziah sista, she go wea all Jehoram's kids stay. She steal Joash, Ahaziah boy, from dea, cuz she know dey all goin mahke. She put Joash an da wahine dat give him milk inside one bedroom fo hide him from Ataliah. Dass how Joash still stay live.
He stay hide wit da wahine dat give him milk, inside da Temple Fo Yahweh fo six year, an Ataliah stay in charge a da land all dat time.
Year numba seven, da pries guy Jehoiada send messenja guys fo tell da army captain guys, an da guys from Caria side dat guard da king, an da army messenja runna guys, fo tell all dem fo come by him inside da Temple Fo Yahweh. He make one deal wit dem, an tell dem, “You gotta make one strong promise fo stay tight wit me, right hea inside da Temple Fo Yahweh.” Den he show dem da king boy.
He tell dem, “Dis wat you guys gotta do. You guys get three team dat suppose to show up fo work on da Res Day, yeah? One team goin guard da king's palace.
Da nex team, go by da Sur Gate. Da odda team, go by da gate in back a da army messenja runna guys. Dass how all you guys goin take turn guard da temple.
Same ting, you guys get two odda team dat no go work on da Res Day. You guys from dose teams, all gotta take care guard da temple too, fo make shua da king no get hurt.
Stay nea aroun da king. Make shua erybody carry sword an odda fighting stuff in yoa hand. Anybody come wea you guys stay line up, kill um. Stay nea aroun da king wea eva he go.”
Da army captain guys do eryting Jehoiada da pries guy tell um fo do. Erybody bring dea army guys, da ones dat start fo work on da Res Day, an da odda guys dat no work dat day, an come by Jehoiada da pries guy.
Jehoiada give da army captain guys da spears an shields dat King David guys wen use befo time, dat stay inside da Temple Fo Yahweh.
All da army messenja guys get dea tings fo fight inside dea hand too. Dey all make line aroun da king, an all aroun da altar an da temple, from da south side to da north side. So now, nobody can come inside.
Jehoiada bring da king's boy outside in da yard, an put da king kine crown on top his head. He give da boy one copy a da Rules From God, so he no foget da deal wit Yahweh bumbye. Da peopo make him king. Dey put olive oil on top his head fo show dey pick him, an da peopo all clap dea hands, an yell, “We like da king live long time!”
Wen Ataliah hear all da noise da army messenja runna guys an da peopo make, she go by da peopo dat stay stand aroun da Temple Fo Yahweh.
She look ova dea wea all da noise stay, an her jaw drop, cuz da king stay stand ova dea by da big pos, wea da king guys stand erytime. Da main leadas fo da army an da guys dat blow da trumpets stay dea by da king side, an all da peopo inside da land stay happy an blowing trumpet. Den Ataliah broke her clotheses, an yell, “Dey wen stab us in da back!”
Jehoiada tell da captain guys dat get all dea army guys dea wit um: “Put Ataliah inside da middo a da army guys, an take her outside da Temple. Kill anybody dat like go wit her wit yoa swords!” Cuz Jehoiada wen tell, “No good, kill her inside da Temple Fo Yahweh.”
So dey grab her an take her by da place wea da horses go inside da palace yard, an dey kill her ova dea.
Den Jehoiada da pries guy make strong kine promise to Yahweh, from da king an da peopo, dat dey goin come Yahweh peopo. An he make da king make promise to da peopo, an da peopo make promise to da king.
Den all da peopo inside da land go by da Temple Fo Ba`al, an bus um up. Dey smash da altars an da idol kine god statues real small. Dey kill Mattan, da pries guy fo Ba`al, in front da altars.
Den Jehoiada da pries guy put guard guys in charge a da Temple Fo Yahweh.
He take da army captain guys wit him, da guys from Caria dat guard da king, da messenja runna guys, an all da odda peopo inside da land. All dem bring da king down from da Temple Fo Yahweh, an go inside da palace by da gate fo da messenja runna guys. Den da king take his place on top da throne wea all da king guys sit.
Cuz a dis, all da peopo inside da land wen dance an sing cuz dey stay good inside. An Jerusalem town stay quiet, cuz da army guys wen kill Ataliah wit dea swords inside da palace.
Joash stay seven year ol wen he come king.