Azariah (Uzziah) Da Judah King
(2 Records 26:3-4, 21-23)
151Wen Jeroboam Numba Two stay Israel king fo twenny-seven year, Amaziah's boy Azariah, (dat lata take da name Uzziah), come Judah king. 2He sixteen year ol wen he come king, an he stay da king inside Jerusalem fo fifty-two year. His mudda Jecoliah, she from Jerusalem. 3Uzziah do wass right, da way Yahweh see him, jalike his fadda Amaziah wen do. 4But da sacrifice places on top da hills still stay dea. Da peopo still stay make sacrifice an burn incense fo odda gods ova dea.
5Yahweh make King Uzziah get one kine sick all ova da skin dat odda guys can catch, till he mahke. Cuz a dat, he live inside one house wea nobody can come. Jotam, da king's boy, stay take charge da palace, an was da leada fo da peopo inside da land.
6Had odda stuff happen wen Uzziah stay king. All da tings he wen do, stay inside da Record Book Fo Da Kings Fo Judah. 7Uzziah (dass Azariah) wen mahke, an dey bury him by his ancesta guys, inside King David's big town. An Jotam, his boy, come da nex king.
Zekariah Da Israel King
8Wen Azariah (dass Uzziah) stay Judah king fo thirty-eight year, Zekariah, Jeroboam Numba Two boy, come Israel king. He stay king fo six month inside Samaria town. 9Da way Yahweh see Zekariah, he do bad kine stuff jalike his ancesta guys wen do. He no turn away from da bad kine stuff dat Jeroboam Numba One, Nebat's boy, do, wen he wen make da Israel peopo do bad kine stuff.
10Had one guy Shallum, Jabesh boy, make plan wit some odda guys fo kill Zekariah. Shallum attack Zekariah in front da peopo an kill um. So Shallum come da nex king afta Zekariah. 11Da odda stuff dat Zekariah wen do, stay inside da Record Book Fo Da Kings Fo Israel. 12Dis all happen da way Yahweh wen tell Jehu goin happen: “You, yoa boy, yoa grankid, and yoa great grankid, goin sit on top da Israel throne, ony four a dem, den yoa line goin pau.”
Shallum Da Israel King
13Shallum, Jabesh boy, come Israel king wen Uzziah was da Judah king fo thirty-nine year. An Shallum stay da Israel king inside Samaria town fo ony one month. 14Den Menahem, Gadi's boy, go up from Tirzah to Samaria. He attack Shallum, Jabesh boy, inside Samaria, an kill him. An Menahem come nex king afta him.
15Da odda stuff dat Shallum wen do, an da plan he make fo kill King Zekariah, all dat stay inside da Record Book Fo Da Kings Fo Judah.
Menahem Da Israel King
16Dat time, Menahem start from Tirzah town, an attack Tifsah town, an erybody dat live aroun dea, cuz dey no like open dea gates fo him. He bus up Tifsah an cut open all da hapai wahines dea.
17Wen Azariah stay Judah king fo thirty-nine year, Menahem, Gadi's boy, come da Israel king. He stay Israel king inside Samaria town fo ten year. 18He do bad kine stuff, da way Yahweh see um. All da time he stay king, he no turn away from da bad kine stuff dat Jeroboam Numba One, Nebat's boy, wen do, wen he make da Israel peopo do bad kine stuff.
19Den Tiglat-Pileser, da Assyria king, go attack da peopo inside da Israel land, an Menahem wen give Tiglat-Pileser thirty-seven ton silva fo make Tiglat-Pileser come his side. Cuz a dat, Menahem come mo strong fo stay king. 20Menahem wen make da rich kine Israel peopo give him dea silva. Ery rich guy gotta pay 20 ounce silva fo give um to da Assyria king. So da Assyria king go back home, an no stay inside da land no moa.
21All da odda stuff dat Menahem wen do, stay inside da Record Book Fo Da Kings Fo Israel. 22Menahem mahke an dey bury um wit his ancesta guys. An Pekahiah his boy come da nex king.
Pekahiah Da Israel King
23Wen Azariah stay da Judah king fo fifty year, Pekahiah, Menahem boy, come da Israel king inside Samaria town, an he stay king fo two year. 24Da way Yahweh see him, Pekahiah do bad kine stuff. He no turn away from da bad kine stuff dat Jeroboam Numba One, Nebat's boy, wen do, an dat he make da Israel peopo do too. 25Pekah, Remaliah's boy, he one a da main leada guys fo Pekahiah army. He make plan fo kill Pekahiah. Pekah take fifty guys from Gilead wit him fo go inside da strong wall part a da king's palace inside Samaria town. He kill Pekahiah, Argob, an Aryeh. Dass how Pekah kill Pekahiah, an come da nex king afta him.
26All da odda stuff dat Pekahiah wen do, stay inside da Record Book Fo Da Kings Fo Israel.
Pekah Da Israel King
27Wen Azariah (dass Uzziah) stay Judah king fo fifty-two years, Pekah, Remaliah's boy, come da Israel king inside Samaria town. He stay king fo twenny year. 28Da way Yahweh see Pekah, he do bad kine stuff too. He no turn away from da bad kine stuff dat Jeroboam Numba One, Nebat's boy, wen do, wen he make da Israel peopo do bad kine stuff.
29Wen Pekah stay king Israel side, da Assyria king Tiglat-Pileser come back attack again. He take ova five town: Ijon, Abel Bet-Ma`akah, Janoah, Kedesh, an Hazor. He take da Gilead an Galilee lands too, an all da Naftali land, an make da peopo dea give up dea land an go Assyria side. 30Den Hoshea, Elah's boy, make plan fo kill Pekah, Remaliah's boy. Hoshea guys attack Pekah an kill um, an den Hoshea come da nex Israel king. Dat happen wen Jotam, Uzziah's boy, stay da Judah king fo twenny year.
31All da odda stuff dat Pekah wen do, stay inside da Record Book Fo Da Kings Fo Israel.
Jotam Da Judah King
(2 Records 27:1-4, 7-9)
32Befo, wen Pekah, Remaliah's boy, stay da king inside Israel fo two year, Jotam, Uzziah da Judah king boy, come king. 33Jotam was twenny-five year ol wen he come king, an he stay king inside Jerusalem fo sixteen year. His mudda, her name Jerusha, Zadok's girl. 34Da way Yahweh see um, Jotam do wat stay right, jalike eryting his fadda Uzziah wen do. 35But still get one ting da peopo neva do. Da sacrifice places fo da odda gods still stay on top da hills, an da peopo stay make sacrifice an burn incense fo da idol kine gods ova dea. Jotam build da Mauka Gate fo da Temple Fo Yahweh again.
36All da odda stuff dat Jotam wen do, stay inside da Record Book Fo Da Kings Fo Judah. 37(Dass da same time Yahweh start fo send Rezin, da Aram king, an Pekah, Remaliah's boy, fo attack Judah.) 38Wen Jotam mahke, dey bury him wit his ancesta guys inside his ancesta David's big town. An his boy Ahaz come da nex king afta him.