God Going Get Jerusalem Outa Trouble
(Isaiah 37:1-13, 2 Records 32:20-22)
191Wen King Hezekiah hear dat, he broke his clotheses, put on burmbag kine clotheses fo show he stay sore inside, den he go inside da Temple Fo Yahweh. 2He send Eliakim, da guy dat stay in charge a da palace kine business, Shebna da secretary, an da main pries guys, an dey all stay wear burmbag kine clotheses too, fo go by Isaiah, Amoz boy, da guy dat talk fo God. 3Dey tell Isaiah, “Dis wat Hezekiah tell: Us get plenny trouble today! Yahweh stay ack mean to us guys. Us no can handle! Az jalike one bebe goin born, but da mudda not strong nuff fo born um. 4Maybe yoa God Yahweh hear eryting da territorial govna guy from Assyria wen tell. His boss, da Assyria king, wen send him ova hea fo make fun a Da God Dat Stay Alive, an he stay talk stink bout him. Maybe Yahweh goin punish him cuz a wat he wen tell. Az why I aks you, Isaiah, fo pray fo all us guys dat still stay alive.”
5Afta King Hezekiah guys come tell um dat, 6Isaiah tell um, “Dis wat you guys gotta tell yoa boss: ‘Yahweh tell: No stay scared cuz a wat you wen hear -- bout da guys from da Assyria king dat wen talk stink bout me. 7Cuz you know wat I goin do?! I goin mess wit da king head. He goin hear wat somebody tell, an he goin tink dat he betta go back his own land. An wen he get dea, I goin make somebody go kill him wit one sword.’-”
8Wen da territorial govna guy from Assyria start fo go back by da Assyria king, he find out da king wen leave Lakish town awready, so he go meet da king wea dea army stay fight agains Libnah town.
9Den, da Assyria king Sennakerib hear dat Tirhakah, da king from Sudan, stay bring his Egypt army guys fo fight da Assyria king. So Sennakerib send messenja guys by Hezekiah one mo time. He tell um: 10“Go tell Hezekiah, da Judah king, dis: ‘No let da god dat you trus bulai you. Cuz he goin tell you, “No way I goin let da Assyria king take ova Jerusalem!” 11Fo shua you wen hear wat us Assyria king guys wen do to all da odda countries awready! Us guys wen wipe um out! An you tink yoa god goin get you outa trouble?! No way! 12Da gods fo da peopos dat my ancesta guys wen wipe out, dea gods neva help dem get outa trouble! Us guys mo strong den da gods fo Gozan, Haran, Rezef, an da Eden peopo dat wen live Tel Assar! 13Wea da king fo Hamat, aah? O da king fo Arpad, da king fo da big town a Sefarvaim, o Hena, o Ivvah? Wea dese guys stay now?!’-”
Hezekiah Pray
(Isaiah 37.14-20)
14Hezekiah get da letta from da messenja guys, an read um. Den he go up da Temple Fo Yahweh, an put down da letta in front Yahweh. 15Hezekiah pray lidis in front Yahweh: “Eh Yahweh! You da God fo da Israel peopo. You stay in da middo a da awesome angel watcha guys. You da ony God ova all da king guys on top da earth. You da One wen make da sky an da earth. 16Yahweh! Lissen real good! Open yoa eyes, an look! Lissen wat Sennakerib wen tell me. He stay talk stink bout you, da God Dat Stay Alive!
17“Fo shua az true, Yahweh, dat da Assyria kings wen bus up all dose peopos an dea lands, dat da Assyria king talk bout! 18Da Assyria guys wen throw dose peopo's gods inside da fire an burn um up, cuz dey not real kine gods, but ony tings dat peopo make from wood an stone. Az why dey can wipe um out. 19Yahweh, you da God fo us guys! Help get us outa Sennakerib powa! Den all da kings on top da earth goin know fo shua dat you Yahweh, az da ony God dass fo real!”
Isaiah Tell Dat Sennakerib Goin Mahke
(Isaiah 37:21-38; 2 Records 32:20-21)
20Den Isaiah, Amoz boy, send one message fo Hezekiah. He tell: “Dis wat Yahweh, da God fo da Israel peopo, tell: I hear wat you tell me wen you pray, bout Sennakerib da Assyria king. 21Me, Yahweh, I get someting fo say agains him:
‘Eh, King Sennakerib!
All da wahines from Zion Hill
Hate yoa guts an make fun a you.
Dey goin stick finga at you wen you run away.
22You stay talk stink bout me, yeah, Sennakerib?!
You stay talk big, yeah?!
You tink you get mo powa den me, yeah?!
Me, da God dat stay good an spesho fo da Israel peopo!
23You wen send yoa messenja guys hea
Fo talk stink bout me, da Boss.
An you, Sennakerib, you wen tink lidis:
“Me, Sennakerib, I ride inside my war wagon
An bring all my war wagons wit me
On top da mountains,
All da high mountains inside Lebanon!
An I wen cut down da tall cedar trees,
An da bestes pine trees!
An I go make camp
In far place wea get da bestes kine trees.”
24You, Sennakerib, wen tell: “I wen dig pukas fo watta inside odda lands,
An drink da watta from dea.
I wen make supa plenny army guys walk ova da streams Egypt side
An dey dry up all da streams ova dea!”

25‘You neva hear dis long time befo, o wat?!
I Yahweh wen make plan bout all dis.
From befo time, I wen set up eryting.
Now, I stay make um all happen jalike I tell.
Dass how come you can make big towns wit strong walls
Come piles a rocks wea nobody can live.
26Da peopo dat live dea, no mo powa.
Dey lose fight an come shame.
Dey stay jalike da plants inside da field,
Jalike da young grass plants,
Jalike da grass on top da flat roofs
Dat da sun burn befo can come up strong.

27‘But I know how you stay make,
An wea you stay all da time.
I know how you stay come all piss off at me.
28Cuz wen you come all piss off at me,
An I hear you talk like you no care bout notting,
I goin put my hook in yoa nose,
An put my horse bit inside yoa mout
An I goin make you go back
Da same way you wen come ova hea!’
Dass wat Yahweh tell Sennacherib.
29Den Yahweh tell Hezekiah:
“Dis goin be da sign fo show you bout wass goin happen, Hezekiah:
Dis year, you goin eat ony stuff dat you neva plant,
An nex year, ony wat grow from dat.
But da year afta dat, you guys goin plant seed an cut da food.
Plant grape farms, an eat da fruits.
30Jalike befo time, da peopo dat still stay alive from da Judah ohana,
Dey goin get strong root fo go down unda dem,
An make fruits dat grow up ova dem.
31Cuz from Jerusalem, da peopo dat still stay alive goin come out again,
Da ones from Mount Zion dat goin get outa trouble.

Cuz me, Yahweh, Da God Ova All Da Armies,
I goin go all out fo make shua az wat happen.

32“Me, Yahweh,
Az why I tell dis
Bout da Assyria king:
He no goin come inside dis big town.
He no goin shoot arrow ova hea.
He no goin come ova hea wit one shield.
He no goin pile up dirt by da town wall
So his army guys can run on top an go inside.
33He going back da same way he wen come.
He no goin go inside dis big town.”
Az wat me, Yahweh, tell.
34An he tell dis too:
“I goin fight fo dis big town,
An get da peopo dea outa trouble
Cuz a who me, an fo David my worka guy.”
Sennakerib Mahke
35Dat same day, nite time, one angel messenja guy from Yahweh go out inside da Assyria army camp. He kill 185,000 guys inside dea. Wen da Assyria guys dat no mahke get up da nex morning, get all da mahke bodies all ova da place! 36So Sennakerib, da Assyria king, broke camp, an go back Nineveh town, an stay ova dea.
37Lata, Sennakerib stay pray inside da temple fo his god Nisrok. Wen he go down in front Nisrok, his boys Adrammelek an Sharezer kill him wit dea swords. Den dey run away inside da Ararat land. An Sennakerib odda boy Esarhaddon come da nex king.