God Take Elijah Up Inside Da Sky
21Da time come fo Yahweh take up Elijah inside da sky inside one whirlwind. Az wen Elijah an Elisha stay leave Gilgal. 2Elijah tell Elisha, “You stay ova hea. Cuz Yahweh wen tell me fo go Bethel side.”
But Elisha tell, “Jalike I stay shua Yahweh stay alive an you stay alive, I shua dat I no goin leave you.” So dey go down Bethel side.
3All da guys Bethel side dat stay learn how fo talk fo God, come outa da town by Elisha. Dey tell Elisha, “You know Yahweh goin take away yoa boss Elijah from you today?”
Elisha tell, “Yeah, I know. But no need talk bout dis.”
4Den Elijah tell Elisha, “Elisha, you stay ova hea. Cuz Yahweh tell me now fo go Jericho side.”
Elisha tell, “Jalike I stay shua Yahweh stay alive an you stay alive, I shua dat I no goin leave you.” So dey go Jericho side.
5All da guys Jericho side dat stay learn how fo talk fo God, go by Elisha. Dey aks him, “You know Yahweh goin take away yoa boss Elijah from you today?”
Elisha tell, “Yeah, I know. But no talk notting bout dis.”
6Den Elijah tell Elisha, “You, stay ova hea. Cuz Yahweh tell me now fo go da Jordan Riva.”
An Elisha say, “Jalike I stay shua Yahweh stay alive an you stay alive, I shua dat I no goin leave you.” So da two guys wen hele on.
7Get fifty guys Jericho side dat stay learn how fo talk fo God, an dey go too. But dey stop, an no go nea da place wea Elijah an Elisha stay stand by da Jordan River, cuz dey like see wat goin happen. 8Elijah take off his robe, roll um up, an hit da watta wit um. Da watta open up to da right side an da lef side, an da two guys go da odda side on top da dry groun.
9Afta dey go da odda side, Elijah tell Elisha, “Befo Yahweh take me up inside da sky an away from you, tell me wat you like me do fo you.”
Elisha tell, “I like you give me two time mo powa inside my spirit den you get.” 10Elijah tell, “Dass real hard, wat you aks fo! But if you see me wen Yahweh take me up, you goin get mo plenny powa. But if you no see me, you no goin get um.”
11Wen dey stay walking an talking togedda, right den an dea one war wagon on fire an horses on fire show up, an make da two guys go apart. Den Elijah go up inside da sky inside one whirlwind. 12Elisha see wat wen happen, an he yell cuz he sore inside, “My fadda! My fadda! Az was da war wagon an da horse driva guys, all from Israel!” Elisha no see um no moa. Den he broke up his clotheses, an make two piece, fo show he stay sore inside.
13He pick up da robe dat wen fall down from Elijah, an go back da Jordan River, an stand up on da dry groun. 14Den he take da robe dat wen fall down from Elijah, an hit da watta wit um. He tell, “Yahweh, you stay by me, o wat? You da God Elijah wen pray to!” Wen Elisha hit da watta, da riva wen open up to da right side an da lef side, an he walk ova da odda side.
15All da guys from Jericho dat stay learn how fo talk fo God wen see dis. Dey tell, “Da same kine spirit dat wen stay in charge a Elijah, stay take ova Elisha awready!” An dey go meet him, an go down on top da groun in front him fo show respeck. 16Dey tell, “Look. Us guys stay yoa worka guys, an we get fifty strong guys hea. Try let um go an look fo yoa boss. Maybe da Spirit from Yahweh wen pick him up, an put him down on top one mountain, o inside one gulch.”
Elisha tell, “Nah. No need send dem.”
17Dey stay tell “But gotta make shua he no stay!” till Elisha come shame fo tell um no one mo time.
So he tell, “Kay den, let um go look.” An dey send fifty guys dat look fo three days, but dey no find Elijah. 18Elisha go stay inside Jericho town. Wen dey come back by him, he tell um, “I wen tell you guys no go.”
Elisha Make Da Watta Come Good
19One time, da Jericho guys tell Elisha, “Eh boss, our town stay one good place, jalike you can see. But da watta stay bad, an da land no can grow food notting.”
20Elisha tell, “Bring me one new bowl, an put salt inside um.” So dey bring um by him.
21Den he go out by da place wea da watta come outa da groun, an he throw da salt inside da watta. He tell, “Dis wat Yahweh tell: ‘I wen make dis watta come good. No goin make nobody mahke again. An da land goin start fo give plenny food.’-” 22So dis how da watta stay good till today, cuz a wat Elisha wen tell.
Da Young Guys Make Fun A Elisha
23From dea, Elisha go up Bethel town. Wen he stay walking, some young guys come outa dea town, an make fun a him. Dey tell, “No come ova hea, you bolohead!” 24He turn aroun, an look at dem, an he tell Yahweh put kahuna on top dem, cuz he Yahweh guy. Den two bears come out from da fores, an attack da young guys an hurt forty-two a dem. 25Den Elisha go on from dea Mount Carmel side, an from ova dea he go back Samaria town.