Dey Find Da Book Wit Da Rules
(2 Records 34:1-2, 8-28)
221Josiah was eight year ol wen he come king, an he stay king inside Jerusalem fo thirty-one year. His mudda, her name Jedidah, Adaiah girl from Bozkat. 2Da way Yahweh see Josiah, he do wat stay right, an stick wit eryting dat his ancesta David wen do. He no turn to da right o da lef side, he stay on da right track.
3Wen Josiah stay king fo eighteen year, he tell da secretary, Shafan, Azaliah boy an Meshullam grankid, fo go da Temple Fo Yahweh. He tell um: 4“Go talk to Hilkiah, da main pries guy. Tell him, get ready all da silva dat da peopo wen bring to da Temple Fo Yahweh, den turn um ova to da temple security guys. 5Tell da pries guys fo give da silva to da luna guys dey wen pick fo take care da Temple Fo Yahweh. An tell um fo use da silva fo pay da worka guys dat work on da Temple, dat stay fix da places wea stay broke. 6Dass fo da carpenta guys, da construction guys, an da guys dat work wit da stone, an fo buy wood an cut stone so can fix da Temple. 7But da luna guys no need write down wat dey use all da silva us guys give um, cuz dey good workas, an we trus um.”
Hilkiah Find Da Rules
8Lata, Hilkiah, da main pries guy, tell Shafan da secretary, “I wen find da Book Wit Da Rules, inside da Temple Fo Yahweh!” An he give um to Shafan, an Shafan wen read um.
9Den Shafan go by da king, an tell him bout da work. He tell um: “Yoa leada guys wen turn ova all da silva dat get inside da Temple Fo Yahweh, so da luna guys dat work inside da Temple, use um.” 10Den Shafan tell da king, “An one mo ting. I get one book, dat Hilkiah da pries guy wen give me.” An Shafan read um in front da king.
11Wen da king hear wat da Book Wit Da Rules tell, he broke his clotheses fo show he stay sore inside. 12Den King Josiah tell Hilkiah da pries guy, Ahikam Shafan boy, Akor Micaiah boy, Shafan da secretary, an Asaiah his worka guy, wat dey gotta do: 13He tell um: “Go find out from Yahweh, wat stay inside dis book dat dey wen find. Find out fo me, an fo da peopo hea, an fo all da Judah peopo. Fo shua, Yahweh stay real huhu wit us guys! Cuz our ancesta guys neva lissen wat dis book tell. Dey neva do wat dis book tell bout us guys!”
14Hilkiah, da pries guy, Ahikam, Akor, Shafan, an Asaiah go fo talk to one wahine, Huldah, dat talk fo God. (Her husban, Shallum, Tikvah boy. His granfadda, da Harhas dat befo time take care da palace clotheses. She live inside Jerusalem, in da districk numba two.)
15Huldah tell um, “Dis wat da message from Yahweh, da God fo da Israel peopo! Tell da guy dat wen tell you come by me, 16‘Dis da message from Yahweh: Me, I da One goin make real bad kine stuff happen all ova dis place, an to all da peopo dat live hea. I goin make eryting happen dat stay tell inside da book dat da Judah king wen read. 17Dis peopo wen go way from me, Yahweh. Dey burn incense fo odda gods. Dey make me come real sore inside cuz a all da idol kine gods dey wen make. Az how come I goin come huhu wit dis place, jalike I goin start one fire an nobody can pio um!’ 18An tell dis odda ting too, to da Judah king, da one dat send you guys fo find out from me wass goin happen, ‘Dis wat Yahweh, da God fo da Israel peopo, tell bout da stuff you wen hear: 19I Yahweh! Josiah, I know you stay sorry, an you no ack big in front me. An you hear wat I wen tell bout dis place an bout da peopo dat live hea -- dat I goin wipe um out, so odda peopo goin talk bout dis place wen dey like put kahuna on top somebody. An I know you wen broke yoa clotheses, an cry in front me. Az why I wen lissen an hear you. Dis wat me, Yahweh, tell. 20Az why bumbye, wen you mahke, dis wat I goin do: I goin let yoa peopo bury you wit yoa ancesta guys, an eryting goin stay okay. You no goin see all da bad kine stuff dat I goin make happen to dis place.’-”
So dey go back, an tell da king wat Huldah, da wahine dat talk fo God, wen tell.