No Mo Food Inside Samaria
71Elisha tell, “You guys, lissen up, wat Yahweh tell. Dis, da message from Yahweh: ‘Bout dis time tomorra, seven quart a da bestes kine wheat flour goin cost ony half ounce silva by da Samaria town gate. An fourteen quart a barley goin cost ony half ounce silva too.’-”
2Da officer dat come wit da Israel king tell Elisha, da guy dat stay tight wit God, “Wot! You tink Yahweh goin open up windows inside da sky an make food come down jalike rain?! No way!”
Elisha tell da officer guy, “Fo shua, you goin see um happen wit yoa own eyes, jalike I wen tell. But you, you no goin eat notting from dat!”
Da Trouble Pau
3Da same time, had four guys wit one kine sick all ova da skin dat odda guys can catch. Dey stay outside da gate fo go inside Samaria town. Dey tell, “Eh! No good, we stay hea till we mahke! 4If we go inside Samaria town, no mo food inside dea, so we goin mahke dea. An if we stay hea, we goin mahke too. So, we go ova dea by da camp fo da Aram army guys, an give up. If dey let us stay alive, den we stay alive. If dey kill us, den we mahke.”
5Wen start fo come dark, dey stan up fo go by da Aram camp. Wen dey come jus outside da camp, dey no see nobody ova dea! 6Az cuz da same time da sick guys leave Samaria town, da Boss wen make da Aram army guys hear plenny noise from plenny war wagons an horses, an one big army. Da army guys tell each odda, “Eh! Da Israel king wen pay da kings fo da Het peopo an da Egypt peopo fo come attack us guys!” 7So befo come real dark, dey all get up an run away. Dey leave dea tents, horses, an donkeys right dea, da whole camp. Dey run fast fo stay alive.
8Da guys dat get da kine sick all ova da skin dat odda guys can catch, dey come da edge a da camp, an go inside one tent. Dey eat an drink, an carry away da silva, da gold, an da clotheses from dea. Den dey go hide da stuff. Dey come back, go inside anodda tent, carry away mo stuff, an hide dat too.
9Den dey tell each odda, “Wat us guys stay do, az not right! Dis, da time fo tell oua peopo all dis good stuff, an we no stay tell um. Us no can wait till da light come, cuz den us get da blame fo no tell notting! Mo betta we go right now, an tell da guys inside da king's palace wat we wen see.”
10So dey go yell to da guys dat watch da gates, an tell dem, “We wen go by da Aram camp. An you know wat?! No mo nobody stay ova dea! No can hear nobody talking. Ony get da horses an donkeys dat dey wen tie up. An da tents stay jalike dey wen leave um.” 11Da guys dat watch da gates yell wat da guys wit da skin kine sick wen tell, an somebody tell da peopo inside da king's palace.
12Da king hear dis an get up nite time. He tell his officer guys, “I goin tell you wat da Aram guys stay do to us. Dey know we no mo food, so dey leave dea camp an dey hiding inside da country side. Dey tink, ‘Fo shua da Samaria guys goin come outside da town, an den, we can grab um wen dey stay alive, an go inside dea big town.’-”
13One a da officer guys tell, “Tell some guys fo take five a da horses dat stay inside da town still yet. Maybe dey not goin mahke! At least, all da odda Israel army guys dat stay hea, not goin mahke. An maybe da guys we send get wipe out, jalike all da odda Israel army guys dat still stay hea, goin get wipe out. So we go send dem fo find out wat wen happen.”
14So dey pick two war wagon wit horse, an da king send dem afta da Aram army guys. He tell da guys dat stay in charge da war wagons, “Go find out wat wen happen!” 15Dey go afta da Aram army guys all da way by da Jordan River. Dey see dat all ova da road, get da Aram guys clotheses an stuffs all ova da place dat da Aram guys wen throw way wen dey come scared an run away! So da messenja guys come back an tell da king. 16Den da Samaria peopo go out an rip off da stuffs from da Aram army camp. So seven quart a da bestes kine flour cost ony half ounce silva, an fourteen quart barley cost ony half ounce silva too, jalike Yahweh wen tell.
17Da king wen put da officer dat come wit him in charge a da town gate, but da peopo no care. Dey run outa da town an knock down da officer, walk ova him, an he mahke, jalike Elisha, da guy dat stay tight wit God, wen tell wen da king go by Elisha.
18All dis wen happen jalike Elisha, da guy dat stay tight wit God, wen tell da king, “Dis same time tomorra, fourteen quart a barley goin cost ony half ounce a silva, an seven quart a da bestes kine flour goin cost ony half ounce a silva too, by da Samaria town gate.”
19Da officer wen tell Elisha, da guy dat stay tight wit God, “You tink Yahweh goin open up windows inside da sky an make food come down jalike rain?! No way!” An Elisha tell da officer guy, “You goin see um happen wit yoa own eyes, jalike I wen tell. But you, you no goin eat notting from dat!” 20An az jus wat wen happen fo da officer guy, cuz da peopo walk all ova him inside da gate, an he mahke.