101Dis, da names dey wen write on top da paypa dat get da govmen wax kine seal:
Govna Nehemiah, Hakaliah boy, an Zedekiah.
2Da pries guys Seraiah, Azariah, Jeremiah, 3Pash-hur, Amariah, Malkijah, 4Hattush, Shebaniah, Malluk, 5Harim, Meremot, Obadiah, 6Daniel, Ginneton, Baruk, 7Meshullam, Abijah, Mijamin, 8Ma`aziah, Bilgai, Shemaiah. Dis da pries guys.
9Da Levi ohana guys: Jeshua Azaniah boy, Binnui from da Henadad ohana, Kadmiel, 10an da ones dat stay work wit dem Shebaniah, Hodiah, Kelita, Pelaiah, Hanan, 11Mika, Rehob, Hashabiah, 12Zakkur, Sherabiah, da odda Shebaniah, 13anodda Hodiah, Bani, an Beninu.
14Da leada guys fo da peopo: Parosh, Pahat-Moab, Elam, Zattu, da odda Bani, 15Bunni, Azgad, Bebai, 16Adonijah, Bigvai, Adin, 17Ater, Hezekiah, Azzur, 18da odda Hodiah, Hashum, Bezai, 19Harif, Anatot, Nebai, 20Magpiash, Meshullam, Hezir, 21Meshezabel, Zadok, Jaddua, 22Pelatiah, Hanan, Anaiah, 23Hoshea, Hananiah, Hasshub, 24Hallohesh, Pilha, Shobek, 25Rehum, Hashabnah, Maaseiah, 26Ahiah, Hanan, Anan, 27Malluk, Harim, an Baanah.
Wat Da Paypa Say
28“All da odda Israel peopo too -- da pries guys, da Levi ohana guys, da security guards fo da Temple, da music guys, da guys dat stay work inside da Temple, an all da odda peopo dat no stay stick wit da diffren peopos inside da odda lands, so we can stay stick wit da Rules From God, us an oua wifes an kids, erybody dat know an undastan wass happening -- 29togedda wit oua bruddas an sistas an dea leada guys, we all stay okay bout living da way da Rules From God tell. We make strong promise an aks God fo do bad tings to us if we no live dat way! Cuz God wen give his worka guy Moses his Rules fo give um to us guys, so we can do eryting dat oua boss Yahweh tell us we gotta do, an all da odda tings he tell cuz he da Judge.
30“Dat mean, we no goin give oua girls to da guys from dis land fo marry, an we no goin get dea wahines fo oua boys marry.
31“Da Res Day, if da peopo dat stay dis land bring stuff fo sell, wheat o watevas, us guys no goin buy um from dem, no matta da Res Day o da odda days dat stay spesho fo God. Ery seven year, we no goin use da land an da stuff dat stay grow inside oua fields, an we goin pay off all da money we owe.
32“We give ouaself da job fo erybody pay part a one piece silva ery year fo da Temple Wea Oua God Stay, fo do da work dea. 33Da silva, stay fo pay fo da breads dey put in rows on top da table inside da Temple, an da wheat flour dey give fo make sacrifice, an fo buy da animals dey burn up ery day fo make sacrifice, an fo da spesho kine sacrifices fo da Res Day ery week an ery month, an da sacrifices fo da spesho times wen erybody come togedda, an fo pay fo da gifs dat stay spesho fo God, an fo pay fo da sacrifices dey make wen da Israel peopo do someting bad an dey donno dey doing um, but gotta make um right, an fo pay fo all da work us guys gotta do fo da Temple Fo Oua God.
34“We wen pull name fo pick wen da pries guys goin work, an da Levi ohana guys too, an fo pick wat time ery year da regular ohanas goin go bring wood fo burn on top da altar fo make sacrifice to oua God Yahweh, jalike stay write inside da Rules.
35“Us guys make promise fo bring da bestes stuff dat grow on top oua land ery year, and da bestes fruits from ery tree, fo da Temple Wea Yahweh Stay. 36We goin bring oua numba one boy an da firs animal dat born from oua animals, jalike stay write inside da Rules from God. We goin bring da firs animals dat born from ery cow an sheep and goat, to da Temple Wea Oua God Stay, an give um to da pries guys dat stay work dea inside da Temple Fo Oua God. 37Us guys goin bring da bestes stuff we get -- flour fo make bread, da money we goin give, da fruits from all da trees, da wine an olive oil. We goin bring um by da pries guys, an put um inside da store rooms inside da Temple fo oua God. We goin give ten percen from all da stuff dat grow on top oua land fo da guys from da Levi ohana, cuz az da Levi guys dat get da right fo use all da ten percen from da small towns wea dey work. 38Wen da guys from da Levi ohana go fo pick up da ten percen from erybody, da main pries guy, dat get Aaron fo ancesta, he goin go wit dem. Den, from all da ten percen dat da Levi guys pick up, dey goin bring ten percen a all dat to da Temple fo oua God, an put um inside da store rooms ova dea. 39Cuz da Levi ohana peopo an all da odda Israel peopo goin bring da tings dey like give to God: wheat, an wine, an olive oil. Dey goin bring um ova dea an put um inside da store rooms wea dey keep da bowls an tings fo da Place Dat Stay Spesho Fo God. Dass wea da pries guys do dea work, an da security guards fo da Temple stay, an da music guys, same place.
“Us guys no goin foget do all dat fo da Temple Fo Oua God.”