Da King Send Nehemiah Judah Side
21April, da numba 20 year dat Artaxerxes stay king, I bring da wine fo da King. Befo dat time, wen I bring da wine, I neva was sad in front da King. 2So da King tell me, “Eh! How come yoa face stay look sad?! Fo shua, you no goin get sick, yeah? Gotta be, you stay sad inside.”
Me, I come real scared. 3But I tell da King, “You da King, an I like you stay live foeva! But how I can stand hea an no stay sad?! Cuz da big town wea my ancesta guys stay bury, stay all bus up. Da main gates fo da town, all burn down.
4Da King aks me, “Wat you like me do?”
I wen pray to da God Dat Stay Inside Da Sky. 5Den I tell da King, “You da King, an you my boss. I like you send me ova dea Judah side, da town wea my ancesta guys stay bury, fo build up da town one mo time. But ony if you tink az good, an if you tink I okay fo do um.
6Da King aks me (wit da Queen sitting nex to him too), “So. How long you goin stay ova dea, an wat time you goin come back hea?”
Wen he aks me dat, I know he tink az one good idea fo send me ova dea. I tell um wat time I goin come back. 7Den I tell da King, “If you tink az good, tell yoa guys fo write lettas fo me to da territorial govna guys fo da districks Wes Eufrates Side. Dis, so dat dey let me go thru dea districk fo go Judah side. 8An I need one letta fo Asaf, da guy dat take care da park wit plenny trees ova dea fo da King, fo him give me da wood fo make da beams ova da gates fo da towa, an fo da walls aroun da town, an fo da house wea I goin stay.”
Da King give me wat I aks him fo, cuz God wen put his good hand on top me an help me.
9I wen go by da govna guys fo da districks dat stay on da wes side a da Eufrates Riva, an I give um da lettas from da King. Da King wen send officer guys from da army, and army guys wit horses, fo go wit me.
10But wen Sanballat da Horon guy an his helpa Tobiah da Ammon guy wen find out, dey come real huhu, cuz somebody goin come ova dea fo do someting good fo da Israel peopo.
Nehemiah Check Out Da Wall
11So I wen come to Jerusalem an stay dea three days. 12Den nite time, I wen get up, me an some odda guys wit me. I neva tell nobody wat God was telling me fo do fo Jerusalem. Da ony animal I wen take was da one I stay ride on. 13So I go out nite time from da Valley Gate, an ova dea wea can see da Dragon's Puka Fo Watta, den I go to da Rubbish Gate. I wen check out da Jerusalem town walls dat stay all bus up, an da town gates dat stay burn down. 14From dea, I pass by da Watta Gate to da King's Watta Place. But den, no mo room by da place wea da animal I stay ride can go. 15So I go up da valley by da stream in da dark an I check out da wall ova dea. Den I turn aroun an go back. I go inside Jerusalem thru da Valley Gate, an go home my place.
Da Peopo Say Dey Goin Build Da Wall One Mo Time
16Da govmen guys, dey donno wea I wen go o wat I stay do. I neva tell nobody yet, not da Jewish peopo, o da prieses, o da ali`i guys, o da govmen guys, o da odda peopo dat goin do da work bumbye. 17But latas, I tell all da guys, “You guys, you see da trouble we get. Jerusalem town, stay all bus up. Da town gates, all burn up. Eh you guys! We gotta do someting! We go build da Jerusalem town wall again. Shame, dis! Den wen we pau, no mo shame!” 18I tell da leada guys da story, how God wen put his good hand on top me an help me. I tell um too, wat da King wen tell me.
Dey tell, “We gotta do um, den! We gotta start fo build da wall!” An dey all make ready fo do good job.
19But wen Sanballat da Horon guy, his helpa Tobiah da Ammon guy, an Geshem da Arab guy wen find out, dey make fun a us guys, an talk stink bout us. Dey tell, “Wass up?! Wat you guys doing?! You guys stay go agains da King, o wat?”
20Right dea I tell um, “Da God Dat Stay Inside Da Sky, he goin make eryting come okay fo us guys. We work fo him. Az why us guys goin start fo build da wall. You guys no goin do notting, cuz not yoa kuleana. Yoa peopo no mo say wit Jerusalem town from befo time, but dis da town dat oua ancesta guys come from.”