Octoba time, all da Israel peopo stay live inside dea towns now. 81An all da peopo come togedda inside da open place inside da Watta Gate. Ezra, he da pries guy dat stay teach da Rules From God. Dey tell him fo bring da book dat get da Rules from Moses. Dass da Rules dat Yahweh wen give da Israel peopo long time ago.
2-5Was Octoba 8. Da peopo wen build one wood stage fo Ezra. All da guys an wahines, an all da kids dat can undastan, dey stay dea fo lissen good. Da pries guy Ezra bring da book wit da Rules in front dem. He stand on top da stage by da open place inside da Watta Gate. On da right side had Mattitiah, Shema, Anaiah, Uriah, Hilkiah, an Maaseiah. Da left side had Pedaiah, Mishael, Malkijah, Hashum, Hash-Baddanah, Zekariah, an Meshullam.
Den Ezra open da book. All da peopo can see him, cuz he stay stand up dea on top da stage. So wen he open da book, erybody stand up. Ezra start fo read da Rules to dem early morning time, an he stay read till noon time.
6Den Ezra talk to Yahweh, da awesome God. Ezra tell God “Mahalo,” cuz he do all kine good tings fo da peopo. All da peopo put up dea hands an tell, “Dass it!” Den dey go down wit dea face on top da groun fo show love an respeck fo God.
7Had guys from da Levi ohana ova dea. Da peopo stay standing dea, an da Levi guys help um undastan wat da Rules mean. Da Levi teacha guys was Jeshua, Bani, Sherebiah, Jamin, Akkub, Shabbetai, Hodiah, Maaseiah, Kelita, Azariah, Jozabad, Hanan, an Pelaiah. 8Dey read from da book dat get da Rules from God inside, an dey tell wat eryting mean. Dey make shua dat erybody undastan wat dey stay read to dem.
9Den Govna Nehemiah, an da pries guy Ezra dat stay teach da Rules, an da Levi ohana guys dat stay help da peopo fo undastan, dey all tell da peopo, “No cry!” Cuz all da peopo, dey stay crying wen dey hear wat da Rules tell. “Dis one day dat stay spesho fo Yahweh, da God you guys pray to!”
10Nehemiah tell da peopo, “You go now. Go eat fancy kine food an drink sweet kine wine. Send some food to da peopo dat neva get notting ready fo eat. Cuz dis day, you know, real spesho fo oua Boss! No stay sore inside. Cuz Yahweh make you guys feel good inside, an az why you strong.”
11Jalike Nehemiah, da guys from da Levi ohana stay telling all da peopo, “No need dey make big noise! Cuz today one spesho day! No go stay sore inside!” 12Den all da peopo go from dea, fo eat an drink an send food to odda peopo, an fo stay feel real good inside. Cuz now dey undastan da tings da leada guys wen teach dem.
Da Spesho Religious Time Fo Stay Inside Shacks
13Octoba 9, da main guys fo all da ohanas, da pries guys, and da Levi ohana guys wen go togedda by Ezra, cuz dey like know wat da Rules tell mo betta. 14Dey find inside da Rules wea Yahweh tell Moses, dat Octoba da time fo da Israel peopo go make shacks an live inside dem, fo dis spesho religious time. 15Dey suppose to tell da peopo aroun all da towns an all ova Jerusalem, fo make shua erybody know dey suppose to go up country, an bring back plenny branch from da olive tree, an da wild olive, da myrtle, da date palm trees, an odda trees dat get plenny leaf fo make shacks, jalike stay write down inside da Rules.
16So da peopo go out an bring back all kine tree branch. Dey make small shacks on top dea flat roof house, o inside dea yard, o inside da yard aroun God's Temple. Odda peopo make dea shacks inside da open places by da Watta Gate an da Efraim Gate. 17All da peopo dat wen come back from Babylon, dey wen make shack an live inside one week, an erybody stay feel good inside bout dat. Cuz from Joshua time (az Nun's boy), till den, da Israel peopo neva make dat kine spesho religious time. 18Ery day, from Day Numba One to Day Numba Seven, Ezra read to dem someting from da book dat get da Rules from God. Den, Octoba 15, dey all come togedda an make one mo spesho religious day, jalike God wen tell um.