One Branch From David's Ohana
(Efesus 6:14-15, 17; 2 Thessalonika 2:8; 1 Peter 4:14)
111Somebody goin come from da Jesse ohana
Jalike one shoot grow up from one tree stump.
2Yahweh's Spirit goin stay in charge dat guy.
Dat Spirit from Yahweh goin make him know wat fo do erytime,
An make him undastan plenny stuff.
Dat Spirit goin make him
Wea he can tell odda peopo wass good fo dem,
An he no goin be scared a nobody.
Dat Spirit goin help him know plenny stuff,
An get respeck fo Yahweh.
3Cuz he get dat kine respeck fo Yahweh,
He goin feel good inside,
Jalike he smell da sweet air.
He da judge,
But he no goin ony look, o lissen how peopo talk,
An den make up his mind.
4Dass why he make one good judge
Fo da peopo dat no mo notting.
Wen dis judge make up his mind,
He goin do da right ting fo da peopo all ova da world
Dat no tink dey numba one.
Da stuff he tell cuz he da judge,
Dat goin bus up peopo all ova da world,
An wipe out da ones dat do bad kine stuff.
5He goin stay ready fo make war agains da bad kine stuff.
He goin be strong, cuz he do da right tings erytime,
An you can trus him erytime.

6Dat time, goin be jalike
Da wild dog goin stay wit da bebe sheep,
Da leopard goin lay down wit da bebe goat,
Da bebe cow, da lion, an da fat cow goin stay togedda,
An goin get one small boy show dem all wea fo go.
7Da cow an da bear goin eat grass same place togedda.
Dea bebes goin lay down togedda.
Da lion goin eat dry grass jalike da cows.
8Da bebe goin tink az good fun fo play
On top da hole dat get snake inside dat can kill dem.
Da small kids goin put dea hand inside da hole fo try catch um,
But da snake no goin like kill nobody.
9All ova da mountain dat stay spesho fo me,
Nobody goin hurt o wipe out nobody.
Cuz all ova da world, erybody goin know me, Yahweh,
Jalike all ova da sea, da watta stay cova eryting.
Some Israel And Judah Peopo Goin Come Back
(Rome 15:12)
10Dat time, dis wat goin happen: Goin get one new king coming. He goin get King David blood, jalike David fadda ohana da root fo him, an he da shoot. Dat king, goin be dea jalike one flag, so all da diffren peopos goin know he dea, so all da diffren peopos goin know fo go by him. Peopo inside all da countries goin aks him wat fo do. An da place he goin live, goin be awesome.
11One nodda ting goin happen dat time: My Boss Yahweh goin go bring back all his peopo dat still yet stay alive, from Assyria, Egypt, Sout Egypt, Sudan, Wes Iran, Babylonia, Nort Syria, an da islands.

12He goin hold up one flag so all da peopos know wea fo come.
He goin bring togedda all da peopo
Dat da odda kings wen throw outa da Israel land,
An da Judah guys from far place all ova da world.
13Den da Efraim ohana guys no goin get jealous
A da Judah guys no moa.
An da Judah ohana guys
No goin give da Efraim guys hard time no moa.
14Togedda dey goin rush da Filisha peopo on da west side,
All da way to da sea,
An steal stuff from peopo on da east side.
Dey goin take ova da Edom peopo an da Moab peopo
An da Ammon peopo gotta do wat dey tell um.

15Yahweh goin wipe out
Da skinny part a da Red Sea, Egypt side.
He goin put out his hand ova da Eufrates Riva
An bring one real hot strong wind,
Fo make um come seven small stream,
So peopo can go walk on top da dry part wit slippa.
16Goin get one big wide easy road
Fo God's peopo dat still yet stay alive,
An dat neva mahke inside Assyria,
Jalike da time da Israel peopo wen come outa Egypt.
We Sing Mahalo Fo Yahweh
Sing Fo Tell Yahweh He Da Greates!