Da Moab Peopo Give Baby Sheeps
161You guys dat stay in charge a da Moab land,
Inside Sela town, nex to da boonies,
Give baby sheeps to Jerusalem,
Fo gif, fo show you an dem stay da same side.
Take um to Zion Hill, Jerusalem side.
2Da Moab wahines dat run away
Fo go cross ova da Arnon Stream,
Dey goin hang aroun dea an donno wea fo go,
Jalike wen somebody throw da baby birds outa dea nest.
3Dey like tell da Judah leada guys:
“Make like one judge
An tell us guys wat fo do!
Noon time, wen da sun stay high,
Make yoa shadow dark jalike nite time,
Fo hide us guys dat stay run away,
An no let nobody know wea we stay!
4Let us Moab peopo dat no mo place fo stay
Make house wit you guys.
Be da place so us guys can hide dea
So da guys dat like wipe us out no can find us!”

Cuz bumbye, no goin get da guys dat bus up you guys inside yoa land.
Dat all goin pau.
5Dat time, goin get one new king
Dat goin stay tight wit his peopo.
Dat king, goin come from King David's ohana,
An da peopo goin trus him.
He goin be da judge,
An he goin work hard fo judge erybody da right way.
He no goin wase time notting
Fo make shua eryting dat happen, stay right.

6We wen hear dat da Moab peopo get real big head.
Dey plenny high nose.
Dey go any place dey like.
But all dea big kine talk,
Az not true, an no mean notting!
7Auwe! Ass why da Moab peopo
Cry an yell togedda fo dea country.
Dey make noise an cry,
Cuz no mo da raisin candy from Kir-Hereset.
Ony get bus up peopo ova dea.
8Da grape fields Heshbon side
An da grape plants Sibmah side
Stay all dry up.
Da leadas a da diffren countries
Wen tell dea army guys
Fo go smash down da red grape plant.
Befo time, had grape farm all da way to Jazer,
An da shoots from da vine go [out] all ova da place,
To da boonies an all da way down
To da odda side a da sea.
9Dass why I stay cry plenny
Da same way da Jazer peopo cry
Fo da grape plants Sibmah side.
I cry mo plenny
Fo da Heshbon an Elealeh peopo.
Befo time, wen da Moab peopo bring dea summer fruit
An cut da wheat,
Erybody yell plenny,
Cuz dey feel good inside.
But now, da peopo no yell dat way no moa
Cuz no mo notting fo cut.
10Nobody stay feel good inside
Nobody dance an sing
Inside da farms an fields,
Cuz no mo grapes fo make wine.
I make um so no mo party ova dea.

11Dass why I stay cry inside fo da Moab peopo
Eryting inside me stay crying,
Jalike one sad song you play wit da harp.
How I tink an how I feel,
I feel real sore inside fo da Kir-Hareset peopo.

12Bumbye, no matta da Moab peopo go up
Da sacrifice places fo dea gods on top da hills,
An no matta dey work plenny hard an stay tired
Fo go pray inside da temple dat stay spesho fo dea gods,
All dat, no goin do notting fo dem!
13Dass wat Yahweh tell bout da Moab peopo long time ago. 14An now Yahweh tell dis too: “Da Moab peopo, get choke plenny a dem, an dey awesome. But ony three year from today, jalike da day one work contrack pau, nobody goin tink da Moab peopo stay awesome. Cuz dat time, ony goin get litto bit Moab peopo inside dea. All da odda Moab peopo, gone awready! Da ones dat stay back, dey no can do notting, cuz dey no mo powa.”