Wat God Tell Isaiah Bout Egypt
191Me, Isaiah, I get heavy kine stuff fo tell bout wat I see goin happen to da Egypt peopo:
Yahweh stay coming Egypt side,
Jalike he stay ride on top one cloud.
Da idol kine gods da Egypt peopo pray to
Stay shake in front him.
Da Egypt peopo stay plenny scared
An no can tink good.
qal: swift-moving
2God tell: “I goin make da Egypt peopo go agains each odda.
One brudda goin fight his own brudda.
One guy goin fight his own friends.
Da peopo inside one big town goin fight
Da peopo inside anodda big town.
One king guys goin fight anodda king guys.
3Da peopo inside Egypt goin lose fight.
Dey make plan, but I goin mess up da plan.
Dey goin go aks dea idol kine gods,
An da mahke peopo spirits.
Dey goin aks da kahuna guys an wahines wat fo do.
4I goin turn ova da Egypt peopo
To one mean boss.
One strong king goin take charge a dem.”
Dat word come strait from Yahweh Da Boss, Da God Ova All Da Armies!

5Da Nile Riva watta no goin be nuff
Fo cova da Egypt land jalike one sea.
Da place wea da riva watta go, goin stay all dry,
No mo wet place.
6All da watta canal goin come stink.
Da streams wea da Nile Riva split up goin come mo an mo dry.
Da bamboo an da watta plants ova dea goin come rotten.
7No goin get plants on da side a da Nile Riva
An wea da riva go inside da sea.
Da fields dey wen plant by da Nile Riva
Goin all come dry an blow away,
So no mo notting dea.
8Da fisha guys goin moan an get sad face.
All da guys dat try catch fish in da Nile Riva
Wit hook an net, dey goin stay sad.
9Da guys dat make ready da flax plants
Fo make linen thread
An da guys dat weave da white cotton,
Dey goin stay bum out.
10All da stuff dat stay da mos importan fo da Egypt land
Goin all come no good.
All da peopo dat work fo pay,
Dey feel real sore inside.

11Fo shua, da leada guys fo Zoan town, Egypt side,
Dey stupid kine peopo wit attitude!
An da mos smart guys,
Dey suppose to tell da Pharaoh guy, dea king,
Wat fo do,
But dey ony tell um stupid kine stuff fo do.
So! How you guys goin tell da Pharaoh guy,
“Oua ancesta guys,
Dey was smart guys dat know wat fo do erytime,
An dey was kings from befo time”?!
No way you guys can tell him dat!

12So! Wea yoa smart guys stay now,
Da ones dat erytime know wat fo do?!
Let dem tell you wat Yahweh's plan,
Wat Yahweh, Da God Ova All Da Armies,
Goin do agains Egypt.
13Da leada guys fo Zoan town,
Dey go do stupid kine tings cuz dey no undastan.
Da leadas fo Memphis, az da main Egypt town, somebody wen bulai dem.
Da leadas fo da Egypt ohanas wen make dea peopo go da wrong way.
14Yahweh, him da one wen make da Egypt peopo
So dey no can tink strait.
Cuz a Yahweh, da leada guys make dea peopo
Go da wrong way bout eryting dey stay do.
Da Egypt peopo, dey jalike one drunk guy
Dat stay fall all ova, even in his puke.
15Da Egypt peopo no goin can work notting,
No matta dey rich o no mo notting,
O dey importan o nobody know who dem.
16Dat time, da Egypt peopo goin come jalike da wahines. Dey stay scared an shaking, wen dey see dat Yahweh, Da God Ova All Da Armies, put up his hand an shake um cuz he goin wack um. 17Anyting dat come from da Judah land, goin scare da Egypt peopo plenny. Weneva somebody tell dem bout da Judah land, dey goin come real scared cuz a wat dey know, wat Yahweh, Da God Ova All Da Armies, stay plan fo do agains dem.
Bumbye, God Goin Do Good Tings Fo Da Egypt, Assyria, An Israel Peopos
18-22So. Afta Yahweh goin make da Egypt peopo come real sick, den he goin make um come good. Den dey goin come back to Yahweh, an wen dey aks him fo help um, he goin make um come good. Dat time, goin get five towns Egypt side wea da peopo talk da Hebrew language. Da peopo inside dose towns, goin make strong promise fo stick wit Yahweh, Da God Ova All Da Armies. But one town goin get da name “Da Town Dat All Bus Up.”
Dat time, goin get one altar fo make sacrifice fo Yahweh inside da middo a da Egypt land, an one big stand up stone fo rememba Yahweh, da end a da Egypt land. Da altar an da stand up stone goin be jalike one sign, dat tell peopo ova an ova inside Egypt bout Yahweh, Da God Ova All Da Armies. Weneva da peopo dea call Yahweh cuz odda peopo making dem suffa, Yahweh goin send one guy fo help get dem outa trouble. Yahweh goin let da Egypt peopo know who him, an wen he do dat, dey goin know Yahweh fo real kine. Dey goin make sacrifice an give wheat o barley gif fo him, cuz now dey get Yahweh fo dea boss. Dey goin make strong promise to him an den do wat dey promise fo do.
23Dat time, goin get one big road go from Egypt to Assyria. Da Assyria peopo goin go Egypt side, an da Egypt peopo goin go Assyria side. An dey goin work togedda, fo Yahweh.
24Dat time da Israel peopo goin make one deal wit da Assyria peopo an da Egypt peopo, da three a dem togedda. Cuz dey come togedda, real good stuff goin happen fo all da peopo in da world. 25Cuz Yahweh, Da God Ova All Da Armies, he goin do good stuff fo all a dem. He goin say, “I goin make good stuff happen to my peopo, da Egypt peopo, an to da Assyria peopo dat I wen make, an to da Israel peopo dat goin be mines foeva!”