God Goin Get Da Israel Peopo Outa Trouble
(Rome 11:26-27)
271Dat time, Yahweh goin go afta
Da peopos dat donno him, fo punish dem.
He goin wack um wit his sword,
Da real big an strong sword,
An ack mean to dem,
Cuz he get mo power den dem,
An can wipe um out,
Jalike fo go afta da dragon Leviatan,
Dat move an turn jalike one snake fo run away,
An kill da sea monsta.

2Dat time, all you guys, sing!
Sing bout da grape farm
Dat give plenny fruit,
An make peopo stay feel good inside
Wen dey go dea.
3Yahweh tell, “Me, Yahweh, I da One
Stay take care my peopo,
Jalike da guy dat stay watch da grape plants
An give um watta all da time.
I take care my peopo, day time an nite time,
Fo make shua nobody mess um up.
4I pau huhu wit my peopo.
Now, da ony ting I like fight
Is da thorns an stickas
Dat come up inside da grape farm.
I like burn up all a dem!
5But even da thorn an sticka kine peopo,
Dey can come tight wit me
An let me take care dem too.
Dass how dey no need fight wit me no moa,
Cuz eryting goin come good wit me an dem.”

6Bumbye, da Jacob ohana
(Dass da Israel peopo),
Dey goin come importan.
Dey goin come plenny peopo,
Jalike one plant dat get root fo grow,
Den get bud an flower,
An fill up da whole world
Wit plenny fruit.

7Da time Yahweh wen bus up da Israel peopo,
You tink he hit um mo hard,
Den wen he bus up da odda peopo
Dat wen bus up da Israel peopo?
No way!
Da time he wen wipe out da Israel peopo,
You tink he wipe um out mo plenny,
Den wen he wipe out da odda peopo
Dat wen wipe out dem?
Not even!
8God, you give da Israel peopo presha,
But ony litto bit, wen you make dem leave dea land.
You make da Israel peopo go away
Jalike wit one strong wind from da east side.

9Dass wat God goin do fo pay da price,
Fo hemo da shame from da Jacob ohana.
Dass wat goin happen
Wen God throw out all da bad kine stuff dey wen do.
Den, God goin make all da stones
Inside da altars fo da odda gods
Come jalike chalk wen somebody smash um.
Da poses wea dey pray to da wahine god Asherah
An da altars wea dey burn da incense fo da odda gods,
Dey no goin stay stand dea no moa.
10Da big town dat get strong wall
Wea nobody can come inside,
Nobody stay dea.
Jalike da boonies, ony da cows stay dea.
Da peopo, all gone awready.
Get small cows eating grass dea.
Dey eat all da stuff from da tree branches.
Den dey lay down ova dea.
11Da Israel peopo, dey jalike small branches
From da trees dat come dry an dey broke.
Da wahines come take um fo make fire.
Az cuz da Israel peopo, dey not da kine peopo
Dat undastan stuff,
Dass why God who wen make dem
No feel pity fo dem.
He no like do notting fo dem.

12Dat time, Yahweh goin pick his peopo
Jalike wen peopo wack da wheat o barley dey wen cut
Fo get da good wheat one side an da junks da odda side.
He goin take you Israel peopo, one by one,
An bring you togedda, Jerusalem side,
Even from da big Eufrates River
An from da stream dass da border fo da Egypt land.
13Dat time, one big sheep horn trumpet goin blow.
Da Israel peopo dat stay go all ova da place inside Assyria
An da ones dey wen make go Egypt side,
Dey all goin go God's spesho hill inside Jerusalem town,
An go down in front Yahweh
Fo show love an respeck fo him ova dea.