Yahweh Da Boss, Da Judge Fo Da Judah Peopo
31Den Isaiah tell,
“Look! Yahweh, Da God Ova All Da Armies,
He goin take away all da stuff
From da peopo inside Jerusalem an Judah,
All da stuff dey need fo take care dem,
All da food fo eat an da watta fo drink.
2He goin wipe out all da real spesho army guys an da regula army guys,
All da judges an da guys dat talk fo God,
All da guys dat can tell wass goin happen bumbye,
All da olda leadas,
3All da army captains,
All da odda kine importan peopo,
All da akamai guys dat tell da peopo wat fo do,
All da guys dat get da smarts fo make real nice tings wit dea hands,
An all da guys dat undastan how fo make kahuna kine chants.
4He goin take young kine boys an make um dea leadas.
Peopo dat stay make any kine, dey goin take charge a dem.
5Da peopo goin give each odda hard time,
Friend agains friend.
Da young guys goin make any kine to da ol guys
Jalike dey own dem an dey hate dem.
Da guys dat erybody get respeck fo,
Da no good guys goin bus um up.

6One guy goin grab one a his bruddas
From inside dea fadda house
An say, ‘Come on, you get one robe,
So you be our leada,
You take care all dis trouble!’
7But dat time, da brudda goin yell,
‘I no can take care all dis trouble!
I no mo food an clotheses inside my house.
No make me da leada fo all dis peopo.’

8You know, da peopo inside Jerusalem,
Jalike dey no can walk strait.
Da peopo inside Judah,
Jalike dey stay fall down too.
Cuz wit wat dey say,
An wit wat dey do,
Dey talk stink Yahweh
An go agains him.
Dey tink he no good, no matta he awesome.
9Da way dea face look,
Show dey no stay do da right kine ting.
Dey talk big bout da bad kine stuff dey do,
Jalike da peopo inside Sodom.
Dey no try hide um.
Auwe! Dey da one dat hurt demself mo worsa.
10Tell da guys dat do da right kine stuff,
Dat eryting goin come out good fo dem.
Cuz dey goin get wat dey work fo,
Wit da good kine stuff dey make.
11Auwe! fo da guys dat do bad kine stuff,
Cuz eryting goin come out bad fo dem!
Jalike wat dey do,
Dass wat dey goin get.

12Da ones dat give my peopo presha,
Dey stay ack jalike dey young kids.
My peopo get wahines in charge a dem.
Lissen, my peopo,
Da ones dat tell you guys wea fo go,
Dey stay take you guys da wrong way.
Dey stay mess up you guys plenny,
So you donno wea da right way fo go.

13But Yahweh, he go in front da court fo make argue.
He stand up fo judge da peopo.
14Yahweh da One goin judge da older leadas
An da odda ones dat stay lead his peopo.
He tell dem, “You, jalike da guys
Dat wen bus up my grape fields.
All da stuff you guys wen rip off
From da peopo dat no mo notting,
All dat stuff you guys take um
Inside yoa houses.
15Wat you guys tinking
Wen you go smash my peopo, aah?!
Da peopo dat no mo notting,
How come you go rub dea face inside da dirt, aah?!”
Yahweh, Da God Ova All Da Armies,
Dass wat he tell.
Yahweh Talk To Da Wahines Inside Jerusalem
16One nodda time, Yahweh tell dis:
“Cuz da wahines inside Jerusalem,
Dey ack high nose,
Dey walk an hold up dea neck sexy kine.
Dey check out guys wit dea eye.
Dey walk jalike dey fashion models.
Dey wear jangly kine jewel on top dea feets an ankles.
17I goin put sore all ova dea head.
I goin make all da Jerusalem wahines come bolohead.”
18Den Isaiah tell,
“Dat time, my Boss goin grab
All da fancy kine stuff dey get
And throw um away,
All da jangly kine jewel on top dea feets an ankles
An da bands fo put aroun dea heads,
An dea moon kine necklaces,
19An dea earrings an bracelets,
An da nice kine cloth fo cova dea face,
20Da crowns on top dea head,
An da nice kine chain fo dea ankle,
An da fancy kine cloth fo tie aroun dea waist,
Da perfume bottles,
Da jewel fo make da bad kine spirits go way,
21An da rings fo dea fingas an dea nose,
22Da fancy kine clotheses, coats, da purses,
23Da mirrors, da linen undawears,
Da fancy kine cloth on top dea head, an da stoles/shawls.
Now dey get perfume,
But den dey smell bad.
Now dey get one fancy kine cloth aroun da waist,
But lata dey goin get ony one rope.
Now dey get nice style hair,
But den dey goin come bolohead.
Now dey get fancy kine clotheses,
But den dey get ony burmbag clotheses.
Now dey nice looking,
But den dey get burn scar all ova dem.

25Yoa army guys, dey goin mahke from da sword wen dey fighting
Even yoa real strong guys goin mahke in da war.
26Inside da gates a Jerusalem town,
Da wahines goin sit down on top da groun,
An cry an stay sore inside cuz no mo dea guys.