311Auwe! fo da peopo dat go Egypt side
Fo get help erytime!
Dey stay shua dey goin come okay
If dey buy plenny horse dea.
Dey trus da war wagons, cuz dey get plenny,
An plenny guys fo ride horse.
But dey no go to Yahweh,
Da Good an Spesho One fo da Israel peopo.
Dey no aks him wat fo do.
2But no matta wat da guys tink,
Yahweh know wat fo do erytime,
An he can make bad tings happen too.
Wen Yahweh tell someting,
He no need change his mind bumbye.
He goin go agains da ohanas dat do bad kine stuff.
An agains da peopo dat help dem.
3Still yet, da Egypt guys, dey ony peopo.
Dey not God.
Dea horses, dey ony animals,
Dey not spirits.
Wen Yahweh put up his hand fo bus um up,
Da guys dat help dem,
Jalike dey goin trip.
An da guys dey help,
Jalike dey goin fall down.
All a dem goin wipe out togedda.
4Dis da ting Yahweh tell me:
“Jalike how da lion make noise
Wen he catch one sheep,
An jalike peopo call plenny sheep farma guys
Fo come help dem catch da lion,
But da lion, he no scared dem.
He no care dat dey stay yelling,
No bodda him dey make big noise.
Same ting, wen Yahweh,
Da God Ova All Da Armies, come,
He goin come down an fight,
An no scared, jalike da lion,
On top da hill wea da Temple stay.
5Jalike wen da mudda birds stay fly ova da nes
So notting hurt da bebe birds,
Same ting wit Yahweh
Da God Ova All Da Armies,
He no goin let notting hurt da Jerusalem peopo.
He goin take care dem
An get dem outa trouble.
He goin pass ova dem jalike Moses time,
An save dem.”
6You Israel peopo, go back to Yahweh! You wen go agains him, real bad. 7Cuz wen you go back, all you guys goin go agains da idol kine gods dat you guys wen make wit yoa own hands outa silva an gold. Az was bad, you wen do dat!
8God goin use one sword dat peopo neva make
Dat goin kill da Assyria guys.
He goin use one sword dat neva come from dis world
An dat goin wipe um out.
Da Assyria army guys goin run away from dat sword.
Odda peopo goin take dea young guys away
An make um work fo dem.
9Da big rock wea da Assyria guys like hide,
Dey goin run pass um
Cuz dey plenny scared.
Wen dea officer guys see Yahweh's flag fo war,
Dey goin come scared an lose fight.”

Dis word come strait from Yahweh:
Wea can see da light from his fire
Inside da Temple on top Mount Zion.
Can see wea he burn up his rubbish
Inside Jerusalem town.