Da King Do Da Right Kine Stuff
321Look!
Fo make shua eryting stay right,
Goin get da king stay in charge.
An goin get odda leada guys,
Dat goin judge da right way too.
2Da king, goin be da kine guy
Dat goin be jalike one place
Fo da peopo hide
From da strong wind o da rain,
So no can hit um.
He goin help da peopo fo res,
Jalike one watta ditch inside one dry place,
An jalike one big rock
Dat make one big shadow
In da place wea no mo watta.

3Dat time, da peopo dat can see,
Dea eyes no goin stay shut.
An da peopo dat can hear,
Dey goin lissen good.
4Da guys dat talk befo dey tink,
Dey goin know an undastan stuff.
Da guys dat no can talk good,
Dey no goin take long time fo talk,
An goin come out good wat dey tell.
5Dat time, da stupid kine guys
Dat ack like God no matta,
Nobody goin say dey get good heart
Fo help peopo.
Da guys dat fool erybody,
Nobody goin get respeck fo dem.
6Cuz da stupid kine guys
Dat ack like God no matta,
Dey talk stupid kine stuff.
Dey tink plenny bout how fo make trouble.
Az why, wateva God like, dey no like.
Az why dey teach
Da wrong kine stuff bout Yahweh.
Az why dey make shua
Da hungry guy no get notting fo eat,
An dey no let da guy dat stay thirsty
Get [anyting] fo drink.
7Da guys dat fool erybody,
Eryting dey do, stay bad.
Dey make plan fo do stink kine stuff.
Az how come dey bulai,
So dey can wipe out
Da peopo dat no mo notting,
No matta da peopo dat really need stuff
Even wen dey get um right in front da judge.
8But da guys dat get good heart fo help peopo,
Dey make real kine plan fo help um.
Dey stay solid,
Cuz dey like do wateva fo help peopo.
Da Wahines Inside Jerusalem Town
9Eh, you wahines dat no stay worry bout notting!
Stand up an lissen wat I telling you!
You daughtas stay shua notting goin hurt you,
Lissen wat I get fo tell you.
10In litto moa den one year,
You guys dat stay shua notting goin hurt you,
You goin shake an be scared.
Cuz no goin get no mo grapes fo cut,
An no goin get no mo fruit fo cut.
11Shake an be scared
You wahines dat no care bout notting.
Shake an be scared
You daughtas dat stay shua notting goin hurt you.
Take off yoa clotheses
An put burmbag cloth aroun yoa waist
Fo show you stay sad an crying.
12Pound yoa chest an cry, all you peopo,
Cuz no moa, da nice looking fields
An da grape plants wit plenny fruit
Dat you guys wen get befo time.
13Cry fo my peopo's land
Dat ony get thorns an thorn bush growing!
Cry fo all da house wea erybody
Wen dance an sing
An fo da town wea dey get plenny party befo time!
14Erybody goin go way from da palace
An leave da big town
Dat wen get plenny noise befo time.
Da hill wit da strong wall an da towers
Goin get pukas an jalike cave inside.
Da wild donkeys goin like live dea
Cuz no mo peopo,
An da goats goin get food fo eat ova dea.
15Eryting goin stay lidat
Till da Spirit from da Mos Importan One come
An take charge us guys.
Dat time, da place wea nobody live,
Goin get fields wea plenny stuff grow.
Da field wea peopo tink plenny stuff grow now,
Dat time dey goin tink,
Look jalike one forest.
16Da places wea nobody live,
Goin get peopo dea,
An judges dat judge da right way.
Da field wea plenny stuff grow,
Goin get peopo dea,
Dat do wass right erytime.
17An cuz peopo stay do wass right,
Dat goin make tings come good fo erybody.
An wat happen wen dey stay do wass right,
Dey goin stay quiet an trus God foeva.
18My peopo goin stay inside places
Wea eryting come good fo dem.
Dey goin live inside places
Wea dey can stay shua notting bad goin happen,
Places wea dey goin res
An no need worry bout notting.

19No matta get rain wit ice
Dat make all da trees fall down,
An all da buildings inside da big town fall down,
20Afta dat, you guys goin stay feel good inside,
Wen you plant yoa seed nea ery stream
An let yoa cows an donkey go all ova.
Da Assyria Guys Goin Bum Out