331Auwe! you Assyria guys
Dat stay wipe out da odda peopos!
Nobody eva wipe you out.
Auwe! you dat set up yoa brudda!
Nobody eva set you up.
But wen you pau wipe out da odda peopos,
Den somebody goin do um to you.
Wen you pau set dem up,
Den somebody goin set you up.
2Eh, Yahweh!
We like you do good tings fo us guys.
We stay wait fo you help us.
Ery morning, you da One make us strong,
Da One get us outa trouble,
Erytime we get hard time.
3Wen da diffren peopos hear you make big noise like da thunda,
Erybody run away.
Wen you stand up fo fight,
Da peopo inside da diffren countries,
Dey run all ova da place.
4Da Judah peopo goin grab
All da stuffs dat you Assyria guys
Wen rip off from odda peopo,
Jalike wen da grasshoppa
Come real quick grab all da food from one field.
Az how da peopo goin run
All ova da place fo grab stuff,
Jalike da grasshoppa inside da field.

5Yahweh, he da greates!
He live high on top da mos importan place!
All ova Jerusalem town
He goin make shua da judge guys judge da right way
An da peopo do right kine tings.
6All da time you stay alive,
Yahweh goin be jalike one solid foundation fo you.
He goin do plenny good tings fo you --
Get you outa trouble,
Help you know wat fo do erytime,
Help you know how fo do um.
Wen you Jerusalem peopo get respeck fo Yahweh fo real kine,
Goin be jalike az rich kine stuff he give you.

7Look! Dea bestes army guys stay crying loud
Outside dea in da street.
Da guys dat da king send
Fo make da fight pau,
Dey cry plenny too.
8Nobody stay go on top da big roads no moa.
Da guys dat befo time stay go all ova,
Now dey no go.
Az cuz da Assyria guys wen make promise,
An den dey broke um.
Dey ack like all da big towns, notting.
Dey no mo respeck fo nobody.
9Even da Judah land, look jalike stay sore inside
An plenny tired.
Lebanon side, da trees look jalike dey stay shame,
An da leaf look like stay dry.
Sharon side, no mo rain,
Stay jalike da dry Arabah valley.
Bashan an Carmel side,
Da plants leaf, all stay fall down.

10But Yahweh, he tell,
“Now, I goin stand up an start fo do tings!
Now I goin show peopo how big me!
An peopo goin know dat I importan!
11You Assyria guys, you get big kine plan,
But az only junk kine.
You tink fo do plenny,
But da wind blow um away.
Wen you guys stay breave,
Goin come jalike one fire,
An da fire goin burn up you guys.
12Da diffren peopos goin burn
Jalike wen you pile up coral rock an wood
An burn um slow, fo make lime fo plasta.
An jalike wen you cut down plenny thorn bush
An dey burn real fast.

13“You guys dat stay far place,
Lissen wat I wen do!
You guys dat stay nea by me,
Make shua you know I get plenny power!
14Inside Jerusalem town,
Da peopo dat stay do bad kine stuff,
Dey stay scared!
Da ones dat tink God notting,
Dey no can stop shaking!
Dey talk:
‘No mo nobody from us guys
Can live wit da fire dat goin burn us up!
No mo nobody from us guys
Can live wea da fire goin burn foeva!’
15Da peopo dat no need stay scared,
Dey da ones stay do da right kine stuff,
An tell wat stay right,
An no take da stuff
Dat peopo presha somebody an take um,
An no even touch
Da unda da table kine gif,
An no like hear
Wen peopo plan fo kill somebody.
An no like look wen get bad kine stuff.
16Dey da peopo goin live up high dea
Wea nobody can hurt dem,
Cuz get strong wall an high cliff.
God goin make shua
Dey get plenny fo eat an drink.”
Da Land Wea Da Big King Live
17Bumbye, yoa eye goin see da king,
An he beautiful!
An you goin see one land dat stay real big!
18You goin tink bout how scared you was befo.
You goin tink, “Eh! Wea da guy
Dat count how much us gotta pay da Assyria king?!
Wea da guy stay dat weigh da silva fo oua tax?!
Wea da Assyria army guy dat count
How plenny towns us guys get wit strong walls an towers
Fo make shua us no can fight?!
No mo all dem awready!”
19Dose Assyria guys
Dat no care how dey make to you guys,
Dose peopo dat talk funny kine
An no can undastan dem,
You no goin see dem no moa.
20Check out Mount Zion!
Dass da place we goin make da spesho religious time.
You goin see Jerusalem town.
Goin come one place
Wea you can res an no need worry.
Goin be jalike one tent dat nobody going move um
Fo take um one nodda place.
Nobody goin pull up da stakes.
Nobody goin broke da ropes.
21Right dea inside Jerusalem town,
Yahweh goin be da One dat stay awesome
Da way he goin help us guys.
He goin make Jerusalem strong,
Jalike some big towns
Dat get wide rivers an streams aroun um
Too strong even fo awesome navy kine boats
Go sail inside an go across fo attack.
22Yahweh, he oua Judge.
Yahweh, he da One give us guys oua rules.
Yahweh, da king fo us guys.
He da One goin get us outa trouble.
23You Assyria army guys,
You jalike one boat dat da rope stay hang down
An no can make da mast stand up strong
An no can make da sail catch da wind.
You guys get plenny stuffs,
But da Jerusalem peopo,
Dey goin take um all away from you guys
An half half um wit da odda Jerusalem peopo.
Even da guys dat no can walk good,
Dey goin take away yoa stuff too.
24Dat time, nobody dat live Jerusalem town
Goin tell, “I stay sick!”
God goin take away da shame
Fo da bad kine tings dey wen do
From erybody dat live dea,
An let um go.