God Judge Da Peopo Inside Da Diffren Countries
341Come nea hea by me, you peopo
Inside da diffren countries
Fo lissen wat I tell.
I like all da peopos all ova da world,
An eryting dat stay hea
An grow hea inside da world, fo lissen.
2Cuz Yahweh, he stay huhu
Wit all da peopo inside da diffren countries.
He no like wat all dea army guys do.
He give up wit dem awready.
He goin let odda guys kill dem
An wipe dem out all da way.
3Da peopo goin throw da guys dey kill outside da town,
Cuz dea bodies goin smell stink.
Da mountains goin get blood soak inside da groun.
4All da stars inside da sky goin come jalike dey rotten.
Da whole sky goin roll up, jalike peopo roll up one paper.
All da stars goin fall down,
Jalike da leaf fall down from one grape plant wen dey dry,
An jalike da dry up fig fruits fall down from one tree.

5Yahweh tell,
“Afta I use my sword inside da sky
Fo wipe out da bad peopo dea,
An get blood all ova um,
Den, cuz I da judge,
I goin use my sword fo bus up da Edom peopo
An wipe dem out all da way.”
6Yahweh, his sword get plenny blood on top!
Get fat all ova um
From da bebe sheeps an goats fo make sacrifice,
Fat from da boy kine sheep kidney,
He use um fo make sacrifice.
He goin kill plenny peopo inside da Edom land,
Jalike goin get one sacrifice fo Yahweh
Inside Bozrah, da Edom town.
7He goin kill da wild cows
An da odda kine animals fo make sacrifice.
He goin kill da young boy kine cows too,
An da real big boy kine cows, fo make sacrifice.
Goin get blood all ova dea land.
Da dirt ova dea goin stick togedda from da fat.

8All dat goin happen
Cuz Yahweh get one time
Dat he goin pay back da Edom peopo.
He goin do um ova an ova, fo one year.
Cuz he goin make shua
Da odda nations no goin take away da right
Fo his peopo live inside Jerusalem town.
9Da watta inside streams, Edom side,
Goin come jalike tar.
Da dirt ova dea goin come jalike sulphur.
Da whole land goin come jalike burning tar.
10Da fire goin go day time an nite time,
Da smoke from da tar going up foeva.
From one fadda to anodda fadda,
Edom goin stay wit notting ova dea.
Nobody goin go thru dea eva again.
11Ony all kine diffren birds
Dat us Jewish peopo not suppose to eat
Goin stay dea an make dea nest ova dea.
God goin make shua da Edom land,
No mo notting inside,
An no mo shape notting.
12Da Edom ali`i guys,
Dey goin call dea land
“Da Place Wea No Mo King
Cuz No Mo Notting,”
Cuz all da ali`i guys, gone awready.
13Dea palaces goin get thorn bush grow all ova da place.
An dea towns wit strong walls goin get stickas an kukus all ova.
Da wild jackal dogs goin stay an eat dea
An goin be da place fo da owl birds.
14Da wild hyena animal
Goin come togedda wit odda kine animals
Dat stay inside da boonies.
Da wild goats goin call to each odda.
Goin get nite time animals sleep ova dea
An find place fo rest.
15Dass da place da owl goin make nest
An lay dea egg.
Dey goin born dea kids
An bring um all togedda
An take care um unda dea wings.
Even da scavenja birds goin come togedda dea,
Da boy kine bird wit his wahine kine bird.
16Go find out wat Yahweh wen tell his guys fo write.
Read um from dat book.
Yahweh tell, dat all dese birds an animals goin show up dea.
Boy kine goin come wit his wahine kine, all a dem.
Me, Isaiah, I da one wen tell wat Yahweh say dey gotta do,
An goin be his Spirit bring dem togedda.
17He wen measure da land he goin give
Ery one a da birds an animals.
To da birds an animals, an dea kids, an dea grankids,
Fo dem get da Edom land foeva.