Da Peopo Dat Yahweh Take Outa Trouble Stay Good Inside
(Luke 4:18, 7:22; Hebrews 12:12-13)
351Da peopo dat goin live inside da boonies
An da place wea no mo watta,
Dey goin stay feel good inside.
Da place wea no mo nobody,
Goin get plenny flowas jalike da narcissus flowa.
2Goin get flowas all ova da place dea.
Da peopo inside da boonies goin dance an sing,
An yell cuz dey feel good inside.
Goin come awesome dea inside da boonies,
Jalike da Lebanon mountain,
An jalike Mount Carmel an da Sharon plain.
Da peopo dea goin see dat Yahweh stay real awesome
Dey goin see dat he da king.

3So, make strong da peopo
Dat right now stay so scared,
Dea hands shake an stay drop stuff.
An dea knees no let um stand.
4Tell da peopo dat stay feel scared
Cuz dey tinking dey gotta do someting right now,
“Be strong! No scared!
Fo shua, yoa God goin come
Wen come da time fo pay dem back,
Da ones dat stay agains him!
He da One goin come,
An get you guys outa trouble!”

5Dat time, da peopo dat no can see,
Dey goin see.
Da peopo dat no can hear,
Dey goin hear.
6Da peopo dat no can walk,
Dey goin jump jalike da deer.
Da peopo dat no can talk,
Dey goin start fo talk real loud
Cuz dey stay feel good inside.
Da watta goin start fo come
Outa da pukas all ova da boonies,
An streams goin come
All ova da up country boonies.
7Da hot sand goin get pond wit reeds.
Da ground dat no mo watta,
Goin come one puka wea plenny watta come out.
Ova dea, wea da jackal kine wild dogs
Wen lay down fo res befo time,
Goin get grass, an watta plants, an papyrus reeds dea.
8Dat place, one [highway / build up] road goin stay ova dea.
Peopo goin call um “Da Road Fo Go By Da God Dat Stay Good An Spesho.”
Goin be fo da peopo dat stay tight wit God.
Da peopo dat do bad kine stuff dat make um so dey no can pray,
Dey no can go on dat road.
But anybody dat go dat way,
Even da ones dat donno da road,
Dey no goin get lost.
9No mo lion o wild kine animal dat like eat you
Goin come nea dea.
Ony da peopo dat God wen get um outa trouble,
Dey da ony ones goin use dat road.
10Da ones, Yahweh wen pay da price fo dem,
Dey goin come back to Mount Zion.
Dey goin go inside da Temple Fo Yahweh,
An dey goin dance an sing
An feel good inside foeva.
All dat goin be jalike one crown on top dea head.
Wen dey going, dey feel good inside
Mo an moa erytime.
Befo time, dey feel sore inside plenny.
But all dat gone awready!