Da Babylon King Send Messenja Guys By Hezekiah
391Dat time, Merodak-Baladan, Baladan boy, come da Babylon king. He send guys by King Hezekiah wit lettas an one presen, cuz he hear dat Hezekiah wen stay sick, but come good again. 2Hezekiah meet da messenja guys an he feel good inside dat dey come. Den he show dem all da stuffs he get inside da place wea he put stuff: da silva, da gold, da spice, da bestes kine oil, all da army kine stuff, an all his rich kine stuffs. No mo notting inside his palace an his land dat he neva show dem.
3Den Isaiah, da guy dat talk fo God, go by King Hezekiah an aks him, “Wat dose guys say? Wea dey come from?”
Hezekiah tell, “Dey come by me from one far place, from Babylon.”
4Isaiah aks him, “Wat dey wen see inside yoa palace?”
Hezekiah say, “Dey see eryting inside my palace. No mo notting from all my rich stuffs dat I neva show dem.”
5Den Isaiah tell Hezekiah, “Lissen wat Yahweh, Da God Ova All Da Armies, tell: 6‘Fo shua, da time goin come wen eryting inside yoa palace, an all da stuffs you an yoa ancesta guys wen put away till now, da Babylon guys goin take um all to Babylon. Dey goin take eryting.’ Dass wat Yahweh tell. 7Even some a yoa own kids, da Babylon guys goin take dem away too. Da Babylon guys goin make yoa boys work fo da Babylon king inside his palace.”
8Hezekiah tink, “Dat mean, till I mahke, eryting goin come good wit us guys, an no need worry.” So Hezekiah tell Isaiah, “Wat you say, az good wat Yahweh tell!”