Da Idol Kine Gods From Babylon
461Da gods Bel an Nebo from Babylon,
Dey no stand up no moa!
Da statues dat look like dem,
Dat you Babylon guys carry befo time
Fo make parade,
Now you guys put um on top animals,
An stay heavy fo even da animals carry um,
Cuz dey tired.
2Da Babylon gods togedda,
Dey no can stand up no moa.
Da peopo, dey no can bring back da statues.
Dass why da Babylon gods stay prisnas too.
Dey gotta go wea eva da statue go.

3“Lissen to me, you Jacob peopo,
An all you Israel peopo
Dat still stay on top da land.
I wen carry you guys from da start,
An wen lif up you guys from da time you wen born.
4Even wen you guys come old an get gray hair,
I still Yahweh.
I still goin help you guys.
I wen make you guys
An I goin carry you guys.
I goin get you guys outa trouble.

5Who, you guys can tell me, I jalike dem?
Dat you can say, me an dem, same same?
Get somebody, you can say
I look jalike dem, and dey look jalike me?
Nah.
6Get peopo pour out gold from dea money bag,
An weigh dea silva on top da scales.
Dey pay one metal worka guy
Fo make da gold come one god.
Den dey go down wit dea face on top da groun
An pray to um.
7Dey carry da idol kine god up on top dea shoulder,
An take um to da place dey goin put um.
An put um down dea.
Da idol kine god stand up ova dea
An no move.
Somebody call to um, but da idol no can talk.
Da idol no can get nobody outa dea trouble.

8“Rememba all dis,
Bout Yahweh an yoa idol kine gods.
No scared fo tink!
An you guys dat no like lissen,
Tink bout dis ova an ova.
9Rememba da stuff dat wen happen
Long time ago, befo time.
Cuz me, I God.
No mo odda god stay jalike me,
Same same.
10From da start, I da One stay tell
How da end goin come.
From long time ago, I tell tings
Dat nobody do yet.
I da One tell dis: ‘Da plan I make,
Az how goin happen.
I goin do eryting how I like fo do.’
11I call one scavenja bird from da eas side.
I call one guy from one far place
Fo him do wat I wen make plan fo do.
Fo shua, wat I tell, I goin do.
I set up fo do stuff, an I going do um!
12Lissen to me, you hard head guys,
You guys dat no even like try
Fo do da right kine stuff!
13I stay do wass right erytime,
An I goin come near you!
I no stay far.
I no goin wait long time
Fo get my peopo outa trouble.
On top Mount Zion
I goin get da Israel peopo outa trouble,
An dey goin tell peopo how awesome I stay.”