Da Babylon Army Guys Wipe Out
471“Go sit down on top da dirt,
You Babylon town peopo!
You Babylon guys was jalike one young princess,
But now, you gotta go sit down on top da groun,
Cuz now you no mo throne, no mo king.
Az why nobody goin tell you gentle
An you no need work.
2You Babylon guys goin be
Jalike one wahine dat gotta sit down by da big heavy stone
Fo grind da wheat jalike one slave
Fo make flour,
O one wahine dat gotta take off her head cloth
An lift up her skirt so no come wet
Wen she go across da stream.
3Den erybody goin see you Babylon guys,
You goin come shame.
I goin pay you guys back.
I no goin let nobody go.”

4Da One who wen pay da price
Fo get us guys outa da bad kine stuff,
Yahweh, Da God Ova All Da Armies,
Dass his name.
Him, da Good An Spesho God fo da Israel peopo.

5Yahweh, he tell da Babylon peopo:
“Sit down an no talk!
An go inside da dark place.
Nobody goin tell you guys
Dat yoa town jalike da queen
Ova all da kings an da peopos no moa.
6I wen stay huhu wit my peopo.
An go make to my own peopo
Jalike dey no stay spesho fo me.
I wen give my peopo to you Babylon guys,
An you neva even give dem chance.
You even make da old peopo suffa plenny,
An go make dem carry heavy load.
7You Babylon guys talk
Jalike you goin stay foeva,
Jalike yoa town stay one queen foeva!
But you neva tink bout all dis stuff,
O wat goin happen bumbye
Cuz a wat you stay do now!

8“Now lissen, you Babylon guys!
You guys, jalike one wahine
Dat tink she get eryting nice
An can do wateva she like,
Cuz no mo nobody goin hurt her.
Jalike you stay tell yoaself:
‘Me, I da ony one!
No mo nobody jalike me!
I no goin come one widow
An my kids no goin mahke.’
9But one day, same time, two tings goin happen:
You goin come one widow,
An yoa kids goin mahke.
No matta you make kahuna
An you make plenny magic kine words,
Still yet dey goin come mahke die dead!
10You Babylon guys, you stay shua
Dat wen you guys do bad kine stuff
You stay okay.
Cua you tell, ‘Nobody see me.’
You tink you know plenny stuff
An know wat fo do erytime.
Inside, you tell yoaself, ‘I da ony one!
No mo nobody jalike me, ony me!’

11Real bad stuff goin happen to you Babylon guys bumbye,
But you no even goin know
Wat kine magic goin stop um.
Da trouble goin hit you guys big time,
But even if you pay money, no goin stop um.
Goin come jalike one big storm,
An you no even goin know befo time.

12“So, no stop making da magic kine words
An putting kahuna on top plenny peopo,
Same ting you wen work real hard
Fo learn, from small kid time.
Maybe da magic an da kahuna goin come out okay.
Maybe you goin make somebody come mo scared.
13Ony wase time you guys fo lissen
To all da diffren peopo like tell you wat fo do.
Let dem all stand up an talk --
Da guys dat one picha fo make da zodiac signs,
Da guys dat know how fo check out da stars
Fo make horoscope ery month, new moon time!
But wen da tings dat goin happen, happen,
Den let dem get you guys outa trouble!
14But you know wat?! Dose star watcha guys,
Dey jalike da dry wheat stalk.
Da fire burn um up fas.
Dey no can even help demself fo no burn up.
Dat kine fire burn quick, no stay.
Dass not da kine fire
Dat make you stay warm.
15Dass all da star watcha guys goin do fo you.
You Babylon guys gotta work hard,
Cuz from small kid time
Da star watcha guys make you pay.
But ery one a dem goin go way some odda place,
An no mo nobody goin get you guys outa trouble.”