(Matthew 21:33; Mark 12:1; Luke 20:9; James 5:4)
51I like sing one song fo da one I get love an aloha fo.
I goin sing one song bout his grape field
On top one hill dat get good groun.
2He dig up da ground,
Take away all da stones dea,
An plant good kine grape plants.
He build one tower in da middo
Wea his worka guys can watch um.
He even cut da stone one place nea dea
So can step all ova da grapes
Fo press out da juice fo make wine.
He wen wait fo da good grapes get fruit.
But wat wen come was stink kine grapes.
3Da one I get love an aloha fo, he talk:
“So den, you peopo dat live inside Jerusalem,
An you guys from Judah,
You guys tell me wass right an wass wrong
Bout me an my grape field!
(Dass da Israel peopo, you know.)
4Tell me, wat odda ting I gotta do
Fo my grape field, dat I neva do befo time?
I wen wait long time fo da good grapes come.
How come ony get da stink kine grapes come?

5“Now, I goin tell you guys
Wat I goin do wit my grape field!
I goin take away da hedge from aroun um,
So da cows come inside an eat um, wat stay dea.
I goin broke down da wall aroun um
So odda guys can go inside an bus um up.
6I goin make um jalike da boonies wea no mo notting.
Nobody goin trim um, o hoe da weeds.
Plenny kuku, an bushes goin grow dea.
I goin tell da clouds
Fo no let um rain on top um.”

7So, az how da story stay bout dis peopo!
Yahweh, Da God Ova All Da Armies,
His grape field, dass da Israel peopo!
An da plantation dat make Yahweh feel good inside
Wit plenny love an aloha,
Dass da peopo from da Judah districk.
Yahweh wait fo peopo
Fo judge da right way,
But dey ony stay kill each odda!
He wait fo peopo fo do da right ting erytime,
But dey ony make each odda yell fo somebody help dem.
God, Da Judge Fo Da Judah Peopo
8An God tell, “Auwe! fo you guys dat stay buy
All da house an field dat get no mo space awready,
You no leave even one place fo odda peopo live.
So you guys goin be da ony one
Fo live dea, on top all dat land!
9Yahweh, Da God Ova All Da Armies,
He talk so I can hear um:
“Fo shua, goin get plenny big house ova dea,
But goin be kinda scary,
Cuz no mo nobody inside um.
Get nice big kine house
But no mo peopo live inside dem.
10Ten acre grape field
Goin give ony six gallon wine.
An ten bag seed
Goin give ony one bag food.”

11Auwe! to da guys
Dat get up early in da morning
Fo go all out fo da booze,
Dey stay up late nite time,
Till jalike dey stay on fire from da wine.
12Dey make big party,
Dey get plenny harp an guitar,
Tambourine, flute, an wine dea.
But dey no tink notting bout Yahweh,
An da tings he do.
Wen he show da tings he make his own self,
Dey no see notting.
13Dass why my peopo goin come prisonas
An go anodda land,
Cuz dey donno notting.
Dea importan peopo goin mahke
Cuz dey no mo food fo eat,
Da odda peopo goin mahke
Cuz dey no mo notting fo drink.
14Dass why, jalike wea da mahke peopo go,
Da mout stay open big,
An waiting fo erybody.
Cuz down inside dea,
All da rich kine peopo goin go.
Same ting fo da odda kine peopo
Dat stay make big kine noise an go party out.
15Ery one a dose peopo goin lose face an come notting,
No matta dey big head an high nose.
16But Yahweh, Da God Ova All Da Armies,
Cuz he stay judge da right way,
Peopo goin know how big him!
Him, da God dat stay good an spesho!
Peopo goin know how spesho he stay
Cuz he do da right ting erytime!
17Dat time, da sheeps goin eat grass
Inside dea own grass land.
Dey goin stay on top da land an eat plenny,
An da bebe sheeps goin eat
Wea da rich peopo wen live befo time,
But now, ony get bus up house all ova.

18Auwe! fo da peopo dat drag
All da bad kine stuff dey stay do wit dem,
Jalike dey pulling heavy stuff wit one rope,
But da stuff dey pulling, no wort notting!
Dey stay do bad tings,
Jalike dey stay drag one wagon wit one rope.

19Dat kine peopo tell, “We like God fo hurry up!
We like him make fas fo do his work,
So us guys can see da ting
Dat da Good An Spesho God fo da Israel peopo
Make plan fo do,
We like see dat happen quick,
Den us guys goin know bout um.”

20Auwe! fo da guys dat tell
Dat da bad kine stuff stay good,
An da good kine stuff stay bad!
Dey tell, da dark stay light,
An da light stay dark!
Dey tell, da kine stuff dat taste bad, stay sweet,
An da sweet kine stuff taste bad!

21Auwe! fo da guys dat tink dey know eryting erytime,
An tink dey smart fo undastan eryting.

22Auwe! fo da guys dat erytime like drink wine,
An real smart guys fo mix da booze.
23Dat kine guys, wen somebody do wrong kine stuff,
Dey give da judge money
Fo make um look jalike dey stay do eryting right.
But fo da peopo dat stay do da right ting fo real kine,
Dey take away dea rights.

24“Az why, wen dose peopo make lidat,
Dey goin come poho,
Jalike one plant wit root all rotten,
An da wind blow away all da flowers jalike dust,
Jalike da fire burn up da junks from da wheat,
An da dry grass no mo wen stay burning.
Az cuz dey no take da Rules
Dat Yahweh, Da God Ova All Da Armies, teach um,
An dey ack like wateva Yahweh tell dem,
Stay no good!
No matta he da Good An Spesho God fo da Israel peopo,
25Dass why Yahweh stay come huhu
Agains his peopo.
He put up his hand
An stay ready fo wack dem down.
Dass why da mountains stay shake,
An da peopo body dat mahke
Lay all ova outside jalike rubbish.

But no matta God wack his peopo lidat,
He still yet stay huhu
An he stay ready fo wack um one mo time.
26God goin put up one flag
So dat all da peopo inside da lands dat stay far can see um.
He goin whistle fo dem fo come,
So dey come togedda quick from mo far place.
27In dat army, nobody come tired
O trip an fall down.
Dey no need sleep late eva,
O pass out sleep cuz dey tired.
Dea belt stay tight aroun dea waist.
Da strap on dea slippa no broke.
28Dea arrow, stay sharp,
An dea bows, ready fo shoot.
Da horses feet run real fas.
Da wheels on dea war wagons make big noise
Jalike da strong wind.
29Da army guys make big noise jalike da wahine lion.
Dey grab eryting,
Jalike da lion make noise wen he grab one animal
An carry um away
An no mo nobody can bring dem back.
30Dat time, wen da army guys come dis land,
Dey goin make big noise
Jalike wen da sea stay pounding.
If anybody go look da land,
Dey goin see dat eryting stay dark
An erybody get big trouble.
Even da day time going come dark cuz a da clouds.