511Yahweh tell: “Lissen to me,
You guys dat like do da right kine stuff,
An like know Yahweh.
Tink bout wea you guys come from,
Jalike somebody wen cut one small rock
Outa one cliff,
O jalike somebody cut one stone block
From inside one quarry.
2Tink bout Abraham, da main ancesta guy
All you guys come from,
An Sarah, yoa main mudda.
Wen I tell Abraham fo come be my guy,
Was ony him, one guy.
I do plenny good stuff fo him,
An give him plenny kids an grandkids.”

3Az cuz Yahweh goin help da Jerusalem peopo
So dey no stay sad no moa
Bout all da stuff stay bus up ova dea.
He goin make da boonies come
Jalike how he wen make da place Eden side.
Da dry up country goin come
Jalike one garden fo Yahweh.
Da peopo ova dea goin feel real good inside,
An dance an sing.
Dey goin tell Yahweh, ‘Mahalo plenny!’ an dey goin sing.
4Yahweh tell, “Lissen to me, all my peopo!
Cuz I goin give my Rules to all da peopos,
An wat I tell cuz I da Judge,
Goin show all da nations wass right,
Az goin be jalike one light fo show dem da way.
5I stay ready awready fo do wass right.
I start fo get my peopo outa trouble.
I get powa fo be da judge
Fo all da diffren peopos.
I da One dat da peopo
Dat live on top da islands stay wait fo,
Cuz dey stay shua I get powa fo help dem.
6Look up to da sky.
Look down at da earth.
Da sky goin go way, jalike smoke.
Da earth goin come ol, jalike ol clotheses.
All da peopo on top da earth goin mahke, jalike small bugs.
But I goin get my peopo outa trouble foeva.
I no goin stop doing wass right fo da peopo, eva.

7“Lissen to me, you guys dat know wass right.
You peopo dat get my Rules inside yoa heart,
No scared if peopo try fo make you guys shame!
No lose fight if dey talk any kine to you guys!
8Cuz dose peopo no goin stay long time,
Dey goin be jalike clotheses da bugs goin eat.
Dey goin be jalike wool kine cloth dat da moth worm goin eat.
But I stay do da right ting foeva.
I get my peopo outa trouble,
Dem, an dea kids an grankids, foeva.”
9Isaiah tell, “Wake up! Wake up, Yahweh!
Make ready fo use yoa powa!
Wake up, jalike you do long time ago,
Da time oua ancesta guys wen live.
Dat time, you wen kill da Egypt army guys
Wen dey come afta oua ancesta guys
Jalike Rahab da dragon,
But you wen chop um up!
10You da One wen make da sea dry up,
No matta stay deep, an get plenny watta.
Was you wen make one road
Inside all da deep place,
So yoa peopo can go ova da odda side
Afta you pay da right price fo get um outa Egypt.

11Dis time, same ting!
Fo get da peopo outa trouble,
Yahweh goin pay da price.
Dey goin come back Mount Zion side
Inside Jerusalem town,
Dey goin yell plenny cuz dey feel real good.
Jalike dey stay wear lei on top dea head
Fo show dey like dance an sing foeva.
Dey stay feel good inside
An dance an sing, wen dey coming.
Dey no goin feel sore inside,
An no goin moan no moa.”

12Yahweh tell, “Me, I da One
Dat give you guys good kine words
An make you feel good.
But how come you scared a peopo
Dat ony goin mahke bumbye?!
Da peopo dat goin mahke jalike da grass?!
13How come you guys foget
Dat me, Yahweh, I da One wen make you?!
I spread out da sky
An put down da foundation fo da earth.
So, how come you guys stay real scared ery day,
Cuz you tink bout da peopo dat stay mad
An give you guys hard time,
Cuz dey huhu wit you guys,
An dey stay ready fo wipe out you guys.
But wat dey goin do cuz dey mad?
Notting!
14Da prisna guys dat stay scared,
Pretty soon dey goin come outa da prison.
Dey no goin mahke inside dea,
An dey no goin come hungry.
15Cuz I Yahweh, yoa God,
I make da sea come rough
So da waves make big noise.
I Yahweh, Da God Ova All Da Armies.
Dass who me.
16I wen tell you wat fo say.
I cover you wit da shadow from my hand.
I put da sky up dea wea stay.
I put down da foundation fo da earth.
I tell da Mount Zion peopo,
‘You guys, my peopo.’-”
Yahweh Stay Huhu
17Wake yoaself up! Wake up!
Stand up, you Jerusalem peopo!
Befo time, Yahweh wen stay huhu wit you guys,
An he make you guys suffa plenny!
Jalike he make you guys drink wine
From inside one wine bowl he give you,
An you drink da whole ting,
An you you no can walk strait cuz a dat.
18You guys, jalike one wahine dat born plenny boys
But now, no mo one a dem
Fo show her wea fo go.
She wen raise up her boys
But now no mo one a dem
Fo hold her hand.
19Dese two bad tings wen happen
To you Jerusalem guys,
No mo nobody fo help you
Fo wat wen happen,
An you feel sore inside.
You guys stay all bus up,
An wipe out,
An no mo notting fo eat,
An dey kill you guys wit sword.
How I can give you guys good kine words
Fo make you feel good?! No can!
20Yoa boys pass out.
Dey lay down dea, da end a ery road.
Jalike one deer dey catch inside one net.
Yoa God Yahweh stay real huhu wit dem.
An stay poin finga dem.

21Az why you guys gotta lissen
Wat I goin tell you now,
You guys dat stay feel sore inside,
An feel jalike you drunk,
But not from da wine.
22Dis, one spesho message from yoa Boss Yahweh,
From yoa God, da one dat stay help his peopo:
“Look! Now I take away yoa trouble.
Befo time, I wen make you guys suffa plenny
Cuz I stay huhu wit you guys.
Jalike I make you guys drink da wine
From inside one bowl,
An you no can walk good cuz a dat.
But you guys no goin get dat kine trouble
From me no moa.
No way you goin drink from dat wine bowl
Again, no moa.
23I goin put dat wine bowl
In da hands a da peopo
Dat wen make you guys suffa,
Da ones dat tell you guys,
‘Go lay down on top da groun!
So we can walk on top you guys!
Make yoa back flat jalike da groun
Jalike one road fo us walk on top.’
But I goin make trouble fo dem.”