(Rome 2:24, 10:15, 15:21; 1 Corint 2:9; 2 Corint 6:17; Efesus 2:17, 6:14-15)
521Wake up! Wake up, you Jerusalem peopo!
Make strong
An put on yoa shining clotheses!
Cuz yoa town, da one God make spesho fo him!

Da guys dat no mo cut skin mark
Fo show dey God's peopo,
An da ones dat do stuff dat make um
So dey no can pray,
Dey no goin go inside Jerusalem again.
2Shake off da dirt from wea you sit.
Get up, you Jerusalem peopo!
Sit down jalike kings on top yoa thrones.
Hemo da slave band aroun yoa neck
You guys was prisnas befo, but not now!

3Cuz dis, da spesho message from Yahweh:
“I wen sell you guys to da Babylon peopo
An dey neva pay me notting fo you guys.
Now, dey let you guys go,
An I no goin pay dem notting!”

4Dis, one nodda spesho message from Yahweh da Boss:
“Egypt was da place my peopo wen go fo live, da firs time.
Den, was da Assyria peopo wen give my peopo hard time,
Neva mind dey no have da right fo do dat.”
5An now, Yahweh tell:
“Now, wat I get hea?!
Da Babylon peopo take away my peopo
An dey no pay me notting fo dem.
Da guys dat stay lead da Babylon peopo yell plenny.
An all day dey talk stink bout who me.
6But cuz da Babylon guys talk stink bout who me,
My peopo goin know wat kine God me.
Wen dat time come, dey goin know dat I da One
Wen tell bout dis stuff befo time.
Yeah, I da One!”

7Real nice! Wen we see da messenja guy feet
Coming ova da mountains
Fo tell us good kine stuff!
He make shua erybody hear,
“Eryting goin come good now!
Good tings goin happen!
Yahweh goin get us outa trouble.”
He tell God's peopo, Jerusalem town,
“Yoa God, he da king now!”
8Lissen! Yoa guys dat stay watch,
Dey stay yell togedda cuz dey feel good inside!
Wen Yahweh come back Jerusalem, his spesho town,
Ery one a dem goin see um wit dea own eyes!
9Sing togedda, cuz you guys stay feel real good inside,
No matta Jerusalem town still stay all bus up!
Cuz Yahweh take away da sore
Dat his peopo feel inside.
He pay da price
Fo get da Jerusalem peopo outa trouble.
10Yahweh goin show how strong him
Cuz he good an spesho!
An all da peopo inside all da countries,
Even da ones inside da mos far places on top da earth,
Dey goin see
How our God get his peopo outa trouble!

11Get away! Get away! Get outa Babylon!
No touch notting dat not spesho fo Yahweh!
Get outa dea!
Make shua you clean, fo go inside da Temple fo pray!
Cuz you guys stay carry da tings fo Yahweh
Dat go inside da Temple.
12But wen you guys come back from Babylon side,
No need go quick time
Jalike you running away from dem.
Cuz da God yoa ancesta guy Israel pray to,
Yahweh, he goin go wit you guys.
He going in front you guys
An behind you guys,
Fo make shua nobody catch you.
Da Guy Dat Work Fo Yahweh Goin Suffa
13Yahweh tell: “Look! My worka guy,
He do wat he suppose to do.
He do good job cuz he know wat he stay doing.
Peopo goin know he importan.
Dey all goin know who him,
An show him plenny respeck.
14But goin be jalike befo time,
Wen plenny peopo bum out
Cuz dey see you guys, my peopo,
Suffa plenny.
Same ting, da way my worka guy goin look,
He goin look like he all bus up,
Mo den any odda guy.
An his face, no goin look like anybody.
15Dass how his blood goin be jalike da blood
Dat da pries guy sprinkle wen he make sacrifice.
An cuz my worka guy goin bleed lidat,
Da peopos in plenny countries
Goin get da right fo come in front me, Yahweh.
Cuz a dat, even da king guys
No can say notting.
Dey goin see stuff dat nobody tell um bout.
Dey goin start fo undastan stuff dey neva hear bout.”