(Matthew 8:17; Luke 22:37; John 12:58; Jesus Guys 8:32-33, 13:47; Rome 10:16; Hebrews 9:28; 1 Peter 2:22, 24-25)
531You tink get peopo dat believe
Wat dey wen hear from us guys?! No way!
You tink Yahweh wen show any a dem
How strong him?! Not even!
2Da Guy Dat Work Fo Yahweh,
He wen grow up in front Yahweh,
Jalike one young plant grow from one root
From da groun wen no mo watta.
He not good looking,
An he no look like one king.
We no see notting
Fo make us like come his peopo.
3Peopo make him jalike he notting.
Dey no let him do notting wit dem.
He one guy dat stay sore inside,
An he know how feel fo suffa plenny.
Peopo turn aroun look da odda way
Cuz dey no like see him.
Dey make him jalike he nobody,
An nobody care bout him.

4Still yet, wen us guys suffa plenny,
Da Guy Dat Work Fo Yahweh,
He take dat all away.
Wen us guys stay sore inside,
He carry all dat fo us.
But us guys, we ony figga him
Az da guy dat God wen wack an bus up,
An make um feel like he no good.
5But Da Guy Dat Work Fo Yahweh,
He da one peopo wen poke
Cuz us guys go agains God.
Him, da one dey smash
Cuz us guys do wrong.
Him, da one dey punish
So eryting come good fo us.
Him, da one dey wen whip
An cuz a dat, he make us come good!
6We all go all ova da place jalike da sheeps.
Ery one a us guys, we go our own way.
But Yahweh, he let da Guy Dat Work Fo Him
Take da blame fo da bad stuff all us guys do.

7Da Guy Dat Work Fo Yahweh,
Da peopo give him hard time.
Dey make him suffa,
But he no say notting.
Dey take him out jalike one sheep
Fo kill him.
But jalike da sheeps
Wen dey cut off all da wool, dey no make noise,
He no say notting too.
8Cuz da peopo put in jail
Da Guy Dat Work Fo Yahweh.
Dey judge him,
Den take um away fo kill um.
An da peopo dat stay alive dat time,
Dey no even tink bout
How dey cut him off
From stay alive inside dea land.
Cuz my peopo wen go agains God,
Dey wack him.
9Dey set up one grave fo him
Wit da bad guys.
But wen he mahke,
Dey put um inside one rich guy place.
He mahke, no matta he no hurt nobody,
An he no bulai nobody.

10Still yet, was Yahweh
Dat figga az good,
Fo smash da Guy Dat Work Fo Him
An make him suffa.
Yahweh make him mahke, jalike one sacrifice
Fo all da blame peopo get
Cuz a da bad kine stuff we do.
But still yet, da Guy Dat Work Fo Yahweh,
He goin see his kids, an live long time,
An he goin get da powa
Fo wateva Yahweh like,
He goin make happen.
11Afta Da Guy Dat Work Fo Yahweh
Work real hard an suffa plenny,
He goin see [wat happen cuz a dat / da light again],
An he goin feel good inside.

Yahweh tell, “Cuz my worka guy know wat he doing,
An cuz he do da right ting erytime,
He goin make plenny peopo
Come right wit me.
Az cuz he da one take da blame
Fo all da bad kine stuff dose peopo do.
12Az why I goin give him his share,
Same ting jalike I goin give plenny odda peopo.
He goin be jalike one a da strong army guys
Dat bring back plenny stuff from one war
An give all da peopo dea share.
Cuz he let da peopo kill him,
An even count him
Wit da peopo dat go agains me.
Him, da one take da blame fo plenny peopo,
An pray fo da peopo dat stay go agains me.”
Bumbye God's Peopo Goin Come Awesome