(Rome 3:13-18, 11:26-27; Efesus 6:14-15, 17; 1 Tessalonika 5:8)
591Fo shua, Yahweh get plenny power
Fo get us guys outa trouble.
Fo shua, he can hear good.
2So! How come you guys stay cut off from yoa God Yahweh?!
Cuz you guys do bad kine stuff dat need punish, az why!
How come God no let you see his face
An he no lissen?!
Cuz you guys stay do bad kine stuff, az why!
3You guys kill peopo an dey bleed an mahke,
Jalike yoa hands stay dirty wit blood.
You do all kine stuff dat need punish,
An jalike yoa fingas get dirt all ova um
From do tings dat need punish.
You guys talk all bulai kine tings wit yoa mout.
You guys ony talk bout tings dass not right.
4No mo nobody fo tell peopo
Dey betta do da right ting.
Wen peopo talk in front da judge,
Nobody tell um da truth.
Dey tink az good,
Fo tell stuff dat no mean notting,
An talk bout wase time kine stuff,
An make trouble,
An cuz a dat, bad kine stuff happen.
Jalike one wahine come hapai,
An cuz a dat, she born one bebe.
5Jalike dey make da egg from da snake come open
From da kine snake can kill you.
Dey make web jalike one spider.
But anybody go lissen dat kine peopo,
Jalike dey eat da poison snake egg an mahke.
You broke one snake egg,
Ony make anodda poison snake come out.
6Da spider webs dey make,
No good fo make clotheses.
Nobody can cover demself wit dat.
Da kine tings dey do, ony bad kine.
Dey like fight an hurt peopo.
7Dey run fas fo do bad kine stuff.
Dey real quick fo kill peopo
Dat neva do notting bad.
Da ony ting dey tink bout,
Is how fo do bad kine stuff.
Ery place dey go,
Dey broke up eryting.
8Dey donno how fo live wit aloha an no fight.
Da way dey go, dey no mo judge
Fo show um wass right.
Dey pick da mos crooked way fo live.
Anybody go dea way,
Dey no goin find out how fo live wit aloha.

9And dass how come God da Judge no tell
Dat us guys stay do da right kine tings,
Cuz us no do um.
Us guys still stay far
From do da right ting erytime.
Us like do good tings,
But jalike we like find light, but ony stay dark.
Jalike we like da bright light come,
But still yet, get ony shadow.
10We ack jalike guys dat no can see.
We gotta touch da walls like peopo dat no mo eye.
Noon time, we stumble jalike almos dark time.
Wen we stay wit da strong guys,
We feel like da mahke guys.
11All us guys make sad kine noise jalike da bear.
We sound sad jalike da dove.
We stay wait fo God da Judge tell
Dat us guys do da right kine ting,
But he no tell notting.
We stay wait fo somebody get us outa trouble,
But dey too far from wea us guys stay.

12Yahweh, da way you see um,
Plenny time us guys go agains you.
An all da bad kine stuff us wen do,
Dat stay agains us in front da judge.
Cuz us guys stay go agains you,
An da blame fo dat, stay wit us foeva.
An us know awready, az true
Dat da tings us wen do, gotta need punish.
13We go agains Yahweh,
An show he no can trus us guys.
We no follow oua God
An turn away from him.
We tell peopo az okay
Fo make any kine to odda peopo
An go agains odda peopo.
We tink how fo bulai peopo,
An teach odda peopo how fo do same ting.
14Oua peopo no let da judges tell
Who gotta get punish.
Anybody like tell
Bout wass right an wass wrong,
Dey make um stay far.
Anybody like tell da truth,
Dey goin fall down on top da street.
Anybody like do wass right,
Dey no can even come inside oua town.
15No mo nobody dea tell da trut.
Whoeva like stop doing bad kine stuff,
Peopo go rip dem off.

Yahweh see all da bad stuff dat stay happen,
An he no feel good bout dat,
Cuz no mo nobody dea
Stay judge da right way.
16Yahweh, he see dat no mo nobody
Stay go agains da bad kine stuff.
He no can believe, no mo nobody
Even pray fo his peopo!
Dass why he do um himself
An use his own powa
Fo get his peopo outa trouble.
Cuz he do da right ting erytime,
He no need nobody fo help him.
17Fo make ready fo fight,
Yahweh put on his body armor.
Az how come nobody can hurt him.
Dat mean, he stay do da right ting erytime.
He put on his helmet.
Dat mean, he know how
Fo get his peopo outa trouble.
Da shirt he put ova da body armor,
Az jalike fo show da bad guys
How he goin pay um back
Fo eryting dey wen do.
Da fancy kine robe he wear,
Az jalike fo show
Dat he goin go all out fo do all dis.
18He goin pay dem back
Same same jalike dey wen do:
Huhu fo da guys dat hate him,
An payback fo da guys dat stay agains him,
Even fo da peopo on top da far islands!
19Da peopo from da wes side,
Dey goin get respeck fo Yahweh
Wen dey find out wat kine God him.
From da eas side, wea da sun come up,
Dey goin get respeck fo him
Wen dey see how awesome he stay.
Wen Yahweh come,
Goin come jalike one flood inside one small gulch,
An wit one strong wind from Yahweh
Dat goin make um move fas.

20Yahweh tell: “Da One dat goin pay da price
So dat his peopo no stay slaves no moa,
He goin come Jerusalem side,
Fo help da Mount Zion peopo,
Fo help da Jacob peopo
Dat befo time go agains God,
But dey stay sorry now
Fo go agains him.”
Dass one spesho message from Yahweh.

21Yahweh tell: “Dis, da deal I make
Fo da peopo dat stay my side.
My Spirit stay in charge a you guys,
An da tings I give you guys fo tell --
All dat no goin go way from you guys.
You goin tell um erytime.
An yoa kids goin tell um erytime.
An dea kids goin tell um erytime
From now an foeva.”
Dass wat Yahweh tell.