God's Peopo Get One New Name
(Matthew 21:5; John 12:15)
621Fo help God's peopo on top Mount Zion,
I no goin hold back an no talk!
Fo help da Jerusalem peopo,
I no goin stay quiet,
Till erybody can see,
Dat God's peopo get um right wit him,
Jalike wen da sun come up morning time,
An erybody can see
Dat God get his peopo outa trouble,
Jalike one torch dat stay burn nite time,
2Da peopo in all da countries goin see
All da right kine tings you guys stay do.
All da kings goin see
Dat you guys stay awesome.
You guys goin get one new name.
Yahweh goin give um to you guys.
3You guys goin be jalike one nice looking lei
Dat Yahweh get in his hand.
Jalike da kine head cloth da king guys wear
Dat God hold in his hand.
4Nobody goin tell you guys no moa
Dat yoa God wen leave you guys.
Nobody goin tell
Dat [no mo notting / nobody can live] ova dea inside yoa land.
But wen dey tink bout you guys, dey goin tell
Dat God stay [feel] good inside bout you guys.
An wen dey tink bout yoa land, dey goin tell
Dat God stay come jalike yoa husban.
5Jalike one young guy take one wahine fo come his wife,
You Jerusalem guys goin take Jerusalem town.
Jalike da young guy feel good inside bout his bride,
Yoa God goin stay feel good inside bout you guys.

6Eh you Jerusalem peopo!
I stay put guys on top yoa walls fo watch.
Day time an nite time,
Dey no goin stay quiet.
You guys dat stay pray to Yahweh
Fo no foget wat he wen promise fo do,
No res o go sleep.
7No let Yahweh res,
Till he make Jerusalem solid,
An make all da peopo on top da earth talk good bout him.

8Yahweh make dis promise
Cuz he get da powa fo make um happen:
“No moa, I goin eva let
Da peopo dat stay agains you
Take away yoa wheat.
I no goin eva again let da peopo from odda place
Drink da new wine you guys wen work hard fo make.
9But da guys dat cut da wheat,
Dey da ones goin eat um
An tell good stuff bout Yahweh.
An da guys dat cut da grapes,
Dey da ones goin drink da wine
Inside da Temple Yard
Dat Stay Spesho Fo Me.”

10Go, pass thru da town gates.
Make one place so my peopo can come back!
Build up da big road.
Take away da stones.
Hold up one flag
So da diffren peopos know wea fo go! 11Yahweh tell da peopo all ova da world fo lissen:
“Tell my Jerusalem peopo from Mount Zion,
‘Look! da One goin get you guys outa trouble,
He stay come!
Look! He stay bring wit him
Da ones he wen get outa trouble!’-”
12Dose peopo he goin bring,
Odda peopo goin call dem
‘Da Spesho Peopo Fo Yahweh,
Da Peopo Dat Yahweh Pay Da Price
Fo Get Um Outa Trouble.’
An peopo goin call Jerusalem,
‘Da Town Yahweh Wen Look Fo,
Da Town Yahweh No Goin Leave.’-”