Da Aram An Israel Armies Go Agains Jerusalem
(2 Kings 16:5; Matthew 1:23)
71King Ahaz was Jotham's boy, an Jotham was Uzziah's boy. King Pekah fo da Israel peopo was Remaliah's boy. One time, King Rezin fo da Aram peopo, wit King Pekah fo help him, wen go fight agains da Jerusalem town peopo Judah side, wea Ahaz was da king. But dey no even can go nea dea fo start da fight. 2Somebody tell David's ohana guys Judah side, “Da Aram army guys wen go by da Efraim ohana land inside Israel an stay make camp all ova da place wit da Israel guys.” So Ahaz an his peopo, dey come real scared inside. Dey stay shake jalike how da trees shake inside one fores wen da wind blow um.
3Den Yahweh tell Isaiah, “You an yoa boy Shear-Jashub (dat mean, ‘Some peopo goin come back’), go out dea meet Ahaz. Go by da end a da ditch wea da watta from da Mauka Watta Place go. Go on top da road dat go da field wea dey put da cloth inside da watta an step um fo come clean. 4Tell Ahaz, ‘Take care, but stay cool. No scared. Inside yoa heart, no lose fight! Fo shua, dose two kings, Rezin fo da Aram peopo, an Remaliah's boy, dey stay all hot an huhu. But dey jalike two small stick inside da fire dat litto mo all burn out, but still yet dey get plenny smoke. 5But cuz dey stay huhu, da Aram peopo stay make plan wit da Israel peopo an dea king, Remaliah's boy, fo do bad tings to you. 6Dey tell, ‘We go up country Judah side an bus up da Judah peopo. We goin fight an take dem ova an make dem come oua side. Den we goin make Tabeel's boy da king inside Judah.’-”
7But dis da ting my Boss Yahweh tell me:
“Wat dem guys stay tell, no goin happen.
No goin be lidat.
8Da main town inside Aram, dass Damascus.
Da main guy inside Damascus, dass King Rezin.
Befo 65 year pau,
Da Israel peopo goin come real bus up,
Dey no even goin be one peopo no moa.
9Da main town inside Israel, dass Samaria,
Da main guy inside Samaria, dass Remaliah's boy.
If you guys no stay shua bout dis,
Az cuz you no stay solid bout um.”
Da Sign Dat God Stay Wit Us
10Yahweh tell Ahaz again. 11He tell, “Aks me, yoa God Yahweh, fo show one sign so you know all dis stay true. Go aks, no matta if someting from da mos deep place o from da mos high place.”
12But Ahaz tell, “I no goin aks fo notting. No way I no goin tell Yahweh fo make proof!”
13Den Isaiah tell, “Lissen, you peopo from David's ohana. Not nuff, you guys, dat you make odda peopo tired. Now you gotta try make my God tired too! 14Cuz a dat, my Boss goin give you guys one sign. Dis da sign: goin get one young wahine dat neva yet sleep wit one guy, but she goin come hapai, an bumbye dat wahine goin born one boy. She goin call him ‘Immanuel,’ dat mean, ‘God stay wit us.’ 15Wen he come big, an he know wass right an wass wrong, an know fo pick ony wass right, dat time, goin get plenny soft cheese an honey kine stuff fo him eat. 16But befo he come dat big, da land dat you hate wea da two kings stay, goin come all bus up, an no mo notting goin stay dea. 17Yahweh Da Boss goin make you, an yoa peopo, an yoa fadda guy ohana, suffa plenny, mo plenny den you guys eva suffa befo, from da time wen da Israel peopo wen go agains an go way from da Judah peopo. He goin bring da king from Assyria fo make you suffa!
How God Goin Punish Da Judah Peopo
18Dis how goin be, dat time. Da Boss Yahweh goin bring big armies agains da Judah land. Goin be, jalike he goin whistle fo call all da flies from da Nile Riva an all da watta ditch far away inside Egypt, an all da bees from Assyria. 19Da armies all goin come. Goin be jalike wen da flies an da bees go down inside da gulches, inside da cracks inside big stone, inside places wea get kuku bushes, an all ova da pukas wea get watta. 20Dat time, you guys goin pay da king fo Assyria, fo his army come from da odda side da Eufrates Riva fo help you. But wen dey show up, dey goin clean out eryting you guys get. Goin be jalike somebody stay use one razor fo cut off all da hair from on top yoa head an legs, an even yoa beard, an you goin come shame.
21Wen all dat happen, one guy can keep alive ony one young cow an two goats. 22So from da cow an da goat, dey goin get milk, an da guy goin get nuff soft cheese fo eat. Da peopo dat da army guys no take away from inside da land, goin get soft cheese an wild honey fo eat. 23But afta da army guys go way, all da place wea had tousan grape plants worth tousan piece silva, now eryting dat goin grow afta, ony goin be kuku kine plants. 24Anybody go dea, dey goin take bow an arrow fo hunt, cuz ony get kuku bush all ova da place, ova dea. 25On top da hills, da place wea befo time dey hoe hana da grass, you no goin go dea no moa, cuz you scared da kuku plant goin poke you. Da land ony goin be fo let da cows an sheeps an goats go dea.