Da Assyria Peopo Goin Fight Da Judah Peopo
81One time, Yahweh Da Boss tell me, “Go get someting big fo write on top um. Den write da regula way, ‘Dis Fo Maher-Shalal-Hash-Baz.’ (Dat mean, ‘Rip um off an run away quick!’) 2I goin tell da pries guy Uriah, an Zekariah Jeberekiah's boy, fo come watch you write dat, cuz erybody know dey can trus dem guys an wat dey tell bout wat you wen write an wat time you write um.”
3Afta I do dat, I go sleep wit my wife, da wahine dat talk fo God. She get hapai, an born one boy. Yahweh tell me, “Call him Maher-Shalal-Hash-Baz. 4Az cuz befo dis small boy wen learn how fo say ‘Papa’ o ‘Mama’, da Assyria army guys goin steal all da rich kine stuffs inside Damascus town an Samaria town. Dey goin bring um to da king fo Assyria.”
5One mo time Yahweh talk to me fo tell dis:
6“Dis Judah peopo stay tink
Dat wat I stay do fo dem, az no good.
No matta I do good tings fo dem,
Jalike I give um da watta
Dat run slow inside da Siloam watta place.
But dey ony feel good cuz dey wen hear
Bout wat goin happen
To Rezin da king fo Aram,
An to Remaliah's boy da king fo Israel.
7Cuz dey no like wat I do fo dem,
You know wat goin happen?
I Yahweh, goin bring da king fo Assyria ova hea,
Wit all his awesome armies,
Fo go agains da Judah peopo!
Dey goin wack um
Jalike wen da big watta come down strong
Inside da Eufrates Riva
An go up ova da sides.
(Isaiah 7:14)
8Wen da armies come,
Goin be jalike one big riva stay run fast thru da Judah land,
Dat go all ova da land
Till da watta come up to da neck.
Wen da armies come,
Goin be jalike one big bird come flying,
An da wings cova yoa whole land, Immanuel!
‘Immanuel’ mean, ‘God stay wit us.’-”

9All you diffren peopos,
Go do all da bad kine stuff you do!
Den you goin lose fight cuz you scared.
Lissen, you peopo in all da far places in da world,
You stay get ready fo fight!
But you goin lose fight cuz you scared.
You, get ready fo fight one mo time!
But you goin lose fight again, cuz you scared.
10You goin talk an make plan,
But dat neva goin happen, cuz you no can do um.
You talk bout wat fo do,
But no goin happen lidat,
Cuz God stay wit us.
Dass wat ‘Immanuel’ mean!”
Ony Trus Yahweh Da Boss
(Rome 9:33, 10:11; Hebrews 2:13; 1 Peter 2:8, 3:14-15)
11Dis da ting Yahweh tell me, wen he take my hand fo make me strong. He tell me fo take care no go da same way dose peopo go. 12He say,
“No go tink you an yoa friends making plan fo do someting bad,
Juz cuz dis peopo say you guys making plan fo do someting bad!
Wen dis peopo stay scared bout someting,
You guys no need come scared bout dat,
O let dat ting make you come real scared an shaking!
13Me, I da one you guys gotta tink bout,
Cuz I Yahweh, da God Ova All Da Armies,
An I stay good an spesho.
You gotta be scared a me.
I da one, wen you tink bout me,
You goin come scared an shake!
14I stay good an spesho,
So I goin come jalike one spesho place fo peopo hide an rest.
But fo da Judah ohana an da Israel ohana,
I goin come jalike one stone an make dem trip an fall down.
An one trap fo catch da peopo live inside Jerusalem.
15Jalike plenny peopo goin fall down ova dat big stone,
An come all bus up.
An jalike dey goin get stuck inside dat trap
An come prisnas.”

16“Go write all dis down, fo make proof az true.
An den turn um ova to da guys I stay teach,
Fo keep inside dea hearts foeva,
Jalike you tie um up an put wax seal on top.”

17So, I goin wait, cuz I stay shua Yahweh goin come.
Right now, he stay cover his face so da Jacob ohana peopo no can see him.
But me, I goin stay wait fo him.
18Look - I stay right hea wit da kids Yahweh wen give me.
We jalike awesome kine signs inside Israel.
Even oua names show
Wat Yahweh, Da God Ova All Da Armies, goin do bumbye.
He da One stay on top Mount Zion inside Jerusalem.
19Peopo goin tell you, “Go by da wahines dat talk to da mahke peopo, an da guys dat know da kine spirit dat wispa an make small kine noise you no can undastan. Aks dem fo tell you wat goin happen bumbye.” But, eh! Mo betta da peopo go aks dea God wat goin happen, yeah?! No make sense, talk to da mahke peopo, an tink dat goin help da guys dat stay alive! 20Check out wat dem guys dat lissen to da spirits say. See if dey tell da same ting God's Rules tell, an if dey talk da same kine jalike wat you know Yahweh tell. If dey talk diffren kine, den wat dey tell no goin help you undastan notting. 21Da peopo goin go all ova da land, one side to da odda side. Dey goin feel plenny presha an dey goin stay hungry. An cuz dey hungry, dey goin come real huhu. Dey goin look up an swear at dea king an dea God. 22Dey goin look at da land, but dey ony see hard time dey goin get ova dea, jalike one dark time dat goin come, jalike da peopo get plenny presha an no can see notting, jalike somebody goin throw um all outside, inside da dark.