Da Peopo Stay Waiting Fo Da Spesho Guy God Goin Send
(Matthew 4:15-16; Luke 1:79)
91But all dat no goin matta! Bumbye, no goin be no mo hard time fo da peopo dat get dat kine presha now. Befo time, God wen make da peopo Zebulun an Naftali side lose face. But latas, he goin make odda peopo get respeck fo da peopo inside Galilee, nea da road dat go from da Jordan Riva to da Mediterranean Sea. Dass da place wea plenny peopo dat not Jews stay.
2Da peopo dat donno wat fo do,
Jalike dey stay walk aroun inside one dark place,
Dey goin know wat fo do,
Cuz jalike dey see one big light.
Da peopo dat live inside da place
Wea erybody stay scared dey goin mahke,
Da light stay come dea awready.
3God, you goin make da Israel peopo come mo plenny peopo.
You goin make da peopo come real good inside.
Dey goin dance an sing in front you,
Jalike wen da peopo cut da food inside dea fields
An dey stay good inside,
An jalike wen da army guys steal rich stuffs from da guys dey wen fight,
An give dea friends some a da stuff,
Dey all stay good inside.

4Jalike you wen do befo time,
Wen da Midian peopo make da Israel peopo work hard fo dem.
You wen hemo da Israel peopo
From da hard work da Midian peopo make dem do.
Jalike you wen stop da Midian peopo so dey no hit dem wit stick
An poke dem so dey work mo fast.
5Fo shua, ery boots da army guys wear wen dey fight,
An ery clotheses dat blood all ova um,
Dey goin throw all dat kine stuff on top da fire
Fo burn um.

6Cuz fo us one kid wen born,
One boy dat God give us.
God goin give him da power fo stay in charge.
Dey goin give da name,
“Da Awesome One.
Da One dat teach us awesome stuff an how we gotta do um.
Da Real God dat get all da power.
Da Fadda dat stay foeva.
Da leada dat make eryting go good fo us.”
7He goin come da leada
Fo mo an mo place,
An he goin make eryting come good fo erybody,
An he no goin stop doing dat.
He goin be da king on top da throne
Jalike King David, his ancesta guy.
He goin judge erybody da right way,
An he goin do da right ting erytime.
From da time he come da king,
He goin make shua he stay king foeva.
All dis goin happen
Cuz Yahweh, Da Boss Ova All Da Armies,
Goin make shua dis goin happen.
God Stay Huhu Wit Israel
8My Boss wen tell me fo talk agains da Jacob ohana.
An wat I tell, goin go agains da whole Jacob ohana.
9All da peopo dea goin know wat God say,
Da Israel peopo, an da peopo inside Samaria town.
But dey come high nose, an get big head.
Az why dey talk lidis:
10“Da bricks all fall down,
But neva mind, we goin build um up again wit cut stone block.
Da army guys cut down da sycamore trees,
But neva mind, we goin plant cedar trees dea
Wea da sycamore wen grow.”
11So Yahweh stay make da peopo dat stay agains King Rezin from Aram
Come plenny strong, so den da Israel peopo no can win dem.
He stay tell da peopo dat like bus up da Israel peopo
Fo go geev um.
12Da Aram peopo from da east side,
An da Filisha peopo from da west side,
Dey go agains da Israel peopo
An dey win um.

An Yahweh stay huhu wit da Israel peopo still yet,
An he stay ready fo bus um up.

13Cuz da Israel peopo still yet no lissen
An come sorry fo da bad stuff dey do
An come back to da One dat stay bus um up,
An still yet dey no like even find out
Wat Yahweh, Da God Ova All Da Armies, tell dem fo do.
14In one day, Yahweh goin cut off all da diffren kine peopo,
Jalike he cut off dea head an dea tail,
An same time, he goin cut off da top palm tree branch up dea,
An da reed plant dat grow down inside da mud.
15(You know, dea older leadas an da ones dey get respeck fo,
Dey jalike da head.
Da guys dat say dey talk fo God, but dey bulai peopo wen dey teach,
Dey jalike da tail.)

16Az how come, da ones who stay lead dis peopo,
Dey make um go da wrong way,
An az how come, da peopo dat lissen to dea leadas,
Dey come all mix up an donno wat fo do.
17Dass why my Boss
No goin feel good bout da young guys,
He no goin show pity notting
Fo dea widows o dea kids dat no mo fadda o mudda.
Cuz all dem peopo ack jalike God no matta to dem,
An still stay do bad kine stuff.
Ery one a dem, get pilau mout.

An Yahweh stay huhu wit da Israel peopo still yet,
An he stay ready fo bus um up.

18Cuz wen somebody do bad kine stuff,
Az jalike how wit one big fire.
All da kukus an da grass burn,
An all da trees burn too,
Wit plenny black smoke dat go up in da sky.
19
Yahweh, Da Boss Ova All Da Armies,
He no can take da bad kine stuff dey do.
Dass why he huhu, an da land stay all burn.
So da peopo, dey jalike da kine stuff dat da fire goin burn up.
Nobody show pity fo dea ohana.
20Ova one side, dey goin steal food an eat,
But still yet dey hungry.
Ova hea one side, dey eat stuff,
But dey no come full.
Dey even goin eat dea own kids .
21(I mean dis:
Da Manasseh ohana goin eat da Efraim ohana,
An da Efraim ohana goin eat da Manasseh ohana.
An togedda, dey goin eat da Judah ohana.)

An Yahweh stay huhu wit da Israel peopo still yet,
An he stay ready fo bus um up.