Da End Time
(Matthew 24:15; Mark 13:14)
121Da angel messenja guy tell me dis: “Dat time, Michael, da importan angel prince, da one dat take care yoa peopo, he goin go by you guys fo take care you. Goin get one time get plenny trouble, mo den dey get from da time yoa peopo wen come one nation firs time, till dat time. But dass da time wen yoa peopo, da ones dat get dea name inside God's book, goin get outa trouble. 2Plenny peopo dat stay mahke, jalike dey stay sleep unda da groun, dey goin come alive one mo time, jalike dey wake up. Some a dem goin come alive fo get da kine life dat stay foeva. Odda peopo goin come alive fo come shame foeva, an odda peopo goin feel pilau wen dey even tink bout dem. 3Da ones dat know how come dese tings happen, dey goin shine jalike da sky get plenny light. An da ones dat help plenny peopo fo do da right kine tings, dey goin shine jalike da stars foeva an eva.
4But you, Daniel, put seal on top da roll up sheep skin, so eryting inside stay secret till da world pau. Plenny peopo goin run aroun dis side an dat side fo try find out mo plenny bout all dis stuff.”
Da End
5Den me, Daniel, I look. Right dea in front me, two odda guys stay standing! One guy stay stand on top one side a da riva, an da odda guy stay stand on top da odda side a da riva. 6One a dem tell da angel guy dat get da linen clotheses, dat stay ova da watta inside da river, “How long goin be till all dis stuff happen, an make erybody's jaws drop?”
7Da guy wit da linen kine clotheses, dat stay ova da watta inside da river, lift his two hands to da sky. I hear him make one strong promise in front God dat stay live foeva. He tell, “Goin be three an a half year till dat time come. Wen da one dat make big kine trouble, pau take away da power from da peopo dat stay spesho fo God, all da stuff I wen tell you goin pau too.”
8Me, Daniel, I hear wat da guy tell, but I no undastan. So I tell, “Boss, wat goin happen afta all dis kine stuff pau?”
9He tell, “Daniel, dass not yoa kuleana. Go awready. No aks mo question. Cuz all dis stuff stay secret till da world pau.
10Plenny peopo goin clean up
All da bad kine stuff dey get inside,
So no mo notting bad goin stay inside dem.
All dat goin be jalike one test
Fo make shua dey stay clean inside.
But da bad kine guys goin still stay do bad kine stuff.
No goin get nobody from da bad kine guys
Dat goin undastan.
But da leada guys dat know how come all dis stay happen,
Dey goin undastan.
11“From da time da bad leada guy no let da peopo make sacrifices fo ery day, an put up da idol kine gods dat God hate plenny inside da Temple, an mess up eryting an make erybody go way from dea, goin be 1,290 days. 12But da peopo dat can wait, an hang in dea till da end a da 1,335 days, dey goin stay good inside!
13An you, Daniel, go do yoa work till da time you mahke. Den you goin res. An wen da world pau, you goin come back alive an get yoa share a da good tings God get fo his peopo.”