Daniel Inside Da Hole Wit Da Lions
61King Darius tink az good fo make hundred twenty guys governas fo da districks all ova da land wea he stay king. 2Get three supavisa guys dat watch ova wat da govna guys do. An Daniel, he stay one a da three supavisa guys. Da governa guys gotta tell da supavisa guys eryting dey doing, so dat da king no need worry notting. 3Da guy Daniel, he come mo betta den all da odda supavisa guys an govna guys. An because inside him, he stay real good, da king make plan fo put Daniel in charge a da whole land wea he stay king. 4Cuz a dat, da odda supavisa guys an da governa guys try fo find someting fo poin finga at Daniel, dey look at how he do fo da govmen. But dey no can find notting fo poin finga, cuz erybody trus him an he no mess up notting. 5Dey tell, “We no goin find notting fo poin finga at Daniel, eva. Da ony ting fo poin finga at him, gotta be da rules a his god, cuz da rules stay diffren!”
6So da odda supavisa guys an all da govnas go togedda in front da king. Dey tell, “King Darius, we like fo you live foeva! 7Us supavisa guys fo yoa land, an govna guys, an govna guys fo da districks, an all da odda govmen guys, an da older leada guys, we all wen talk. We tink az good fo you, da king, fo make one rule, an make shua nobody broke um. Dis da rule: dat da peopo gotta pray to you, da king. Whoeva pray to one nodda god o one nodda guy, fo da nex thirty days, throw dem down inside da big hole wea you put da lions. 8We like fo you, King Darius, fo tell da peopo dat, an write down da rule, so no mo nobody can change um. Make um jalike one rule fo da Mede peopo an da Persia peopo, so dat no mo nobody can change da rule. 9Cuz a wat dey tell him, King Darius sign da paypa dat say ony can pray to da king.
10Wen Daniel find out dat da king sign da paypa fo da rule, he go home inside his house. Da windows fo da top room stay open an face Jerusalem. Three times ery day inside dat room, Daniel go down on top his knees fo tank God cuz he do good tings. Wen he pray, he tell God he da bestes, jalike how he do befo time. 11Den dose guys dat stay agains Daniel go his house all togedda an see him praying an aksing God fo help. 12So dey go by da king, an tell him bout da rule he wen write. Dey tell, “Eh! You jus write down one rule, yeah? dat fo thirty days, whoeva no pray ony to you da King, but pray to anodda god o anodda guy, yoa guys goin throw um inside da big hole wea da lions stay!”
Da king tell, “Dass da rule! An dass da rules fo da Mede an Persia peopo, dat no mo nobody can change um.”
13Den dey tell da king, “King Darius, dis guy Daniel, one a da guys da Babylon peopo wen bring hea from Judah, he no lissen to you, o da rule you wen write, an you da King! He still yet pray three times ery day!” 14Wen da king hear dat, he no can tink good. He tink hard fo figga how fo help Daniel, till da sun go down. He try fo do eryting he can fo no let um mahke.
15Da guys dat stay agains Daniel go togedda in front da king one mo time, an tell um, “King Darius, rememba dat da rules fo da Mede an Persia peopo tell dat no mo nobody can change da rules dat da king make.”
16So da king tell his guys fo bring Daniel. Dey throw um down inside da hole wea dey put da lions. Da king tell Daniel, “Yoa God, da One you show respeck fo real plenny, ony him can get you outa dis, cuz I no can!”
17Da king guys bring one big stone an put um on top da puka fo go down inside da hole. Den dey put clay aroun da stone so no can open, an da king put his mark on top da clay wit his own spesho ring fo seal um. His ali`i guys put mark wit dea rings too, so nobody can do notting fo Daniel. 18Den da king go back inside his palace. He no eat notting all nite, an no like nobody play music o make party fo him o do odda stuff. He no can sleep.
God No Let Da Lions Hurt Daniel
19Morning time wen get litto bit light, da king get up an he go by da big hole wea dey put da lions quick. 20Wen he come nea da lion hole, he call Daniel wit sad kine voice. “Daniel, da worka guy fo da God dat stay alive! Yoa God, da One you work fo erytime, he wen get you outa dis, o wat?!”
21Den Daniel tell da king, “King Darius, I like you live foeva! 22My God wen send his angel messenja guy, fo make da lions no bite me. Dey no touch me notting, cuz God see me, dat I neva do notting wrong. An I neva do notting wrong to you too, King Darius.”
23Den da king come real, real good inside. He tell his guys fo bring Daniel outa da big hole. Wen dey bring Daniel outa da hole, dey find no cuts on top him, notting, cuz he trus his God.
24Den da king tell his guys fo go get da guys dat wen bulai an poin finga Daniel. He tell um fo throw dem an dea wifes an kids inside da hole wea da lions stay. Dey neva even touch da bottom a da hole, da lions grab um an grind um up, even da bones.
25Lata, King Darius write fo all da diffren peopos from ery country, an ery language, dat live all ova his land. He tell:
I like eryting come real good fo erybody.
26“Dis da rule: All ova da land wea I stay king, erybody gotta come scared an shaking in front Daniel's God, an get respeck fo him.
Cuz he da God dat stay alive.
He live foeva.
No mo nobody can wipe out
Da peopo wea he stay da king.
He goin stay in charge foeva.
27He get his peopo outa trouble.
He do awesome stuff an stuff you no believe he can do
Inside da sky an on top da earth.
He wen get Daniel outa trouble
So da lions neva hurt him.”
28Az why eryting go good fo Daniel, all da time Darius an Cyrus from Persia stay king.