Daniel Dream Bout Four Wild Animals
(Matthew 24:30, 26:64; Mark 12:36; 13:26, 14:62; Luke 21:27; Jesus Show 13:7)
71Da year numba one wen Belshazzar stay king inside Babylon, Daniel get one dream. He see pichas inside his head wen he stay lay on top his bed. Lata, he wen write down da main tings he wen see. 2Daniel tell:
“Nite time, inside my dream, I see da sea come real rough cuz get da winds from four side make da ocean all choppy. 3Four big kine wild animal come up outa da sea. Da four animal, dey all look diffren.
4Da firs wild kine animal, look jalike one lion, but get wings jalike one eagle. I look long time. Den somebody broke off da wings. Somebody carry um up from da groun, an make um stand on two feets jalike peopo, an make um come jalike one man inside, so he tink jalike peopo.
5Den in front me I see anodda wild animal, numba two, dat look jalike one bear. He sit on his back legs, an he get three ribs in his teeth. Somebody tell um, “Get up! Eat all da meat you like!”
6Afta dat I look one mo time. Get one nodda wild animal, jalike one leopard. On top da back get four wing jalike one bird. Da animal get four heads. Somebody give um da powa fo stay in charge a da peopo.
7Afta dat, same nite, get mo stuff I see in da dream. Get one nodda wild animal, numba four. He look scary an get plenny powa. He get big iron teeth. He stay smash wateva he like, an eat um, an smash wateva stay lef ova wit his feet. Dis one look real diffren den da odda wild animals dat come befo him, cuz he get ten horns.
8Wen I still stay tink bout da horns, get one odda small kine horn come up inside da middo a da odda horns. Dis horn make three a da horns dat stay dea firs time, broke off. Dis horn, get eyes jalike peopo, an get one mout dat talk big.

9I stay look some moa, get thrones set up ova dea
Fo da judge guys.
Da One Dat Stay From Befo Time sit down dea.
His clotheses stay all white jalike da snow.
Da hair on top his head
Stay white jalike da bestes kine wool.
His throne, jalike was burning,
An da wheels undaneat jalike burning too.
10From wea he sit,
Can see one fire dat look like one river stay burning,
Going out from in front him.
Plenny peopo do his work,
Mo plenny peopo stay by him.
Den da judge guys sit down start dea work
An dey open da books.
11Den I still yet look back, cuz a da way da horn talk, jalike he big. I still look till somebody kill da wild animal numba four an throw um inside da fire fo burn um up an wipe um out. 12(Somebody take away da powa from da odda three wild animals, but he let um stay alive litto bit mo, till da right time.)
13Den, still inside my dream nite time, I see,
Right dea in front me get somebody
Dat look jalike one guy!
He stay come from da clouds inside da sky,
Fo go by Da One Dat Stay From Befo Time.
Da peopo dea bring da one dat look jalike one guy
In front Da One Dat Stay From Befo Time.
14Da One Dat Stay From Befo Time give da guy
Da powa fo stay in charge.
He make people get respeck fo him
An let him be dea king.
All da diffren peopos
From ery country an ery language
Goin show dat guy love an respeck.
Da powa he get fo stay in charge,
He get um foeva.
Dat powa no goin pau eva,
An no mo nobody goin ovathrow him.
Wat Da Dream Mean
(Jesus Show 13.7)
15“Me, Daniel, inside me I no can tink awready. Da pichas I see inside my head stay scare me. 16I go by one a da guys dat stay standing ova dea, an aks him wat da tings I see, mean fo real kine.
“So he help me fo know wat all dat stuff mean. He tell:
17‘Dey da four big wild animal, dey da four king kine powas an dea peopos from dis world dat goin take ova. 18But da ones dat stay spesho fo da God Dass Mo Importan Den All Da Odda Gods, dey goin get da right fo be da king guys, an dey goin keep um foeva an eva.’
19“Den I wen really like make shua, bout da numba four wild animal. He diffren den da odda three animal. He real scary cuz a his iron teeth an bronze claws. He stay eat up wateva he like, an smash wit his feet wateva stay alive. 20An den I like know bout da ten horn on top his head too, an da odda horn dat come up, an da three horn dat fall off in front da new horn. Dat horn look mo importan den da odda horns, an get eyes an one mout dat talk big. 21Den wen I look, dat horn stay make war agains dose dat stay spesho fo God, an start fo win dem. 22He stay make lidat till Da One Dass From Befo Time come, an da Judge tell “Da ones dat stay spesho fo Da God Dass Mo Importan Den All Da Odda Gods, dey stay right.” Den da time come wen dose dat stay spesho fo him, take ova an stay in charge a eryting.’
23“Da guy dat tell me all dis stuff tell me dis too:
‘Da numba four wild animal,
He jalike da numba four country
Dat goin take ova da world.
Goin be diffren den da odda countries
Dat take ova befo him.
He goin eat up da whole earth,
An walk ova um, an smash um.
24Da ten horn, dat mean,
Goin get ten kings goin come from dat country,
Dat get powa.
Afta dat, one nodda king goin come,
Diffren from da odda kings befo him.
He goin take ova three a da kings land.
25He goin talk agains da God
Dass Mo Importan Den All Da Odda Gods,
An give presha fo da peopo dat stay spesho fo God.
An goin try fo change
Da regula times fo make sacrifice
An change da rules from God.
He goin get powa
Ova da peopo dat stay spesho fo God
Fo three an a half year.
26Den da judge guys goin sit down an do dea work. Dey goin take away dat king's powa, an wipe out his powa foeva. 27Den, da God Dass Mo Importan Den All Da Odda Gods goin give da peopo dat stay spesho fo him, da powa fo come da nex king, an da power fo stay in charge a da peopo. An da God Dass Mo Importan Den All Da Odda Gods give his kings powa ova da odda kings all ova da world. Dey goin stay in charge foeva. All da countries on top da earth goin work fo God's peopo, an all da odda peopos goin lissen dem.’
28“Dass da story, by me, Daniel. But dis story wen bodda me plenny, an give me chicken skin cuz I scared. Az why I no talk bout um.”