Amos
Talk Fo God
Da Israel Peopo Do Bad Kine Stuff
Da Guy Dat Talk Fo God
(Amos 9:7-15)
11Dis wat Amos wen tell.
Amos, he one a da guys from Tekoa dat know how fo breed da sheeps spesho kine. Dat time, Uzziah was king Judah side. Same time, Joash boy Jeroboam was king Israel side.
Dat time, Amos wen see someting jalike one dream, bout wat goin happen to da Israel peopo. Was two year befo da big eartquake, you know.
God Get Power Fo Punish
(Amos 5:8-9; 9:5-6)
2Dis wat Amos wen tell:
“Yahweh Up Dea Inside Da Sky,
He make big noise from Zion Mountain!
He talk strong from Jerusalem town, jalike thunda!
Wen he do dat, da places wea da sheep farmas go fo find grass,
No mo grass, notting.
An da trees on top Mount Carmel all dry up.”
Da Israel Peopo, Mo Worse Den Da Odda Peopos
(Amos 1:3-3:2, 8:4-9:4)
Da Damascus Peopo
3You betta lissen! Dis wat Yahweh say:
“Too much times awready, da Damascus peopo wen go agains me.
Az why, no way I goin let um go an no punish dem!
Da buggas wen trash da Gilead peopo
Jalike dey wen go drag one heavy board wit plenny spikes ova dea bodies.
4Dass why I goin send army guys fo burn da palace
Dat dea King Haza`el wen build.
Dis fire goin eat up eryting dea,
An da Ben-Hadad Fort wit strong walls too.
5I goin broke da gate fo Damascus town
An wipe out da main guy fo `Aven Valley,
Da guy dat stay in charge Bet-Eden side.
Da Aram peopo, I goin catch dem
An take um all away Kir side.”
Dass wat Yahweh say!
Da Filisha Peopo
6You betta lissen! Dis wat Yahweh say:
“Too much times awready, da Gaza peopo wen go agains me.
Az why, no way I goin let um go an no punish dem!
Dey wen catch one whole peopo
An sell um to da Edom peopo fo be dea slaves.
7Dass why I goin send army guys fo burn da Gaza town wall
An burn up da palaces wit strong walls.
8I goin wipe out da leada fo Ashdod town
An da guy in charge Ashkelon town.
I goin go agains da peopo dat live Ekron town.
Da odda Filisha guys, dey goin come poho too.”
Dass wat Yahweh say!
Da Tyre Peopo
9You betta lissen! Dis wat Yahweh say:
“Too much times awready, da Tyre peopo wen go agains me.
Az why, no way I goin let um go an no punish dem!
Dey wen sell one whole peopo to da Edom peopo,
Cuz dey neva like do da right ting fo dea brudda guys.
10Dass why I goin send army guys
Fo burn down da Tyre town wall.
Da fire goin eat up da palaces wit strong walls.”
Da Edom Peopo
11You betta lissen! Dis wat Yahweh say:
“Too much times awready, da Edom peopo wen go agains me.
Az why, no way I goin let um go an no punish dem!
Dey wen go hunt dea brudda guys, da Israel peopo,
Wit sword fo kill.
Dey neva like show pity fo da Israel peopo.
Dey like stay huhu foeva
An no mo cool head, eva.
12Dass why I goin send army guys for burn Teman town,
An da fire goin eat up da palaces wit strong walls, Bozrah town.”
Da Ammon Peopo
13You betta lissen! Dis wat Yahweh say:
“Too much times awready, da Ammon peopo wen go agains me.
Az why, no way I goin let um go an no punish dem!
Gilead side, dey even wen rip open da hapai wahines
Jus so dey can take ova mo plenny land.
14Dass why I goin make da Rabbah town wall burn
An da fire goin eat up all da palaces wit strong walls.
Goin get war an yelling
An fighting jalike one wild wind storm.
15Da king fo da Ammon peopo, an his officer guys,
I goin take um all away togedda.”
Dass wat Yahweh say!
Da Moab Peopo