41Amos wen say dis too:
“Eh! You Samaria wahines! Lissen!
You guys jalike da fat cows from Bashan
Dat eat grass on top da hills Samaria side!
You wahines give hard time to da peopo dat no mo powa
An you make any kine to da peopo dat no mo notting.
You guys erytime telling yoa husbands,
‘Bring us mo booze fo drink!’
2My boss Yahweh, he good an spesho.
Cuz a dat, he wen make one strong promise lidis:
‘Goin get one time,
Jalike peopo goin stick meat hook inside you guys
An drag you guys one nodda place.
Dey goin stick big fish hooks in yoa okole
An drag you guys outa hea!
3Dey goin drag ery one a you wahines
Thru da places wea yoa town wall bus up an fall down
In front yoa house.
Dey goin throw out you guys
An take you guys away Harmon side.’
Dass wat Yahweh say.”
Da Israel Peopo Still No Learn Notting
(Amos 4:4-4:12, 5:18-6:14)
4Amos tell: “Dis wat da Boss Up Dea say:
‘Eh you Israel peopo! Go Bethel side fo pray!
But you know wat? Wen you go ova dea,
You guys ony go agains God!
You go Gilgal side fo pray!
But you know wat? Wen you go ova dea,
You guys ony go agains God, mo plenny still yet!
So den, wen you go ova dea, nex day morning time,
Take da animal fo da sacrifice to da pries guy.
Da day afta dat, take da ten percent you suppose to give God.
5Burn some a da bread you suppose to sacrifice
Fo tell God “Mahalo plenny!”
An brag plenny wen you guys give God someting you no gotta give.
Cuz dass da way you Israel peopo jus love fo do um, big time.’
Dass wat my boss Yahweh say.
6Dis wat Yahweh say:
“Was me dat wen make da peopo inside ery town hungry to da max!
So neva have bread, any place.
Still yet, you guys no like come back an be my guys.”
Dass wat Yahweh say.
7Yahweh say:
“Da time you guys wen need da rain da mostes,
Fo three month befo you cut da food,
Was me dat hold back da rain.
I wen make da rain go one town an not da odda town.
Had rain one field, an one nodda field dry up.
8Had peopo from two three towns,
So thirsty, yeah? dey gotta stagga to one nodda town
Fo try get watta fo drink,
But dey no can find nuff.
Still yet, you guys no like come back an be my guys!”
Dass wat Yahweh say.
9Yahweh say:
“I wen wack da farms you guys own
An da fields wea you grow grape
So dat da hot wind an da groun worms wen mess up eryting.
Da grasshoppa wen eat up all da fig tree an olive tree dat you guys own.
Still yet, you guys no like come back an be my guys!”
Dass wat Yahweh say.
10Yahweh say:
“Was me wen send da sick fo make trouble fo you guys,
Same ting jalike befo time
I wen make da Egypt peopo come sick.
War time, was me wen kill yoa young guys
An let da odda peopos catch you guys horses.
Auwe! Pilau stink, from da mahke army guys inside yoa camp!
Still yet, you guys no like come back an be my guys!”
Dass wat Yahweh say.
11Yahweh say:
“I wen wipe out some a da towns wea you guys live,
Same ting jalike I wen wipe out Sodom town an Gomorrah town befo time.
You guys wen get outa yoa towns alive, yeah?
But jalike sticks dat somebody pull quick outa da fire,
Stay half burn awready.
Still yet, you guys no like come back an be my guys!”
Dass wat Yahweh say.
12Yahweh say dis:
“Cuz a dat, I goin make all kine bad kine tings happen to you Israel peopo,
Jalike I wen tell you guys awready.
Eh! You Israel peopo! Get ready fo stand in front me, yoa God!
Cuz I da Judge, an I goin punish you guys!”
God Get Da Power Fo Make Eryting
(Amos 5:8-9, 9:5-6)
13Amos tell dis:
“You know wat? Yahweh,
He da one dat shape da mountains.
He make da wind an give peopo dea spirit inside.
He tell peopo eryting he tinking.
He take da light wen da sun stay coming up
An make um come dark one mo time.
He stay da king fo da mos high places inside da world!
Yahweh, Yahweh Fo Da Armies.
Dass wat kine God him!”