61Amos say dis too:
“Auwe, you guys dat stay tink you no mo notting fo do o no worry bout notting on top Zion hill, Jerusalem town!
An you guys dat stay tink you okay, Samaria town!
Auwe! You leada guys fo yoa country,
Who da Israel ohana peopo tink you guys can help dem!
2You guys tell yoa peopo,
‘Go da towns da Assyria army guys take ova awready,
Go Kalneh, mauka side long way, an check um out,
Come back by da big town Hamat,
Den go makai side by da Filisha peopo, Gat town.’
You tinking you guys mo betta den dose countries, yeah?
You guys tink yoa land mo big den dea lands, yeah?
Not even!

3“Auwe, you guys! You tink goin be long time
Befo bad tings goin happen to you guys!
But da way you guys ack, you ony making shua
Dat da guys dat like bus you up
Goin take ova you mo quick!

4“Auwe, you guys! Yoa lay down on yoa pune`e all day, all fix up wit fancy kine ivory.
You guys lay down all day an grind da lu`au food,
From bebe sheeps an cows!
5You guys pick up da guitar fo jam
An make new kine songs --
An you tinking, ‘I can make da music
Same same, jalike King David!’
6You guys drink da wine,
Da whole calabash one time!
You guys use da real expensive kine perfume oil.
But yoa ohana, da Joseph ohana, litto mo goin be poho.
An still yet, you guys no care, an no make you guys feel sick!

7“Fo shua, pretty soon now,
Da Assyria army guys goin come drag you guys outa hea.
You guys goin be da first one.
Den you no can lay dea an grind at da religious lu`aus fo da odda gods,
Cuz dey goin pau fo you guys.

8“My boss Yahweh, he make strong promise,
An he no need odda guy fo help him do um, jus him.
Dis wat Yahweh say, ‘Watch out!
Me, I so mad wit dem Israel guys!
Dey dea Israel ohana mo betta den anybody!
Dey get strong walls, but I going agains um!
Dea main town, an da peopo inside,
I goin give all a dem
To da guys dat stay agains um.’-”
Dass wat Yahweh say, an you know, yeah? he da God Fo All Da Armies.
9Dat time, if get ten peopo dat stay inside one house, still yet bumbye dey all goin mahke. 10So, wen somebody mahke, one ohana guy goin come take da body outside da house fo burn da body. Dat ohana guy goin go inside da house an yell to whoeva stay inside da back a da house, “Hui! Still yet get odda peopo wit you?”
Den da guy inside da back a da house goin say, “No mo! Ony me!”
Da ohana guy goin say, “Eh, no talk! Make shua nobody say Yahweh name inside dis place!”
11Cuz you know wat? Yahweh, he da one dat say da ting,
An cuz a dat, da big houses come all bus up
An da small houses come jalike rubbish.

12Eh! You tink da horse can run fast on top da pali?
You tink da farma guy can plow da ocean watta?
No can!
Jalike wen somebody like judge da right way,
Dey no can, cuz you guys make shua come out bad jalike poison!
Wen get anybody dat stay do da right ting,
You guys make shua dey no can,
Cuz you guys make stink kine stuff happen to dem!

13Get Israel guys dat feel real good inside
Cuz dea army guys wen take ova Lo-Debar, da notting town!
But dey bulai. Dey say, “You know wat?
Us guys so strong, we wen take ova Karnaim, da muscle town!”
14But you know wat Yahweh say, da God Fo All Da Armies? He say dis:
“Eh, you guys from da Israel ohana!
I goin bring da army from one nodda country
Ova hea fo go afta you guys.
Dey goin make plenny trouble fo you guys, an chase you all da way
From Hamat Pass, north side,
To da Arabah Valley, south side!”