Wat Happen To Da Talka Fo God
Da Ripe Fruits
81Den Amos say: “One nodda time, dis wat my boss Yahweh wen show me. Was jalike one dream. Get one basket wit ripe kine fruits inside dat ony get summa time. 2Yahweh den aks me, ‘Eh Amos! Wat you see ova dea?’
“I tell um, ‘One basket. Inside, get ripe kine fruits dat ony get summa time.’
“Den Yahweh tell me, ‘Dass jalike my own peopo, da Israel peopo. Litto bit mo an dey goin come pau too. No way I goin let dem go again!’
3“My boss Yahweh, he tell dis too: ‘Wen dat time come, da peopo dat going sing inside da Temple, no can sing, cuz dey sore inside an stay cry loud. Dey goin tell:
‘Get so plenny mahke bodies!
All ova da place!
Take um outside da town!
An no talk!’-”
God Punish Da Israel Peopo
(Amos 1:3-3:2)
Da Rich Ones
4Den Amos tell:
“So! You rich guys, you betta lissen to dis!
You guys go all out fo make presha
Fo da peopo dat no mo notting,
An you try fo wipe out guys inside yoa land
Dat stay scared fo stand up agains you.
5You guys, dis wat you tinking, yeah?
‘Us guys no like wait fo da new moon time
Wen pau da religious kine stuff!
Cuz us guys like sell food.
But no can, till da religious kine stuff pau!
An us guys no like wait fo sell da wheat
Till da Rest Day pau.
Us guys goin make uku paila money,
Cuz da measure us guys use,
Goin be mo small den suppose to be.
We goin take da money from da peopo
Fo mo den wat suppose to be wort.
Den, wateva dey buy,
We goin mess up da scale too.
6We even pick up da junks from da wheat
An sell dat too.
Den we use dat money
Fo go find peopo dat no mo notting,
An odda guys dat owe somebody money fo one pair slippa,
An we buy dem cheap
Fo come slaves fo us guys.’-”
God Goin Shake Up Da Whole World
7Amos tell dis: “Da Israel peopo, dey real big head, cuz dey Yahweh peopo. But Yahweh da one dat wen make strong promise lidis:
‘Fo shua, I no goin foget
Da bad kine tings da Israel peopo wen do, eva!
8So, wat? You tink da groun goin shake
Cuz a all dat bad kine stuff?
Fo shua, goin shake!
You tink erybody dat live inside dat land
Goin cry plenny?
Fo shua, dey goin cry plenny.
Da whole land goin move up an goin shake
An goin move back down
Jalike da Nile Riva, Egypt side.’
9“My boss Yahweh say dis too:
‘Wen da time come, I goin make da sun come dark, noon time.
Dass wen da whole world goin come dark, no matta day time.
10Weneva you guys do religious kine stuff dat make you feel good,
I goin change um an make you guys come sad.
Wen you guys sing,
I goin make you guys sing sad kine song.
I goin make erybody stay sore inside
An wear burm bag kine cloth
An shave bolohead fo show dey stay sore inside.
Goin be jalike wen da fadda-mudda guys come sad
Cuz dea one an ony boy, mahke.
Dat time, goin be jalike eryting taste real bad, till da end.’-”
Da Peopo No Lissen God
11Amos say dis: “Dis wat my boss Yahweh tell: ‘You know wat?
Goin come da time,
I goin make erybody all ova da land
Feel jalike dey hungry.
But I not talking bout hungry like fo bread
O thirsty like fo watta.
Me, Yahweh, I talking bout dis:
Dey goin like hear all da tings I wen tell befo,
Cuz dey goin come hungry fo hear all dat now! 12Dey goin go aroun from one sea to da odda sea, an from da nort side to da east side. Dey goin go all ova da place, aksing peopo “Eh! Yahweh, wat he trying fo tell us guys?” But dey no goin find out notting.’
13“Dat time, even da good looking young girls an da young guys goin pass out cuz dey so thirsty. 14All dose peopo dat stay tink lidat, wen dey make strong promise, dey aks da pilau idol kine god dat da Samaria peopo pray to, fo wipe dem out if dey no do wat dey promise! O dey tell
‘I shua dat I goin do um,
Jalike I shua dat da idol kine god dat da Dan ohana peopo pray to, stay alive!’
O ‘jalike I shua dat da idol kine god we go pray to Beersheba side, stay alive!’

But all dose peopo dat make dat kine promise, dey goin fall down an mahke.
Dey no goin get up, eva!”
Dass wat Yahweh say.
Wen God Punish, No Can Run Away