God Tell Jonah Fo Go Nineveh
(2 Kings 14:25)
11Had one guy Jonah. His fadda, Amitai. One time, Yahweh wen tell Jonah fo talk fo him. An dis wat Yahweh wen tell Jonah: 2“No wait! Go Nineveh town now, da main town Assyria side. Tell all da peopo ova dea, I know awready, all da pilau kine stuff dey stay do.”
3But Jonah, he neva lissen. He wen go da odda way from Yahweh fo go ova dea Tarshish side (dass Spain, you know). He go down Joppa boat harbor an find one big boat dat goin go Tarshish. He pay da money fo go, an he go on top da boat fo go Tarshish wit da saila guys. He tink he can go far way from Yahweh.
Da Storm
4Wen dey was going, Yahweh, he wen make one bite-hard wind come on top da sea. Da storm come on top da watta so strong, da boat litto mo bus up. 5Da saila guys, dey plenny scared. Ery one a dem wen yell fo help to dea own gods. Dey wen throw out da stuffs from da boat fo make um not so heavy, so mo easy fo handle. All dat time, Jonah, he stay down inside da bottom part a da boat. He wen lay down inside dea an go pass out sleep. 6Da captain go by Jonah an yell at him, “Eh! Wassa matta you? How come you sleeping lidat?! Get up an tell yoa god fo help us! Den maybe yoa god goin tink fo help us guys, so we no wipe out!”
Dey Throw Jonah Outa Da Boat
7Da saila guys, dey tell each odda, “Eh, good fo us if we can find out who da guy dat wen make one god mad, an make dis bad ting come to us guys. We go pull straw fo find out who him, yeah?” Dey wen pull straw, an Jonah, he da one wen lose.
8Dey tell Jonah, “Kay den. You da guy dat wen make dis bad ting come to us guys. So tell us, who you, an wat kine work you do? Wea you come from? Wat country you come from? Wat yoa peopo?”
9Jonah tell um, “Me, I one Hebrew guy. I get love an respeck fo Yahweh, da God Up Dea Inside Da Sky. He da One wen make da sea an da land. 10An I stay running away from him.”
Wen da saila guys hear dat, dey come real scared. Dey aks Jonah, “Eh, wat you do dat fo?”
11Da waves, dey stay coming mo big erytime. So da saila guys tell Jonah, “Eh! Wat we gotta do to you, so yoa god make da sea come quiet aroun us guys?”
12Jonah tell um, “Take me ova dea an throw me inside da sea. Den da sea goin come quiet fo you guys. Cuz I know dis big storm wen come to you guys cuz a me.”
Dey Throw Jonah Inside Da Sea
13Da saila guys, dey try firs fo row da boat back to da land. But dey no can, cuz da storm stay coming mo big all aroun dem. 14Den dey wen yell fo help to Jonah's god Yahweh. Dey say, “Eh Yahweh! Please, no let us guys wipe out jus cuz we goin kill dis guy! If he neva do bad ting, an we kill um, please let go us guys! Cuz you Yahweh, an was you dat wen make all dis happen, not us guys. So no blame us!” 15Den da saila guys wen pick up Jonah an throw him inside da sea. Right den an dea, da sea wen stop moving aroun an come quiet.
16Da saila guys, dey real scared a Yahweh, cuz he fo real, an dey like show him plenny respeck. So dey wen kill one animal fo make sacrifice to him, an dey make plenny serious kine promise, wat dey goin do fo him bumbye.
Da Big Fish Swallow Jonah
(Matthew 12:40)
17Yahweh, he wen make ready one mangus fish fo swallow Jonah. An den Jonah stay inside da fish opu, three days an three nites.