Jonah Pray To God
21Wen Jonah stay inside da fish, he wen go pray to his God Yahweh.
2He say:
“Wen I get plenny trouble,
I yell out to you, Yahweh, fo help me,
An you help me.
“Wen I was inside da fish opu
Was jalike inside da place wea da mahke peopo stay.
I yell fo help,
An you lissen to me.
3You throw me down inside da real deep place
Inside da middo a da sea.
Da watta come all aroun me.
All da big wave dat you send go ova me.
4I stay tinking lidis: ‘God, he wen throw me out,
He make me go way wea he no see me.’
I tinking: ‘Fo shua I no goin see one mo time
Da Temple dass spesho fo God.’
5Da watta wen come ova me an litto bit mo I goin mahke,
Da deep watta come all aroun me,
Big seaweed wen wrap aroun my head,
6I wen go down to wea da mountains stand, on top da ocean bottom.
Jalike I go down to da Mahke Peopo Place,
Dat get lock fo keep me inside,
An I no can go outside, eva!
But you, you my God Yahweh!
You wen bring me up outa da grave
An I stay alive still yet!
7“Wen I wen feel like I goin stay alive ony litto bit moa,
I tink plenny bout you, cuz you Yahweh.
I wen pray hard to you
Ova dea wea you stay inside da Temple dass spesho fo you.
8Whoeva go down in front
Da idol kine gods dat good fo notting,
Dey no like stay tight wit you.
You da One dat erytime stick wit dem.
9But me, I like make sacrifice fo you bumbye,
An sing an tell you dat you da greates!
Da ting I wen promise you dat I goin do,
I goin do um.
Cuz you Yahweh,
An you da One wen bring me outa trouble!”
10Den Yahweh, he wen tell da big fish wat fo do, an he bahf Jonah out on top da beach.