Jesus tell his twelve guys fo come togedda wit him, an he give um da power fo make da bad kine spirits let go da peopo dat dey wen take ova, an fo make all kine sick peopo come good.
Dis da twelve guys he send all ova da place: Simon, da one dey name Peter, an Andrew his brudda; James, dass Zebedee boy, an John, dass James brudda;
Philip an Bartolomew; Thomas an Matthew, dass da guy befo time dat collect money fo tax fo da govermen; James, dass Alfeus boy, an Taddeus;
da odda guy name Simon, he from da Jewish sovereignty guys; an Judas Iscariot, dass da guy dat goin set up Jesus fo mahke bumbye.
Jesus send da twelve guys all ova, an he tell um, “No go wea da peopo dat not Jews stay, an no go wea da Samaria peopo stay,
but go by da peopo from Israel ohana, cuz dey jalike sheeps dat stay lost.
An wen you guys go, teach lidis, ‘God, da King from da sky, he stay King hea now.’
Make da sick guys come good, make da mahke guys come back alive again, make da lepa guys come good, an make da bad kine spirits let go da peopo. God give you guys plenny, an he no expeck notting back. So den, you guys give plenny too, an you guys no expeck notting back.
Gold, o silva, o copper money, no take um wit you guys.
No even take one bag fo da trip, o extra clothes, o slippas, o walking stick; cuz da peopo suppose to give da worka guy wat he need.
“Wen you guys go inside one big o small town, look fo one guy dea dat da peopo get respeck fo, an stay his place till you go way from dea.
Wen you guys go inside da guy's house, tell um you dea fo bring aloha.
An if dat ohana give you guys respeck, den tell dem you like fo God make dea hearts rest inside. But if dey no give respeck, take back wat you aks God fo do fo dem.
If no mo nobody take you guys in, an dey no like hear wat you say, wen you go outa dea, dust da dust from yoa feet, fo show da peopo dea dat God no like, cuz dey no lissen.
Dass right! An I tell you guys dis too: wen dey stand in front God da Judge, dey goin get mo hard time den da peopo from Sodom town an Gomorrah town, dat time God wen wipe um out.
“You know, I sending you guys out jalike sheeps, an you guys goin go wea da wild wolfs stay. So you guys gotta tink, jalike da snakes, an no hurt nobody, jalike da doves.
Watch out fo da guys dat goin set you up in front da main leadas, an goin whip yoa back hard inside da Jewish churches.
Dey goin drag you guys in front governas an kings cuz you my guys. Den you guys goin tell wat you know bout me in front dem, an in front da peopos dat not Jews.
Wen dey set you guys up lidat, no worry wat you goin say o how you goin say um. Ony say wat yoa Fadda goin tell you right den.
Dat time goin be his Spirit talking, not you guys.
“One brudda goin set up his own brudda fo mahke, an one fadda his kid, an kids goin fight wit dea mudda an fadda, an dey goin set um up fo mahke.
Everybody goin hate you guys cuz you my guys. But da guy dat no give up till pau goin come out okay.
“Wen da guys inside one town make you guys suffa, go way from dea, den go one nodda town. Dass right! An I tell you guys dis too: I da Guy Dass Fo Real, an I goin come back befo you guys even can go all da towns Israel side.
“Da teacha, he mo importan den da guy learning. Da boss, he mo importan den da worka.
Da guy learning goin feel good inside if bumbye he can come jalike his teacha, an da worka guy come jalike his boss. If dey call da head guy inside da house ‘Da Devil,’ den dey goin call his ohana ‘Da Devil Guys’ an even mo worse tings.
“No scared dem. Da tings dey cover an hide, everybody goin know an see.
Wat I telling you guys in da dark, tell um wea get light too. An wat I wispa in yoa ear, stand on top da house an yell um out.
No scared da guys dat can make yoa body mahke, but no can make yoa spirit mahke. But you guys betta be scared God. He can make yoa body an yoa spirit get cut off from God inside Hell.
Dey sell two sparrow birds in da market fo one penny. But not even one sparrow bird goin fall down from da sky on top da groun if yoa Fadda no like.
Yoa Fadda, he even know how much hairs you get on top yoa head!
No scared! Cuz God know you guys worth mo den plenny sparrow birds.
“If get one guy dat tell in front all da peopo dat he know me, den I goin tell in front my Fadda in da sky dat I know him.
But if get one guy dat tell in front da peopo dat he donno me, den I goin tell in front my Fadda in da sky dat I donno him.
“No tink dat I come hea to dis world fo make everybody come friends an no fight. I no come fo do dat, but fo make um turn agains each odda.
I come an I hea now, an jalike da Bible wen say from befo time, ‘Dat goin make one guy turn agains his fadda, one girl agains her mudda, one daughta-in-law agains her mudda-in-law.
You goin get guys dat hate you inside yoa own ohana.’
“Whoeva get love fo his fadda o his mudda mo den he get love fo me, not good nuff fo be my guy. An whoeva get love fo his boy o his girl mo den he get love fo me, not good nuff fo be my guy.
Da guy dat not ready fo go wit me an be my guy, no matta dey even goin kill um on top one cross, he not good nuff fo be my guy.
If bodda you dat you goin mahke, fo shua you goin mahke. But if you like do everyting you do fo me, an no bodda you if you mahke fo dat, den you goin live fo real kine.
“Anybody take you guys in an make friends wit you guys, same guys, dey goin take me in, an I goin make friends wit dem. Anybody take me in an make friends wit me, same guys, dey goin take in da One dat wen send me, an he goin make friends wit dem.
Whoeva take in one guy dat talk fo God an make friends wit him, jus cuz he talk fo God, God goin have plenny good kine stuff bumbye in da sky fo dem, jalike dey was God's talka guy too. Whoeva take in one good guy an make friends wit him, jus cuz he one good guy, God goin have plenny good kine stuff bumbye in da sky fo dem, jalike dey was one good guy too.
Whoeva give one guy dat I teaching hea even one drink cold water, jus cuz he one guy I stay teaching, no matta he ony one regula guy, I tell you guys fo shua, God goin have plenny good kine stuff bumbye in da sky fo him.”