2Same time, John Da Baptiza Guy, he stay in jail. He hear all da stuff Jesus stay doing. (Jesus was da Christ guy, you know, da Spesho Guy God Wen Send.) So John wen go send his guys fo talk to Jesus. 3Dey aks him, “Eh, you da guy suppose to come, o wat? O we suppose to wait fo one nodda guy fo come?”
4Jesus tell um, “Go, tell John wat you guys stay hear an see. 5Had guys dat no can see, now dey can see. Had guys dat no can walk, now dey can walk. Had lepa guys, now dey no mo sick. Had guys dat no can hear, now dey can hear. Had guys dat was mahke, now dey stay walking aroun. Da peopo dat no mo notting, now dey hear all da Good Kine Stuff From God dat I teaching um. 6An if da tings I do no bodda you, den you goin feel good inside.”
7Afta John's guys wen start fo go way from ova dea, Jesus tell all da peopo bout John. He aks um, “Dat time you guys wen go inside da boonies fo see John, how come you wen go? Fo look da wind blowing da grass? Nah! 8Den, how come you guys wen go ova dea? Fo look one guy wit fancy kine clotheses? You know wat? Da guys dat wear fancy kine clotheses stay inside da king's palace. 9If not dat, how come you guys wen go ova dea? Fo look one guy dat talk fo God? Eh, I tell you guys, John, he mo den one guy dat talk fo God. 10Dis da guy da Bible wen talk bout befo time, dat time God tell his Spesho Guy,
‘Eh! Try lissen dis!
He goin make everyting ready fo you,
11“Dass right! An I like tell you guys dis too: From all da peopo dat wen live befo time, no mo nobody mo importan den John Da Baptiza Guy. But den now, even da mostes small kine guy dat get God fo his King, he mo importan den John.
12“From da first time John Da Baptiza Guy wen start fo teach till now, da King's ohana stay coming mo an mo strong. An get guys dat like try beef, fo take um ova. 13Till John wen show up ova dea, all da guys dat wen talk fo God befo time, an Moses wen he wen write down God's Rules inside da Bible, dey all wen talk bout da King's ohana. 14Dis guy John, he da guy dey say goin come, jus like Elijah. You tink you guys can handle dat? 15Yeah, you know! You guys get ears fo hear, you betta lissen!
16“But peopo nowdays, how dey stay? Dey jalike da kids dat stay sitting inside da open market place, an yelling to dea friends,
Us guys cry,
18“Same ting, wen John Da Baptiza Guy show up, he no eat notting so he can pray plenny, an he no drink wine. Dass how come peopo say, ‘Eh, he get one bad kine spirit in charge a him!’ 19Eh, but try go figga dis: Me, I da Guy Dass Fo Real. I eat, I drink, an dey say, ‘You know wat? Dis guy everytime eating an drinking! He friends wit da guys dat collect money fo tax fo da govermen, an da odda kine peopo dat get bad name, jalike dem.’ But eh! you know wat? Da guy who get da smarts from God, da tings he do, goin make proof dat he right.”