Afta Jesus pau teaching, he go way from Galilee side, an go wea da Judea side start, da odda side a da Jordan River.
Had plenny peopo wen go by him, an he wen make da sick guys come good ova dea.
Had some Pharisee guys dat wen go by Jesus fo try trap him from wat he goin tell um. Dey aks him, “Inside God's Rules, az right, o wat, fo one guy go throw out his wife fo jus anyting?”
He say, “You guys neva read inside da Bible, dat wen God wen make da world, he make one guy, den he make one wahine.
An God say, ‘Cuz I wen do dat, da guy no goin stay wit his mudda an fadda no moa, he goin stay wit his wife, an da guy an da wahine goin be jalike one body.’
So dey not two peopo no moa, dey one body. Wat God wen put togedda, da peopo betta not broke um up.”
Dey aks him, “Den how come Moses wen tell, ‘Fo get one divorce, gotta give da wife one paper, den let her go’?”
Jesus tell dem, “Cuz all you guys so hard head, dass why Moses wen let you guys throw out yoa wife. But I telling you guys dis: Wen God wen make da world, dat time no was lidat.
An I tell you guys dis too: If one wahine neva go fool aroun, an her husban still yet go throw her out, an den he marry one nodda wahine, da first one still yet stay his wife. Da guy ony fooling aroun da second wahine.”
Jesus guys say, “Eh, if dass how stay, mo betta no marry.”
But Jesus say, “Everybody no can handle dis, ony da guys God help fo do um, dey can handle.
Cuz get guys dat no can marry cuz dey born lidat. An get odda guys dat no can marry cuz peopo wen make um lidat. An get mo odda guys dat no marry cuz dey like ony work fo God, da King inside da sky. Whoeva can handle dis, let him do um.”
Da peopo wen bring dea small kids by Jesus, cuz dey like him fo put his hands on top dea heads an pray. Den Jesus guys wen scold um.
But den Jesus wen say, “Let da kids come! No stop dem! Cuz da peopo who get God in da sky fo dea King, inside demself dey jus like dese kids.”
Den Jesus wen put his hands on top da kids heads, an afta dat, he wen go way.
16An you know wat? One guy go by Jesus, an say, “Eh, Teacha! Can aks you one question? Wat good ting I gotta do fo live to da max foeva?”
Jesus say, “How come you aks me bout da ‘good ting’? Ony get one Guy dat stay good fo real kine, dass God. If you like live to da max foeva, you know God's Rules. Go do um, den.”
Da guy say, “Wat rules?”
Jesus say, “No go kill nobody, no go fool aroun behind da odda's back, no rip off nobody, no bulai any kine bout nobody,
show respeck fo yoa mudda an fadda, get love fo da odda guy jalike you get love fo yoaself.”
Da young guy say, “Ho, Teacha! I do all dat stuff. Wat mo I gotta do?”
Jesus tell um, “If you like come perfeck kine, go sell all da stuffs you get, an give da money to da peopo dat no mo notting. Den come wit me fo be my guy. An garans you goin get da real kine rich stuff in da sky.”
Da young guy wen hear dat, an he wen come real sad, so dat he wen go way, cuz he get plenny rich stuffs dat he neva like sell.
So, Jesus tell his guys, “You see dat? I tell you guys dis too, az why hard fo one rich guy fo get God in da sky fo his King.
I telling you guys one mo time, stay mo easy fo one camel go thru da puka inside one needle, den fo one rich guy fo get God in da sky fo his King.”
His guys wen hear dat. Wen blow dea minds, an dey say, “Eh, if dass how stay, den who can get outa da bad kine stuff he stay inside?”
Jesus look strait at dem, an tell, “No mo nobody dat can do um, but ony God, he da one dat can do um.”
Den Peter wen tell, “Eh, Boss, try lissen! We wen give up everyting we get fo go wit you. Wat we goin get fo dat?”
An Jesus say, “Az right! An I tell you, I da Guy Dass Fo Real. Wen everyting come new, an wen I sit on top my awesome throne, you guys who stay my guys right now, goin sit down on top da twelve thrones an be da judges fo da peopo inside da twelve Israel ohanas.
Whoeva give up his home, his bruddas, his sistas, his fadda an mudda, his kids, his land, cuz he know who me, bumbye dey goin get hundred times mo plenny, plus, dey goin live to da max foeva.
Goin get plenny guys who make demself come first, but bumbye dey goin come last. An get plenny guys who make demself come last, but bumbye dey goin come first.