Jesus Teach On Top Da Mountain Side
51Jesus see choke peopo, an he go up da mountain litto bit. He sit down dea fo teach, an da guys he wen pick fo teach come by him fo lissen.
Da Peopo Dat Stay Good Inside
(Luke 6:20-23)
2He wen start fo teach um. He tell um:
3“Da peopo dat know dey need God inside dea heart,
Dey can stay good inside
Cuz God in da sky, he dea King.
4“Da peopo dat cry inside dea heart,
Dey can stay good inside
Cuz God goin kokua dem.
5“Da peopo dat no need put demself first everytime,
Dey can stay good inside
Cuz God goin give um da whole world.
6“Da peopo dat everytime really like do da right ting,
Dey can stay good inside
Cuz God goin help um do um.
7“Da peopo dat pity da odda peopo, an give um chance,
Dey can stay good inside
Cuz God goin pity dem an give um chance too.
8“Da peopo dat hundred percent fo God inside,
Dey can stay good inside
Cuz dey goin see God.
9“Da peopo dat help da odda peopo come friends again,
Dey can stay good inside
Cuz God goin say, ‘Dey my kids.’
10“Da peopo dat do right, an suffa fo dat,
Dey can stay good inside
Cuz God in da sky, he dea King.
11“You guys can stay good inside wen dey talk bad to you guys, an make you guys suffa, an dey talk any kine bout you guys, cuz you guys mines, but dey bulai. 12Dance an sing, cuz bumbye God goin have plenny good kine stuff fo you guys wea he stay inside da sky. Eh, jalike befo time, da guys God wen send fo talk fo him long time ago, had peopo dat wen make dem suffa too.
Salt An Light
(Mark 9:50; Luke 14:34-35)
13“You guys know how da food need salt fo stay good. Same ting, da peopo all ova da world need you guys. But if da salt no mo taste, how you goin make um work like salt again? Dat kine salt no good. Ony ting can do, throw da salt outside wea da peopo walk.
14“You guys jalike da light dat help da peopo all ova da world fo see. You no can hide one town on top one hill. 15Same ting, you no light one lamp an den cover um up. You put um up on top one high place, yeah? Den everybody inside da house can see. 16So, you guys jalike da light. Let everybody see da good kine stuff you guys doing. Den dey goin say dat yoa Fadda, God, dat stay in da sky, eh! he awesome!
Jesus Teach Bout God's Rules
17“No tink I stay hea fo get rid a God's Rules an da stuff da guys who talk fo God wen say. I neva come fo wipe out God's Rules. I come fo make everyting dey wen talk bout come true. 18Dass right! An I tell you guys dis too: Da sky an da world no goin pau befo everyting dat God's Rules say come true. Nobody no can take notting from God's Rules, not even one dot o one small line. 19Whoeva no do jus one small kine Rule from God, cuz he tink, ‘Dat Rule notting,’ an he teach da odda guys fo say dat Rule notting too, da King from da sky goin make dat guy jalike he notting. But whoeva do wat all God's Rules say, an teach da odda guys fo do um too, da King from da sky goin make him importan. 20I telling you guys, if you no do da right tings, mo den da teacha guys dat teach God's Rules an da Pharisee guys, God in da sky no goin come yoa King.
Da Guy Dat Huhu Wit His Brudda
(Outa Egypt 20:13)
21“You guys wen hear wat God wen tell da peopo from befo time. He say, ‘No go kill nobody. Whoeva go kill somebody gotta come in front da judge.’ 22But eh! I tell you guys dis: Whoeva stay huhu wit his brudda gotta come in front da judge. Whoeva tell his brudda, ‘You no good!’ gotta come in front da main leadas. But whoeva tell, ‘You stupid an good fo notting!’ gotta go to da Hell fire.
23“So, if you bring one gif fo da Good Boss inside da temple, an you rememba yoa brudda huhu wit you cuz you wen do someting to him, 24leave yoa gif ova dea, an go make good to yoa brudda. Den you can go back an give yoa gif to da Boss.
25“If somebody like take you in front da judge, quick, try get everyting right wit dem wen you still get chance. If you no do dat, dey goin give you to da judge, an he goin give you to da police, an dey goin put you inside jail. 26I telling you da trut, you gotta pay every penny you owe befo you can come out.
Da Guy Dat Fool Aroun Wit Da Odda Guy's Wife
(Outa Egypt 10:14)
27“You guys wen hear wat God wen say: ‘No go fool aroun behind yoa husban o yoa wife's back.’ 28But eh! I telling you guys dis: Whoeva look at one wahine an like fool aroun her, he wen do um awready inside his heart. 29If da right eye make you do bad kine stuff lidat, dig um out, an throw um away! No matta you ony get one eye -- mo worse da whole body go Hell! 30If da right hand make you do bad kine stuff, cut um off an throw um away! No matta you ony get one hand -- mo worse da whole body go Hell!
Da Guy Dat Dump His Wife
(Matthew 19:9; Mark 10:11-12; Luke 16:18; Rules 24:1)
31“God wen say: ‘Whoeva goin dump his wife, gotta write um down on one divorce paper an give um to her.’ 32But eh! I telling you guys dis: Whoeva dump his wife, an she neva even fool aroun, he make her jalike she wen fool aroun. An if one nodda guy marry her afta her husban wen dump her, dat guy jalike one guy dat go fool aroun da first guy's wife.
Do Wat You Promise
(Prieses 19:12; Census 30:2; Rules 23:21; Isaiah 66:1; Songs 48:2)
33“An you guys wen hear wat God wen tell da peopo from befo time. He say, ‘No promise someting an den no do um. Cuz you wen promise um in front da Good Boss Up Dea. So, you betta do um!’ 34But eh! I tell you guys dis: No go say, ‘I swear to God.’ No make promise an say ‘I swear by da sky up dea, dat I goin do um!’ cuz dass God's throne, wea he stay sitting cuz he in charge. 35No make promise an say ‘by da earth,’ cuz dass God's stool fo his feets. No make promise an say ‘by Jerusalem,’ cuz dass da spesho town fo da big King. 36No make promise an say ‘by my head,’ cuz you no can make one hair come white o black. 37Ony say, ‘Yeah’ o ‘No.’ Wateva you say mo den dis come from da Bad Guy, da Devil.
No Fight Back
(Luke 6:29-30; Outa Egypt 21:24; Prieses 24:20; Rules 19:21)
38“You guys wen hear wat God wen say: ‘If anybody pull out yoa eye, pull out his eye. If anybody broke yoa teet, broke his teet.’ 39But eh! I telling you guys dis: No fight back da bad guys. If anybody slap yoa head one side, mo betta let um slap da odda side too. 40If anybody take you in front da judge so dey can get yoa shirt, let um take yoa coat too. 41If one army guy make you carry his stuffs one mile, eh! carry um two miles. 42Wen somebody aks you fo someting you get, give um. Da guy who like borrow someting from you, no tell um, ‘No!’
Love Da Guys Dat Hate You
(Luke 6:27-28, 32-36; Prieses 19:18)
43“You guys wen hear wat God wen say: ‘Show love an aloha fo da peopo dat all aroun you.’ An da peopo say: ‘Hate da guys dat hate you.’ 44But eh! I telling you guys dis: Show love an aloha fo da guys dat hate you! An aks God fo help da guys dat make you suffa! 45Wen you do dat, you goin show fo real dat you da kine kids dat come from yoa Fadda dat stay in da sky. He make da sun come up fo da bad guys an da good guys. An he send rain fo da guys dat do da right tings, an fo da guys dat no do da right tings. 46So, if you guys ony get love an aloha fo da guys dat get love an aloha fo you, you tink God owe you guys money fo dat? Nah! Even da tax peopo dat collect money fo tax fo da govermen, dey get love an aloha fo da guys dat get love an aloha fo dem. 47If you guys say ‘Howzit’ ony to yoa bruddas, you tink you spesho, o wat? Even all da diffren peopos all ova da world dat donno God, dey say ‘Howzit’ to dea bruddas too. 48All da time you gotta be good hundred percent, jalike yoa Fadda in da sky, he everytime stay good hundred percent.